Read Fore Yemisi 3 Bible Online

Yemisi 3 - Fore bible

Yemisi 3

¹We, naoꞌnempitaba, tigepisa mono tisa kina uwaena aborakenaga a-tibeno. Piya, tigeba ago abintawe. Aintiba Koti aeba tisa kinaꞌmitepa yogaretakaba esegima aꞌyigi tatakiye.

²Piya, aꞌyaꞌma kinaꞌmitaba kaꞌisaena antageꞌena pune. Piya, kaꞌwainaba antage kamanaꞌwapa kaꞌanto kampa yipa, aeba aota yagara mima aꞌyaꞌma auꞌwapa ubuꞌatama aogima kabiye.

³Piya, taeba osiwama nkawamupipa igaꞌna ubuꞌatama paibokana, auꞌwampaba taete ntapiyenaba wasiye.

⁴Piya, wanipisa karegegaba napiyiyo. Pipa tabena waintegina pontawama pukagina, tabe kayo wani nkakapinti waye. Piya wagina, pubasanami ntagaramaba uwaena asantora pubasanagina aewa nkwaeti aegaꞌma waye.

⁵We, pabiyamagina wasana antebuwama uwaenanto waimagina tabe kigaꞌe uma maro-u mo-u pegina anosaye. Abiyo. Uwaena yakunkantoma anosama tabe kabuba tawaeye.

⁶We, wasana antebu pipa yakune. Piya, tantebuwamaba tonarona ataenaba aborama, aꞌyaꞌma taupintiba iꞌnintana aborawaye. Piya, aꞌabibintisa yakutasa kaema aogima mpikenaenarepa tababiꞌwaye.

⁷Pigoya, wasanamiba igeba tonarona umugababe kabarape kuyape wanipintisa kinape kabima mima kayone puwaitakena puntiniba, kayone puwaitama imentapinti me nkitawe.

⁸Piya, ka yagaramaba antebuwamapa kampa kabima mima mabi atakana, amentapintiba kampa waikiye. Kampaye. We, wasana aeguma kaikena tusaena pumaema waintegina, tantebuwamaba aꞌyaꞌma yaga aogama ata piye.

⁹Piya, tanteburasaba Waꞌega tabarempa nkageba uma asagayumagi, aꞌwae puma wasanaba pumirere puwaitaune. We, wasanaba Koti nkaoga kanta puma aborantiye.

¹⁰Piya, ka tawamupisa taꞌmu kamanape tamo kamanape irosase. We, naoꞌmitaba, aꞌyugu piyaena pusanagawe.

¹¹Eya, ka aukaꞌisa aogi nakena wanipe asa wanipe kaga irosasa, a.

¹²We, naoꞌmitaba, piki yawamaba kanara oripi yamankapa aekiya, a. Waini igaꞌnawamaba piki yamankapa aekiya, a. Pipa kampaye. Piyama asa wanipisaba aogi wanipa kampa maekune. Piyama, aꞌyugu tantebuwama tara aborasanagawe. Aogi napiyenaba Kotitisa tumiye

¹³Pigoya, tigetiba kebaya aogi napiyenaba abintiye. Piya, aogima abemi ntagarama aogi napiyenawatasa agoya puma aogima mpikenaenawampa nkauꞌwapa aborano.

¹⁴Piya, tigeba to kinakaba tintawamaba tikintaꞌyaga mima, tigeri mpaete asu igaikenaga napimagiripa: Naeba monota aogima mpiyuweba, a-siyo. Aꞌyugu tagantanaga untiri, mikenaenaripa kumpariyena pukibewe.

¹⁵Piya, pi ntapiyenaba mantabintisaba kampa tumiye. Kampaye. Pipa mampabisa, paisaenabisa, kewamapisawe.

¹⁶Piya, wasanamiba intawamaba ikintaꞌyaga mima igewai maete asu igaikena pepa, ige pako pikenaena aboragini tonarona ataenaba pewe.

¹⁷We, inatisa napiyenaba aotane. Piya, kaꞌwaina inatisa napiyena maentanaba, maruꞌenaba napiyenawampaba narentare pegina, aintiba wasanage kayone puma pasema mima, to kinaꞌmi kamanapa abima, antaraꞌena puma, monoꞌamaka kampa tara agiba napima agoꞌenaba kampa puma auꞌwapa aogima aboraye.

¹⁸Piya, paru kinaꞌmiba paruyenabisa ainkapa kurigina arupu nakena aborakiye.