Read Fore Iburu 7 Bible Online

Iburu 7 - Fore bible

Iburu 7

¹Piya, Meyokisete, Saremi kumatasa waꞌega, aeba ima minta tabe Kotiwama mpono kiye yagara mintantiye. Pigoya, paipa Abaraꞌamuba wama mabisa waꞌega kama kinaꞌwapa iyeguma igarubakaite aꞌwae puma waꞌeri kanaogana, Meyokisete aeba keꞌi uma pabuma aꞌmu potantiye.

²Aꞌmu potaogana, Abaraꞌamuba aꞌyaꞌmaenawapisaba aisuma nayataraꞌmu pogana age ka maeta maeta puma Meyokisetepa amintiye. Piya, Meyokisete nkage aꞌwae puma tae kamanapisa: Arupuyenama nkwaꞌegawe, yune. Pigoya, aeba Saremi kumatasa waꞌega miyoga, pi nkageba tae kamanapisa: Paruyenama nkwaꞌegawe, yune.

³Piya, aeba ano aba kampa minta, abigutasa yagara miyegina, maꞌatantaꞌenawape purikenaenawape kampa waiyegina, aeba Koti Ntagara kanta puma mima mono kiye yagara miyaba miye.

⁴We, tigeba Meyokiseteka napiyiyo. Aeba taberakaꞌyane. Piya, tayabama Abaraꞌamuba maꞌenabisa kota maema aisuma nayataraꞌmu pogana age ka maeta maeta puma Meyokisetepa amintiye.

⁵Pigoya, Aribai ntagarakiꞌnupa mono kiye kinaꞌmi ntugamana mpaeya kinaꞌmika, Isureyo kinaꞌmintana nayataraꞌmu pogana age ka maeta maeta piyoma, ago kamanaꞌama uwaitantiye. We, Aribai kinaꞌmibe aꞌyaꞌma to Isureyo kinaꞌmibe igeba Abaraꞌamupisa aboranta, ka tune. Piya, Aribai kinaꞌmiba iyoꞌmitasa igewaintanaba maeyawe.

⁶Pigoya, Meyokisete ige tupipa kampa aboranta, maruꞌenaba Abaraꞌamuntanaba age ka maeta puntiye. Eya, Meyokisete aeba Koti kamana otanti ntagaramapisa age ka maeta pumagina aꞌmu potantiye.

⁷Piya, taeba ago abintune: Asugasima mintiꞌna aeba amentapinti mintiꞌnapa aꞌmu potaye. Eya, Meyokisete asugasima mintiꞌnawe.

⁸We, ibantoba purikibe mono kiye kinaꞌmiba age ka maeta maeta pewe. Paipa Meyokisete age ka maeta puntiꞌna, aeba miyaba mikena yagaramawe, iye.

⁹Piya, ibaba Aribai tupisa mono kiye kinaꞌmiba age ka maeta maeta pewe. We: Aribai, aeba Abaraꞌamu nkayapisa marupa Meyokisetepa menkamogana age ka maeta puntiye, yompesinta, kanara yompesine.

¹⁰Eya, Aribai kampa maꞌatantogana, Meyokisete Abaraꞌamuti aborantogana, Aribai aeba atawampa Abaraꞌamu nkayapisa age ka menkamintiye. Kasa mono kiyerempa marusaenama mparu maentiye

¹¹Pigoya, pai Kotiba ago kamanaꞌwapa aboraramintipa, pi kamanape Aribai kinaꞌmi mpono yugabe kaga kapi atama aboraramintiye. Piya, igewai mpono yugarasa aota kina aboraompesinta, Meyokisete kanta puma mikena mono kiye yagara, Isuba, kampa aboramisine. Eya, igewai mpono yugarasa aota kina aboraompesinta, Eroni kanta puma mikena yagara utaratamisine.

¹²Pigoya, mono kiye kinaꞌmi ntugawaipa wagina aogaso yuga ampa aboraginaba, ago kamanaꞌwapa kaga wagina to aogasoꞌena ampa aboraye.

¹³Piya, Aribai tupi kampa aboranti ntagara Isuka pi kamanapa untiye. Aeba to tupisawe. We, Waꞌegare Yuta tupisa aborantine. Pipa ago abune. Pigoya, Yuta tupisa tabe mono kiyeba aborakibewemaba, Moseseba kampa untine. Kampaye. Pai pi tupisaba mono namapinti aratara mono yugaba kapa kampa puntine. Kampaye. Pigoya, pi tupisa kasaꞌena taeti aboraye. Isuba Meyokisete kanta puma monota paitaratanta kiyerene

¹⁵Piya, kasa mono kiye yagara aborama Meyokisete kanta puma kaꞌmasa peginaba, pi kasa monoꞌama nkagoba taeti uma arawaeye.

¹⁶Piya, kasa mono kiyerepa ago kamanaꞌama otanti tupisa kampa aborantiye. Kampaye. Aeba miyaba mikena esegiyenayaga, mono kiyerepa aborantine.

¹⁷Piya, aeka mono isaꞌama maya iye:Kaeba Meyokisete ae tu mpima, mono kiye yagara miyaba miyeno, untiye, iye.

¹⁸Eya, paisa ago kamanaꞌamaba esegiyenawape tauꞌikenaenabe kampa waintomeka Kotiba maegaintiye.

¹⁹Piya, paisa ago kamanaꞌamaba kaꞌenaba kampa aota potantine. Kampaye. We, Kotiti atokaekena kasa ki aboraogana, pi kipa paisa ago kamanapa agasimagina Koti nkagora uma irosakubompe kine. Pi kipa Karaisitiwe.

²⁰Piya, Isuba tabe mono kiyerepa kampa uwaba aborantogana, Kotiba uma esegi potantine. Pigoya, paisa monotasa kiye kinaꞌmipa kampa esegi potaogini, igewai tupisa mono yugawai uwa maentane.

²¹We, Kotiba Isu mono kiyena pukenaga esegi kamana uma mayama omintiye:Waꞌegawamanaba, naeba uma esegi pumagi, napiyenanepa kampa aꞌwae pukuwe. Kaeba mono kiye yagaraba miyaba mikibene, untine.

²²Eya, Kotiba pi kamana umagina, kasa utaratantaꞌenama nkatunkapa Isupa aboraramogana, pipa paisaenamaba asugasima waintiye.

²³Pigoya, paisa kiye kinaꞌmiba puꞌmaba, uwaena kinaꞌmiba pi mpono yuga puma mita mita kanantawe.

²⁴We, Isu aeba miyaba mima, mono kiyenawa kampa kainta kabima miyabane.

²⁵Piya, aꞌyaꞌma ae yugarasa Koti nkagora ampiyompe kinaꞌmitepa agora tauꞌiye. Eya, aeba miyaba miyemika, taeka asi nasi Kotiti nunamu yegina taoꞌmaeye. Isu aeba monota paitaratanta kiyerepa aogiyenarakaꞌyane

²⁶Pigoya, Isu aeba aota yagara miyegina kamanapa kapa kampa aeti waiyegina, agunta kina kantaba kapa kampa puma narentare pumagina, mantaba agasima inata minti ntagaraba mintiye. Pabiya yagara monota paitanta kiyenarepa pegina, Koti nkaobi kanarasaye.

²⁷Piya, marusa tabe mono kiye kinaꞌmiba igeba aꞌyaꞌma yagaba muta atakena puntiniba, maruꞌenaba igewai nkaguntaena maegaite, aintiba aꞌyaꞌma kinaꞌmi nkaguntaenaba mae igaikenaga mutapa atantawe. We, Isuba piya yugaba kampa punta, ka yaganto aeꞌwa nkaupa taeka muta ataogana nagariwantiye.

²⁸Piya, paisa ago kamanatasaba Kotiba marasa magimagi kinaꞌmipa tabe mono yugara uwaitantiye. Aibumagina, aintiba esegi kamana uma, aota miyaba yagarawapa pi ntugara otantegina, aeba miyaba miye.