Read Fore Iburu 5 Bible Online

Iburu 5 - Fore bible

Iburu 5

¹Pigoya, mabisa kina taepisa monota paitanta kiye yagarare Kotiba otaye. Kotiba otagina, aeba tauꞌikenaga Kotiti taꞌmuntanarepa amima yagaba aeguma kaema agunta pasaꞌatagina aguntaenarepa airarikaegasaye.

²Piya, pi ntagaramaba aegeba tae kanta puma magimagi yagara mintanaba, aeba pika napima, aibo antage kinaꞌmiteka taga antara puratama pasema taoꞌmaeye.

³Piya, aeba mabisa magimagi yagara mintanaba, wayaꞌwamika muta ataisa puma aeꞌwa aguntaenawa maegaikenaba pabiyama muta ataye.

⁴Pigoya, pi monota paitanta kiye yagarama mparupa uwa maekenaba kampaye. Pipa Koti Eronipa pai otantisa puma otagina maeye.

⁵We, pabiyamagina Karaisiti kampa aeꞌwa nkagegaꞌeba maete inta, monota paitanta kiye yagararepa aborantine. Koti otaogana aeba pi ntugaba puntine. Eya, Kotiba maya omintiye:Kaeba yagaranekawe. Iba aboragatauwe, untiye, iye.

⁶Piya, mono isapi to aukaꞌiba to ka maya omintiye:Kaeba Meyokisete ae tu mpima mono kiye yagara miyaba miyeno, untiye, iye.

⁷Pigoya, Kotiba purintapisa auꞌikena esegiyena waintegina, paipa Isuba mampabisa yagara mintanaba, pika napima tabera kegaꞌe uma kubeꞌena puma Kotiti nunamu uma naoꞌmaeyoma abigantiye. Aibumagina, aeba aeꞌwa ntapiyena wareꞌnama Koti nkawamupa wasiyomeka, Kotiba nunamuwapa abintiye.

⁸Piya, Isu aeba Koti Ntagara mintiye. We, tae kanta puma auki nakiyenarasa Koti nkawamu wasikenaenama nkagoba abibebe puntiye.

⁹Piya, Isu aeba abibebe pumagina, Koti nkaobi aotaꞌenarakaꞌya puma, aꞌyaꞌma ae awamu wasiyompe kinaꞌmitepa tauꞌima miyaba mikenaenama agoba aborantiye.

¹⁰Eya, Kotiba otaogana, aeba Meyokisete tu kanta puma monota paitanta kiye yagarare aborantine. Inamu ntagara kantaba taeba a-peno

¹¹We, mono yugawaka uwaena kamana waintegi, tige akuninta mintaka, urimikenaenaba kunta piye.

¹²Piya, tigeba mono abirite kanantaꞌnagita, ayamabaya mono tisa kinapa kampa miyewe, a. Tige napiyenaripa aronkanto waiyegina, ka yagarama Koti nkaogi kamanaꞌama nkagoba to kake urimikibipa, pipa kanarane. We, tigeba esegi nanintaba kampa na kina mimagiri, nonoꞌamana mpaema miyiyo.

¹³Eya, aꞌyaꞌma kinaꞌmiba nono nayaba mima, igeba inamu ntagara kanta puma mima arupuyenama nkagoba kampa aogima agantawe.

¹⁴Piya, esegi nanintaba iꞌanosa kinaꞌmintanawe. Piya kinaꞌmiba igewai ntapiyenarasa aogima napima asi nasiba aogiyenabe ataenabe taga aꞌyikewe.