Read Fore Yemisi 2 Bible Online

Yemisi 2 - Fore bible

Yemisi 2

¹We, naoꞌmitaba, tigeba eꞌwasa Waꞌegare Isu Karaisititi timatiti potaꞌnagitaba, wasana intapera tumintapera ka kana puwaitaiyo.

²Piya, tigeba monota aiꞌaru piginaba, ka yagarama aeba kasaꞌena autasaenabe awaꞌenawape purite pasekana, to ka kusi yagaramaba abaraena autasaena purite asu pasekiripa,

³tigeba aogi autasaena purintaꞌnagipa: Mataꞌi kanama aogi yabaera ampiyo, omintiri, to ka kusi yagarakaba: Kaeba pagasara asima miyo, omikibewo: Tagisabi mpara miyo, omikibewo. Piya ukibepa ataenawe.

⁴Tigeba piyaena puntiripa, tiyotimpipa pako puwaitawe. We, piyaena puntiripa, tigeba agunta napiyena waintaga kina mima, kamana abima atama aꞌyiki kina kanta puma miyewe.

⁵We, nabugai ntaoꞌnempitaba, abiyo. Koti untegini, mamparasaenaga kusi pe kinaꞌmiba imatitiꞌenawaimpaba kota wainta kina kanta pumagini kabiratakenaenabi ubasikibewe. Eya, Kotiba pi kinapa uwaitantikini, igeba agu kaoꞌena potaompe kinaꞌmite nkutaratantaꞌenabi ubasikibewe.

⁶We, tigeba kusi kinaꞌmi nkigeba maete tumima ataenaba pewe. Pigoya, ae kinaꞌmi kuntaena timewe. Ae kinaꞌmi tibabuma kamana uritawe. Kota wainta kina igeba piyaba puritawe. Kusi kinapa kampaye.

⁷Piya, kota wainta kinaꞌmi igeba tiba puritanti nkagiba akayasotawe. Eya, igeba Karaisiti nkaota agiba maete tumewe.

⁸Pigoya, kabiratakenaenama nkago kamanaꞌamaba mono isapipa maya iye: Kaeka kau kabitampesa puma kagorasa kinapa agu kaoꞌena potao, iye. Pi kamana agoba wasiyigina kanarasano.

⁹Piya, tigeba wasana pako puma tabe kinaꞌamana aogi potantiripa, tigeba aguntaenaba pewe. Piya piginaba, ago kamanaꞌamaba tiguꞌamapi piyekiri, tigeba kamana akayukena kinatawe.

¹⁰Piya, kaꞌwaina aeba ka kamana aemita pipa, aꞌyaꞌma to kamana agoba aegaraginaba, Koti nkaobipa aꞌyaꞌma kamanaꞌama nkagoba aemita piye.

¹¹Piya, kumiyenaba a-po unti ntagaramaba: Wasanaba a-nkaeguyegana pureno, untiye. We, kaꞌwaina kumiyenaba kampa punta, wasana aeguma kaiyipa, aeba ago kamana akayukena yagara miye.

¹²Pigoya, aguntaenabisa akariyoba titami kamanakaba Kotiba napima aꞌyigititakiye. Pika tigeba napima aogi kamana uma aogiyena peno.

¹³Piya, antaraꞌena kampa pukibiꞌnapa Kotiba kampa antaraꞌena potama kamana otakiye. We, antaraꞌenamaba kamana otakenaenaba agaikiye. Tamatitiꞌenama nkauꞌwampantanawe

¹⁴We, naoꞌnempitaba, kaꞌwaina aeba kampa aogi yugaba puma: Namatitiꞌenayaga mintuwe, ukibipa, ayama aoꞌmaekiye, a. Amatitiꞌenawapa ayama auꞌikiye, a.

¹⁵Piya, tiyoꞌyagaramaba autasaenabe nakenabe aisaꞌma mintakanaba,

¹⁶tigepisa kaꞌwainaba: Aogima mima agoya pegana kagaꞌe pano, omintana, iꞌanape nanintabe kampa ameganaba, auꞌamaba ayamabaya aborama aoꞌmaekiye. Pipa kampaye.

¹⁷Piya puma, amatitiꞌena abiwapa waima auꞌwantaga yuga kampa aboraginaba, pi nkamatitiꞌenamaba puꞌwasu piye.

¹⁸We, ka yagarama: Kaeba kamatiti peka, naeba aogi yuga puwe, unamikiyema napiyuwe. Pigoya, naeba maya omukuwe: Kaeba ayama kamatitiꞌenamana nayakega, pabiyama aogi yuganetasa namatitiꞌenaba kayakikuwe, omukuwe.

¹⁹We, tigeba: Ka Koti mintiye, uma abegana kanarasaye. Abiyo. Kewamabeba kaga pi kamanapa abima, igeba tabaraba pewe.

²⁰We, tigeba aiboꞌena pewe. Timatitiꞌenamana puntiri auꞌwampa ntugaba kampa aborakibepa, timatitiꞌenarimpaba anamo wae kanta pukibewe. Piꞌna nkagoba tiyakisuwa, a.

²¹Piya, paipa tayabama Abaraꞌamuba aeba Koti nkawamu wasima, yagarawapa Aisakipa muta atakena arata yareri atantine. Piya pogana Kotiba yogawata agategina: Arupu yagarawe, otantine.

²²Piya, tigeba ago abewe. Amatitiꞌenabe aogi yugabe kaga puntine. Eya, amatitiꞌenawampa nkaupa yogawane.

²³Piya, paipa Abaraꞌamuba Kotiti amatiti pogana, Kotiba agama arupu potantiyema, mono isaꞌama uramiye. Pi kamanapa Abaraꞌamu yogawatasa esegi potantiye. Aibogini, wasanamiba: Aeba Koti nkaoꞌyagarawe, otantawe.

²⁴Piya, ibaba tigeba abewe. Amatitiꞌenamana nane. Amatitiꞌenama nkauꞌwapa pipa aogi yugarasa wasana arupu yagara aboraye.

²⁵Piya pumagina, kumi wae Areyabu aeba ma agakena kinapa kabiwaisitama to kiꞌi uwaisitaoginisi wantase. Piya pometaka: Arupu waene, otantiye.

²⁶Piya, auꞌama nkaumawapa kampa waintipa puꞌwaisa puma, amatitiꞌenama ntuga kampa aboraipa puꞌwasu piye.