Read Fore Iburu 8 Bible Online

Iburu 8 - Fore bible

Iburu 8

¹Pigoya, pi kaeyo kamanaꞌama nkagowapa mayamawe: Monota paitaratanti kiyerepa mantabinti mima Tabe Waꞌegawama nkaemu yabaera ayatakantisa aukaꞌi mima,

²mono yugawapa Koti nkaota namapi piye. Pi nkaota namapa taga mono namane. Pipa wasanama wanane. Waꞌegawama ituru puma kintemine.

³Pigoya, aꞌyaꞌma monota paitanta kiye kinaꞌmiba Kotiti iꞌmuntana atakena yugarape muta atakena yugarape uwaitaye. Pigoya, kiyarepa Isu aeba muta atagina kanarasaye.

⁴We, mampara mono kiye kina mima, paisa ago kamana wasima muta atawe. Piya puntika, Isu aeba mampabi mintesinta, mabisa mono kiyenawapa kampa waintesine.

⁵Eya, mantabinti taga mpono namapa waintegini, marapa igeba awame namantanaba puma mono kiye yugaba pewe. Piya, paipa Moseseba kairasa mono nama ituru pukena poganaba, Kotiba marupa maya omintiye: Amuti awame pugayakintosa puma aꞌyaꞌmaenaba po, omintiye.

⁶Piya, Karaisiti aeba mono kiye yugaba aogima puma, paisa mono kiye kinaꞌmi ntuga igaintiye. Eya, utaratami ntanama pai uwaitanti ntanamapa asugasagina, Karaisiti ntugarasa Kotiti atokaeratakenaenama paisaenamapa asugasaye. Kasa atokaekenaenama marusaenamapa asugasaye

⁷Pigoya, marusa uwaitanti ntanamaba auꞌwantana aogima aborasinta, kasaꞌenagaba kampa utaratamisine.

⁸Piya, Koti wasanamika abogana kampa kanarasaogana, maya untine:Aintiba ka yagaba naeba Isureyo tupe Yuta tupe naeti atokaewaitakena auꞌwapa kasaꞌena aborakuwe, Waꞌegawamaba piya untiye, iye.

⁹Piya, paisaena wanane. Kasaꞌena aborakuwe, untiye, iye.Piya, paipa iyabamagipa iyata uꞌma, Isipi marisa ibaburite wama menkitauwagini wantane. Pi ntagaba kamanaꞌnepa uwaitauwagini, atokaekenaenama nkagupi kampa mintantane. Piya pugu, naeba nakabiwaitantone, Waꞌegawamaba piya untiye, iye.

¹⁰Eya, ma ntagaba aꞌya waka, Isureyo tu atokaekenaga to kakema mayama utawaitakuwe, Waꞌegawama untiye:Piya, ago kamanaꞌnepa napiyenawaipi atakana waikiye, iye.Eya, ago kamanaꞌnepa igupi kaetakana waikiye, iye.Piya, naeba ige Koti miyekini, igeba nae tu mpikibewe, iye.

¹¹Piya, ka ka kinaꞌmiba igora miye kinaꞌmipa: Waꞌegamakaba abibebe piyomaba, kampa uwaimikibewe, iye.Eya, igeba iyoꞌmipa: Waꞌegamakaba abibebe piyomaba, kampa uwaimikibewe, iye.We, pi ntagaba aꞌyaꞌma kinaꞌmiba, amana kinape tabe kinape, kaga nagabebe puma nagakibewe, iye.

¹²Piya, pi ntagaba naeba nantara puwaitamagi ataenawaipa mae igasima, aguntaenawaikaba to kakema kampa napikuwe, Waꞌegawamaba piya untiye, iye.

¹³Piya, Kotiba kasa atokaekenaenaga untipa, marusaenaba abararawaye. Eya, marusa kamanaꞌwapa karenara wama, nagarikena piye.