Read Fore 1 Pita 2 Bible Online

1 Pita 2 - Fore bible

1 Pita 2

¹Piya, tigeba aꞌyaꞌma ata puwaitakenaenabe, aꞌyaꞌma agoꞌenabe kumpariꞌenabe to waina mparuta mikenaenabe, aꞌyaꞌma akaya kamanape kasiyo.

²Tigeba kasa inamumpi nonoka ibisa puma, tigu tiyoꞌmaekena taga ntunukaba tibeno. Eya, tigeba Waꞌegawama kayonenawapa nabigama tima kagagana iga piya, tiꞌikenaena anosasanaga tibeno.

⁴We, tigeba Waꞌegawamati ampiyiyo. Aeba aogaso sima waiyabaꞌena wantaga yabane. Piya, wasanamiba ataena piyema napima kasapa, Koti otaogana ae aobipa aogi puma inta ika mpintiye. Aeti ampima atokaeyiyo.

⁵Piya, tigeba aogaso sima waiyaba yaba kanta puma mimagiri, amato puma Awamusaꞌama ntamantana puma miyiyo. Eya, tigeba aota tabe mono kina kanta puma mima, tigupa muta atasu piyo. Tigeba piya pigina, Kotiba Isu Karaisitika napekana pi mputaꞌenagaba kanarasakiye.

⁶Pikaba mono isaꞌamaba maya iye:Abiyo. Naeba ka inta ikantaga yabaka otauwe, iye.Pi ntabantama esegi potakena yabapa, Saiyoni kumantepintiba arabama arupu pukena puwe, iye.Piya pekana, wasanama aeti amatiti pukibemipa, anintanaba kampa waikiye, untiye, iye.

⁷Piya, timatiti pe kinaꞌmititiba, Karaisitiba inta ikane. We, kampa imatiti pe kinaꞌmitiba Karaisitikaba maya iye:Pi ntabapa yoga kinaꞌmi maegasa ntabapa, ibaba arupu pukena aiꞌne yabapa aboraye, iye.

⁸Eya, wasanami nkigisa aimisagakena yabantana pukiye, iye.Tabe yabankamaba ipasanakini wareꞌnakibewe, iye. Piya, igeba Koti kamanapa akayuyiginaba, pi kamanaꞌamaba igisaba aimisagakini wareꞌnakibewema, Kotiba paipa piya uwaitantine. Taeba Koti tuntanamana puma miyune

⁹Pigoya, Kotiba ago uritantegiri, tigeba ae taga tunka mpiyewe. Tigeba Waꞌegawama mpono kiye kinaꞌwa mpiyewe. Tigeba ka kinaꞌena puma aota kina miyewe. Tigeba Koti nkaokinatakaꞌya mpiyewe. Piya, tununtanabisa tiba puma aogi eꞌwasaenawapi apaititanti ntagarama nkaogi yugawaka awaga yiyoma, aokina tiba puntine.

¹⁰Piya, paipa tigeba uwa kina mintantapa, ibaba Koti tuntana puma mintawe. Paipa tigeba Koti nkantaraꞌenawapi kampa mintantapa, ibaba antaraꞌenabi ago ampintawe. Tigeba Koti ntuga kina miyiyo

¹¹We, nabugai kinaꞌmitaba, tigeba to marisa kina kanta puma mima, mampabipa uwaena yaganto mikena kinatawe. Piya, naeba mayama urimekiri abiyo: Arirasa iꞌnintanamaba timawamapa maꞌena potamipa, tigeba tikabitaiyo.

¹²Tigeba to marisa kinaꞌmi nkikapinti aogima ntasiyo. Piya, igeba kamparaga kamana uritapa, aogi yugaripa agama, aintiba Koti nkago igeti aborakibi ntagaba ae agegaꞌeba asagayukibewe.

¹³Tigeba Waꞌegawamaka napi napi puma aꞌyaꞌma ima minta kinaꞌmi imentapinti miyiyo. Eya, wasana waꞌega yagara asugasima mintiꞌna aepa,

¹⁴ae uwaitanti kabirata kamani kinaꞌmipeba imentapinti miyiyo. Piya, igeba ataena pe kinaꞌmipa ika nkimintini, arupuyena pe kinaꞌmi nkigegaꞌe asagayukena yuga pewe.

¹⁵Piya, Kotiba piya pusanaga abiye: Tigeba arupu yugaritasa kampa abima aibo kinaꞌmi nkiwamupa akunisanaga abiye.

¹⁶Pigoya, Kotiba igaꞌnabisa akariyobatitantisa puma pabiya puma miyiyo. We, tigeba: Uwa kina miyune, umagiripa, karuꞌena aꞌwae puma ataenaba a-piyo. Kampaye. Tigeba Koti kayokaya kinaꞌena puma miyiyo.

¹⁷Tigeba aꞌyaꞌma kinaꞌmi nkigegaꞌeba asagayuyiyo. Mono tiyoꞌmipa agu kaoꞌena puwaitaiyo. Kotikaba tiyekuru piyo. Wasana waꞌegawama nkagegaꞌe asagayuyiyo. Taeba Karaisiti kisagaꞌma tauki nakiyena maekune

¹⁸We, kayokaya kinaꞌmitaba, tigeba kabiritaꞌnagikaba tiyekuru puma imentanti aogima miyiyo. Kayonena puma paebuma miye kinaꞌmi ibiwanane. Tigeba atama kabirita kinake kaga imentanti miyiyo.

¹⁹Piya, igeba tiki nakiyenaba uwa timigiripa, tigeba Kotitiba napimagiri pi tiki nakiyenaba aesagabikibepa, Kotiba aꞌmu puritakiye.

²⁰Piya, tigeba aguntaena pigini tiyeguyigiripa, uwa itaiginaba, ke abekana kanarasakiye, a. We, tigeba arupuyena pigini, pika tiki nakiyena puma ata puritaigiripa, uwa itaiginaba, Kotiba pikaba aꞌmu puritakiye.

²¹Piya pukibeka Kotiba utaritantine. Eya, Karaisitiba tigeka auki naki puma paitaritantine. Pika tigeba aekisa aegaraiyo.

²²Aeba aguntaenaba kapa kampa pogana, agoꞌenaba ae awamupisa kapa kampa aborantine.

²³Igeba akayasotaugunaba, antotapa kampa akaya puwaitantine. Auki nakiyena maentanaba, antotapa kampa kaba ibirantine. Kampaye. Aeba inatisa taga aꞌyigitatakena yagaramati arupuyenawaka ayapa atantine.

²⁴Piya, aeꞌwa nkautasa aguntaenarepa aesagaꞌma maripo yarapa puꞌwantine. Eya, taeba aguntaenareti puꞌwama arupuyenara taogakubompeka puꞌwantine. Piya, auꞌarisantaꞌenawampa kamparagaenarepa maeragasima kaba tatantiye.

²⁵Eya, paipa tigeba sipisipi yaga kanta puma asorisari puma mintantawe. We, ibaba sipisipira kabikena yagara, timata kabiyemiꞌnati, aꞌwae puma ampintawe.