Read Fore Iburu 4 Bible Online

Iburu 4 - Fore bible

Iburu 4

¹Pigoya, Koti migarakenaenawapi uma pasikena kamana utaratantine. Pi kamanaꞌamaba uwa waiyeka, taekuru pumagi, taepisa kaꞌwainaba kampa abae puma apasisanaga kabiyeno.

²Piya, paipa Mosese nkaokinaꞌmiti aogi kamana aborantasa puma, taeti pabiyama aboraye. Pigoya, pi kana aogi kamana abintapa, kampa wasima imatiti puguna, igetiba kampa auꞌwapa aborantiye.

³Piya, tae tamatiti pompe kinaꞌmitaba Koti utaratantemi mpigarakenaenabi uma pasune. We, paipa Kotiba mampa puma nagaritaogana, wasanamiteti yogawapa aꞌya waogana aeba agama maya untiye:Kamanaꞌne kampa abikibe kinaꞌmika namoꞌena pokini, igeba migarakenaenanepipa taganema kampa ubasikibewema utawaitauwe, untiye, iye.

⁴Piya, mono isaꞌama ka aukaꞌi maya iye:Kotiba tonaentisa kaꞌumaema yaga yoga puma nagarigaite, to tarumaema yaga migarantiye, untiye, iye.

⁵Eya, pi nkaukaꞌi to ka maya iye:Igeba taganema migarakenaenanepipa kampa ubasikibewe, untiye, iye.

⁶Piya, pai aogi kamana abinta kinaꞌmiba kamana ago akayumagini, kampa uma pasintawe. We, migarakenaenari wakena kipa uwa waintikini, to kaꞌisamiba pasikibewe.

⁷Eya, Kotiba ka yagaga: Ibawe, otantiye. Piya, aintiba uwaena kabu wagasoganaba, Kotiba Tebiti nkawamupisa kamanapa maya uma aborantiye:Ibaba, tigeba Koti kamana abintiripa, aogima abima, tiguꞌamapa a-nkakunkataiyo, untiye, iye. Pipa ago urimintuwe.

⁸Pigoya, pai Yosuwa ago migarakenaenabi iba puntisinta, Kotiba pika to ka yagagaba kampa otasine.

⁹Piya, migarakenaenaba taeti uwa waintiye. Owe, sabati yaga kanta puma migarakenaenaba waintegi, pipa Koti nkaegaraompe kinaꞌmitaba aobi pune.

¹⁰Piya, kaꞌwaina Koti mpigarakenaenawapinti ubasikibipa, aeba yogawapa aꞌya atate migarakiye. Eya, pai Koti yogawa aꞌya kaite migarantisa puma, aeba yogawapa aꞌya atate migarakiye.

¹¹We, migarakenaenawapi uma pasikenaga taeba esegima mono yuga peno. Aꞌyugu taepisa kaꞌwainaba, pai kamanapa akayuntasa puma wareꞌnasanagaba, kabima mima aogi mono yuga peno.

¹²Piya, Koti kamanapa eꞌwasaena wantaga, esegima yogawapa piye. Piyamaba, aganantaꞌenawampa tara awa wainta paroya ntoginkamantana asugasima, tagu tamankama atokaentipa nawaegasima, tayampu taraꞌnuwama atokaentipa nawaegasaye. Eya, aꞌyaꞌma tantawama ntapiyenabe tabugaintanabe aꞌyigimpa aboraye.

¹³Piya, Koti nkaobipa kakantaꞌenaba kapa kampa waintiye. Kampaye. Aꞌyaꞌmaenarepa apira puma ae aobi ago aborawaeye. Eya, Koti aeba aꞌyaꞌmaena pompentana tage tatai ntagarawe. Isuba monota paitanta kiye yagararene

¹⁴Pigoya, taetiba monota tabe paitanta kiye yagarare mintiye. Aeba mantabinti asu pasinti ntagara Isu, Koti Ntagarawe. Pika taeba tamatiti potaompentanaba upebe puma aesaga peno.

¹⁵Piya, aeba magimagiyenare atama antaraꞌena kampa punta yagara kanta puma kampa miye. Kampaye. Aeba aboraogana amiyoꞌena potaomepa kampa aguntaenaba punta, monota paitanta kiye yagarare tagantana puma taeti aborantiye.

¹⁶Pigoya, pika kampa taekuruba punta, taeba Koti awagaenawa tamikena marunkati uma airokaeyeno. Piya, taeba airokaeyakana antaraꞌena purataka, kuntaenare aesaga pikenaga awagaenawatasa taoꞌmaeyano.