Read Fore 1 Pita 1 Bible Online

1 Pita 1 - Fore bible

1 Pita 1

¹Nae Pita, Isu Karaisiti nkaposoro yagarawa ntawe. Piya, tigepa kamaena puritama tigarubauguri maripa kaitegiri, Pontasi maribe, Karesiya maribe, Kapatosiya maribe, Esiya maribe, Pitiniya maribe uminta kinaꞌmititi, ma nkisapa kaeyuwe.

²Piya, taba Koti utaritaogiri aeꞌwantana aborantane. Aeba yogana Awamusaꞌamaba: Isu Karaisiti kamana wasima korankatasa aeguse puma paititaiyoma, utaritama aota puritantine. Piya, tigetiba awagaenabe paruyenabe waiyabaꞌmita iyeno. Koti nkeꞌwasaenamaba mantabinti taobi piye

³Pigoya, Isu Karaisiti Waꞌegarempa nkaba Koti, ae agegaꞌe asagayuyeno. Piya, aeba tabera antara puratama, Isu Karaisiti purintapisa asitanti ntugarasa waiyaba kumaka aobi piyoma, taumarepa kasaꞌena yakari puratantiye.

⁴Piya, pi maekubompe kumapa kampa abararama, kampa ataena puma, paisa kantaba kampa pukiye. Piya, Kotiba pi kumapa taeꞌena taobi puma kabirataye.

⁵Piya, taeba Kotiti tamatiti pompeka esegiyenawatasa kabirataye. Eya, agogo yaga wasanami nkiyobi tauꞌikibika kabirataye.

⁶Tigeba pika tiꞌmu piyo. We, mampara tonarona makaga makaga pekana tikinaki pukibintanaba uwaena yaganto aꞌya wakiye.

⁷Piya, kori yabapa mampabisaenawe. Pipa wasanama yakupi kaema iꞌninkapa aeyobaꞌma agowapa aboramisa puma, kuntaenaripa timatitiꞌenama nkagoripa aborarimiye. We, timatitiꞌenarimpaba koriba asugasaye. Piya, Isu Karaisiti aborakibi ntagaba pika tigegaꞌe maete ima asagayuma aꞌmu puritakiye. Pika ibanto kuntaenaripa aboraye.

⁸Piya, tigeba Isu nkaowarapa kampa aganta, agu kaoꞌena potawe. Kampa aganta, timatiti potamagiri agasiyama tiꞌmu potawe. Pi tiꞌmuntanamaba tiwamupisaba kampa asugasawe. Kampaye. Aeba tabera asugaintiye.

⁹Piya, timatitiꞌenarimpa nkauꞌwapa pipa timankama nkiꞌikenaenawe.

¹⁰Pigoya, paipa poropete kinaꞌmiba awagaena aborarimikibi ntanagaba uma aborantane. Pi nkagoba napimagini: Ayamabaya iꞌikiyema, napima mare-u me-u puntane.

¹¹Piya, Karaisiti Nkawamusaꞌama intabaipinti mintogini, igeba Karaisiti kuntaena aesaga pukenaenawakabe ainti age asagayukenaenagabe uma aborantane. Aboramagini, pi poropete kinaꞌmiba: Aya yagarabaya, ayantagabaya pi nkauꞌwapa aborakiyema, napima mare-u me-u puntane.

¹²Pigoya, igeti wanane. Tigeti kayokayaꞌena puntaka Kotiba tayakikiye, piya uma Kotiba aborawaimintiye. Piya, ainti Kotiba otaogana Aota Awamusaꞌama mantabintisa tumintika, wasanamiba ae esegiyenawatasa aogi kamanaꞌama nkagoba uma aborarimewe. We, pi kamanaꞌama nkagoba enisore kinaꞌmiba kaga abisanaga ibiye. Kotiba aota miyiyoma tagegaꞌe iye

¹³Pigoya, pika tigeba napiyenarimpapa tibamu kantiba kimagiri paebuma mima aogima kabiyiyo. Eya, Isu Karaisiti irosakibi ntagaba awagaena aborarimikibi ntanaga napima tabarababa a-puma aogima kabiyiyo.

¹⁴Tigeba inamu ntagarama aba kamana wasiyisa puma, Koti kamanapa wasiyiyo. Paipa kampa napiyenaba waintogiri, tigu iꞌnintana puntasa puma, ibaba pi kipa toba a-nkaꞌwae puma aegaraiyo. Kampaye.

¹⁵Tigeba tigegaꞌe uma tiba punti Ntagarama aota miyisa puma, pabiyama aꞌyaꞌma nasikenaenarintaga aota miyiyo.

¹⁶Pika mono isaꞌamaba maya iye: Naeba aota miyoka, tigeba pabiyama aota miyiyo, piya untiye, iye. Tabe ikankatasa taba puratantiye

¹⁷Pigoya, Kotiba intakabe tumintakabe kampa napinta yogaretaka taga aꞌyigitatagiri, tigeba aeka: Tabarempawe, yewe. We, tigeba ae agoga aogima napima, aekaba tiyekuru puma mima mampara arupu kita nasiyiyo. Piya, tige ma agoba kampaye.

¹⁸We, tigeba ago abintawe. Tiyabamagiba ata ki uwa aegaꞌma mintuguri, tigegeba kaga pabiya puntawe. Pigoya, pi kitasa Kotiba ika puritantine. Aeba mampabisaena, kori, siribarasa wanane.

¹⁹Aeba Karaisiti kurapa inta ikatasa ika puritantine. Eya, Karaisitipa sipisipi awaro kanta puma aegugasuguna, ka ataena au airisaꞌenawapa kampa waintaꞌyaga, tigeka puꞌwantiye.

²⁰Piya, paipa Koti maba kampa punta, Karaisitipa pi ntugaraka otantine. Ainti kana nagarikena pekana, tige tiyoꞌmaekena mabipa aborantine.

²¹Piya, aeꞌwa ntugarasa tigeba Kotitiba timatiti pewe. Eya, Kotiba Karaisitipa purintapisa asitama tabe agigaꞌeba amintika, tigeba Kotitiba timatiti puntiri, aeti atokaekenaga aobi pewe. Monoꞌama tabage puntiye

²²Piya, tigeba taga kamanapa wasikenaenarasa tiguꞌamapa narentare puma, mono kinaꞌmipa taga agu kaoꞌena puwaitawe. Pigoya, tigeba tintabaipisa tiyoꞌmipa agu kaoꞌenaba esegima puwaitaiyo.

²³Tigeba mampabisa abara yamankatasa wanane. Waiyabaꞌenarasa kasa kina aboraritantine. Eya, Koti kamana, aoso sima waiyaba kamanatasa aboraritantine.

²⁴Pika mono isaꞌamaba maya iye:Aꞌyaꞌma wasanamiba kabuyena kanta pegana, iwaꞌenawaimpaba kabuyenama nkaosa kanta piye, iye.Piya, kabuyenaba asa wagina, aosawampaba aibarara puwaye, iye.

²⁵Pigoya, Waꞌegawama kamanapa waiyabane, iye. Piya, pi kamanapa uriminta aogi mono kamanane.