Read Fore Yemisi 1 Bible Online

Yemisi 1 - Fore bible

Yemisi 1

¹Nae Yemisina, Kotike Waꞌega Isu Karaisitike isige kayokaya yagara mimagi, nagisarisa tara tumpaema Yuta tupisa to mari uminta kinaꞌmititi, ma nkisapa tigeti kaema: Aya pewe, yuwe. Amiyoꞌenaga esegi purataye

²We, naoꞌmitaba, toma toma nkamiyoꞌenaba tigeti aborakiri, abigina tintaba asoya puma tiꞌmu peno.

³Piya, tigeba abintawe. Kaꞌenama aborama timatitiꞌenarika ampa timiyo pekiri asugaikibepa, kuntaena aesaga pikena esegiyenaba maekibewe.

⁴Piya, kuntaena aesaga pikena esegiyenama nkauꞌwapa aborano. Auꞌwapa piyama aborakibepa, tigeti kaꞌisaenamaba kampa kakama waiyekiri tigeba monota kanarasawaema aota kina mikibewe. Tigupa aisaꞌma Waꞌegamati nunamu otaiyo

⁵Pigoya, tige tikapisa kaꞌwaina aogi napiyena kampa wainta, Kotiti abigakana ameno. Eya, Kotiba kaba kampa abiꞌma, kampa aꞌyikinta aogi napiyenaba paga uwa amikiye.

⁶We, pi ntagaramaba tara agi napisanaga aogima amatiti puma Kotiti abigano. Piya, tara agi napi ntagara aeba kayo wani esiba pegina aigaꞌyoꞌya puma maete nasisu piye.

⁷Piya kinaꞌmaba tara agiba napiyekanaba, aunkama igarumiga pekana: Waꞌegawamapisa maekuwemaba, a-ntapiyeno. Aeba kaꞌenaba kampa maekiye. Kampaye. Kotantaga mikenaena pipa auꞌwa kampaye

⁹Pigoya, kota kampa wainta mono kinaꞌmaba Koti auꞌikibika aꞌmu peno.

¹⁰Tabe kuta wainta kinaꞌmaba: Tumima mintuwe uma abima aꞌmu peno. Piya, yao aosawama aebira puma puꞌwaisa puma puꞌwakiye.

¹¹Eya, pankamaba irosaꞌma tama muꞌmu pegina, kabuyena asa wagina, aosawampaba takuma tumima awaꞌenawapa ata puwaisa puma, tabe kuta wainta kinaꞌmaba yogawapa kampa aꞌya wantakana akapi puꞌwakiye. Wasana amiyo pukena kamanane

¹²Pigoya, kuntaena aesaga pemiꞌnaba aꞌmuntanabi mpikiye. Piya, aꞌyaꞌma amiyoꞌenawapa agasimaginaba Kotitisa eꞌwasa antota maekiye. Eya, Koti aogi utamaranti antotaꞌena aꞌyaꞌma agu kaoꞌena pota kinaꞌmipa imikiye.

¹³Pigoya, aguntaena pukena amiyoꞌenamaba ka yagara abaibekanaba, piyama: Koti nabaibegi puweba, a-seno. Pipa kampaye. Aguntaenamaba Kotipa kampa abaibegina, Kotiba to wasanaba kampa abaibuma aguntaenarapa ataye. Kampaye.

¹⁴We, taeba ka ka kinaꞌmitaba taete ntapiyena aegarakanaba inoyanta aesuma tabaibukiye.

¹⁵Piya, taete ntapiyena agaꞌe pusu puma, toma toma nkaguntaena aboragina, aguntaenamaba anosantanaba taguꞌamapa purikenaena aboramikiye.

¹⁶We, nabugai ntaoꞌmitaba, kumpariꞌena tiyobi airarikaisanaga kabiyiyo.

¹⁷Piya, aꞌyaꞌma aogiyenabe aotaꞌenabe tumemintanaba inatisaena manane. Eya, tabarempa eꞌwasa agowama otagina taetiba tumiye. Piya, aeti aꞌwae pikenaenaba kampa waintegina, ama nkaite eꞌwasa pute pukenaenaba aetiba kampa waintiye. Pipa kampaye.

¹⁸Aeba aeꞌwa ntapiyena aegaꞌma taga kamanaꞌwapa aborarameka, taeba marusa kina kanta puma mima ae aobi aꞌyaꞌma aboranta kina asu igasima aota miyeno. Kamanaꞌama nkagoba wasikenaenawe

¹⁹We, naoꞌnempitaba, aogima abiyo: Aꞌyaꞌma kinaꞌmitaba kamana abikenaenaga aseyo puma, kamana ukenaenagabe kabirakenaenagabe kunta peno.

²⁰Piya, wasanama nkamoꞌenamaba Koti nkarupuyenaba kampa aboraye.

²¹Piya, aꞌyaꞌma iꞌnintanabe aꞌyaꞌma to ataenabe kasimagiri, Koti tintabaipi kutitami kamanapa aogima kabiyiyo. Pi kamanaꞌamaba timaꞌama auꞌikenaenawe.

²²Pigoya, mono kamanataka wasima auꞌwapa aboraiyo. We, tigeba uwa abima kampa wasikibepa, amiyoꞌena puma tiyobi airarikaekibewe.

²³Piya, kaꞌwaina aeba mono kamana uwa abima kampa wasikibiꞌnaba, aeba pemontabisa taowa agaompesa pukiye.

²⁴Piya, aeꞌwa aowa agama, aꞌwae puma wakibipa, aogawakaba karuꞌena ageguꞌa pukiye.

²⁵We, aota ago kamanaꞌama aguntaenama nkigaꞌnabisaba aꞌyoba tatagina, kaꞌwaina pi kamanaꞌama nkagobi agama kampa uwa atama, aeba aogima wasima auꞌwa aborakibipa, wasikenaga aꞌmuntanabi mpikiye.

²⁶Pigoya, kaꞌwaina aeba: Monota mintuwe, yiꞌnaba, antebuwamapa kampa kiya puntapa, aeba ae agu aowawapa airarikaeyagina, monoꞌwampaba anagiyena kanta piye.

²⁷We, tabarempa Koti nkaobipa iꞌnintana kampa punta aota mono aegarakenaenaba mayamawe: Taeba kinta yagarabe abeya waepe kuntaenabi mpiyeka wama igama iyoꞌmaemagi, mampabisa iꞌnintanaba taekita puma miyeno. Piya pukubompepa, taga mponota mikune.