Read Fore Iburu 9 Bible Online

Iburu 9 - Fore bible

Iburu 9

¹Pigoya, marusa kamanapa Kotiba uwaitamagina, aeba mono ukena kipe mampara aota mono nama kikenaenabe uwaimima iyakintiye.

²Piya, igeba ka seri nama asitamagini, marusa marupi kanepe yarebe Koti nkaobi atanta paretibe atauguna waintantiye. Pi mparukaba: Aota marune, omintawe.

³Piya, akapintiba tabe kai itama akugasimagini akaꞌisa marukaba: Aota marutakaꞌyane, untawe.

⁴Piya, pi mparupi kaema agunta pasa atakena korirasa punta arata atamagini, nayataraꞌmu kamana wainta korirasa airari kaenta pokisi kaga atantawe. Pi pokisi antabaipintiba mana naninta wainta korirasa punta kankabebe, Eroni nkasarasa asaeꞌwa pama iraome nkasabe, nayataraꞌmu kamana kaema aminti ntaba tarabe, kaga atantawe.

⁵Piya, tara enisore kinaꞌmi nkimapa pi polisi abobori potaugunisi, eꞌwasa Koti antara puratakena aukaꞌi kabintase. We, ibaba kanaenama nkagoba aꞌyaꞌmaba kampa aborakuwe.

⁶Pigoya, pabiyama atauguna waintogini, mono kiye kinaꞌmiba pi aota seri namapinti ite tumite puma marusa marupinti asu paiꞌma, mono yugawaipa puntawe.

⁷Aibuguna, monota paitanta yagara kaꞌwainantoba akaꞌisa aota marupintiba asu pasintiye. Asi nasiba kampaye. Aeba aꞌyaꞌma kabuba ka yaga ka yaga asu pasintiye. Piya, aeba uwaba kampa inta, aeba korapa mae uꞌma aeꞌwaka muta atama aꞌyaꞌma kinaꞌmi nkaiboꞌenawaika kaga aeyoba itakena ubasintiye.

⁸Pintanaba Aota Awamusaꞌama mayama tayakintiye: Pi aota seri namapa uwa waintegina marusa aukaꞌi mono yuga uwa pepa, Koti nkaota namapi uma pasikena kipa kampa aborantiyema, napiyiyoma tayakintiye.

⁹Piya, ma kanarapa pi seri nama kanta puma waiye. Piya, wasanamiba paisa mono aegaꞌma iꞌmuntanabe muta atakenaenabe Koti amegana, pipa napiyenawaimpaba aotaꞌenaba kampa potaye. Kampaye.

¹⁰Piya, naninta nakenaenabe wani ntakenaenabe, wani pasikenaenabe, pika paisa monoꞌamaba uramiye. Eya, paisaenamaba tauꞌama nkagoba wairite kanama waiyegina, aꞌyaꞌmaena uma arupu pukibi ntaga uma nagarikiye. Karaisiti aeba aeꞌwa kuratasa muta atantiye

¹¹Piya, kasa aogiyenaba aboramogana, Karaisitiba kasa monota paitaratanti kiyeba ago ampa aborantiye. Piya, kasa monopipa ubaiꞌma, paisa seri mono namapa asugasaye. Piya, kasaꞌenaba wasanamaba kampa ayapisaba puma mampabisaenaba kampaye. Pipa inatisaenawe.

¹²Piya, Karaisitiba aeba aota marupintiba asu pasintipa, aeba memewama kurape purumaka nkawaroma kurape kampa maete asu pasintiye. Kampaye. Aeba aeꞌwa kuratasa muta atama ika puratantika miyaba mikune.

¹³Piya, wasanami iꞌnintana puguniba, paisa mono kiye kinaꞌmiba memewama kurape purumakankama kurape purumaka nkawaro kaenta kagupe maema, wasanami nkiti asunu kaeyuguna, asuꞌa puma iꞌamaba Koti nkaobipa aogi puntiye.

¹⁴We, Karaisiti kurankama asugaintiye. Piya, Karaisitiba aiboꞌenaba kapa kampa punta, aota mimagina, miyaba Awamusaꞌama nkesegiyenarasa aeꞌwa nkaupa Kotiti muta atantiye. Eya, pi ntugarasa korankamaba napiyenaretasa arirasaena asuꞌa puma, kasa taumaba tamegi aoganti Kotiti kayokayaꞌena potaune. Korankama aguntaenaba aeyobakasaye

¹⁵Piya, Isu aeba Kotike wasanage atarawaisitakena yagara mima, kasa atokaekena kamana esegi piye. Aeba piya pumagina, taba puratai wasanamitepa waiyabaꞌena utaratantintanabi ubaseno. Eya, akayuyompentanabisa ika puratakenaga Isuba purintiye.

¹⁶Piya, pure kinaꞌmi kuta etaꞌmaima wasana imikena pepa, marupa taga puꞌwayema umagini etaꞌmaikibewe.

¹⁷Eya, wasana aogama minteginiba, kotankapa kampa etaꞌmaiyewe. Aeba pureginiba, etaꞌmaiyewe.

¹⁸Piya, marusa mono kamana pai uma esegi puntapa, igeba yaga aeguma korankapa Koti nkaobi paiꞌatama esegi puntawe.

¹⁹Eya, maruꞌenaba Mosese aeba ago kamanapisa aꞌyaꞌma Koti unti kamana aꞌyaꞌma kinaꞌmipa uwaimitegina, purumaka nkawaroma korape memewama korape wanipe maemagina, sipisipiwama tete aepe kakintape maema aeyuꞌma, Koti nkisatibe aꞌyaꞌma kinaꞌmi nkitibe aeguse pugasogana wagana kana puntiye.

²⁰Aibumagina, Moseseba: Pi kurankamaba Kotiti atokaeritakena untintanaba esegi potaye, untiye.

²¹Piya pumagina, Moseseba seri mono namatibe mono namapisa kankaberibe korapa aeguse puma paiꞌitantiye.

²²Eya, ago kamana untitaka, korankama uwomantana aeyobaꞌma aogi puwaitaye. Piya, kora kampa pagemisinta, aguntaenawaipa kampa aeyobakasasine. Karaisitiba aeꞌwa nkautasa muta atantiye

²³Pigoya, mampara monopa mantabinti waintintanama nkamankane. Piya, marasaena aota potakena puntiniba, pabiyama yaga kuratasa aeyobantawe. We, mantarasaena muta atama aota potakenaenaba to awametane.

²⁴Eya, Karaisiti aeba tagantanabi ubasintiye. Piya, wasanami serirasa kimaranta aota mono namapa aeba amankane. Pi ntamapinti wanane. Aeba mantabinti asu paiꞌma, ibaba Koti nkaobi uma aborama taoꞌmaeye.

²⁵Pigoya, paisa monota paitanta kiye kinaꞌmiba ka ka kabura yagama kurapa maerite wama Kotiti muta atakenaga aota marupintiba ubasi puntawe. Kaboga kaboga puntasa puma, Karaisitiba aeꞌwa kuratasaba piyaba kampa puntiye. Kampaye.

²⁶Piya, aeba kaboga kaboga puntemisinta, Koti mampa puntemi ntaga aukigakenaenawapa agobima wairite kanantesine. Pipa kampaye. Kanapa agarosaogana, Karaisitiba ka yaga aeꞌwa nkaupa Kotiti muta atama aguntaena maegaintiye.

²⁷Piya, aꞌyaꞌma kinaꞌmitaba kaꞌanto purukubompeka uratantikana, aintiba kamanatepa aborakiye.

²⁸Piya pogana, Karaisitiba uwaena kinaꞌmi nkaguntaena mae igaikenaga aeꞌwa nkaupa ka yaga Kotiti muta atantiye. Aibuntana, aintiba to kakema tumikibipa, aguntaenaba to kakema mae igaikena wanane. Aeba aobi punta kinaꞌmi nkiꞌima ibabute ikenaga tumikiye.