Read Fore 1 Pita 4 Bible Online

1 Pita 4 - Fore bible

1 Pita 4

¹Pigoya, Karaisitiba aeꞌwa nkauꞌwata auki nakiyena maentika, pika napiyisa puma tigeba napiyiyo. Piya, wasanamaba auꞌwata auki nakiyena maeyamipa, aguntaena pusanagaba kampa napiye.

²Piya pumagina, aeꞌwa nkau mampabi waikena pekanaba, aeba wasanami nkiꞌni ntapiyenaba kampa aegaꞌma, aeba Koti nkabemintanaba wasima miyeno.

³We, paipa tigeba to marisa kinaꞌmi nkibugaintanara nasisu pumagiri, kumiyena puma, tiguꞌamapa iꞌnintana potamagiri, esegi wani ntama aiboꞌnabo pumagiri, ata patiyena puma, aiboꞌena pumagiri, kamana akayuma ama kotintana aegarantapa, ibaba aꞌya wakiripa ataiyo.

⁴Piya, tigeba pi nkagasiya kamparagaena pukenagaba kampa igetiba uma atokaeyaginiba, pika igeba ata pami puma kamparaga puritawe.

⁵We, aintiba puꞌwanta kinape taogantompe kinape kamanatepa uma aꞌyigitatakena yagaramati igeba igeꞌwai nkagowaipa aborakibewe.

⁶We, paipa puꞌwanta kinaꞌmi nkaꞌyigitakenaraka puꞌwanta kinaꞌmitiba uma aogi kamanapa aborantine. Eya, igeba aꞌyaꞌma kina pesa puma igeꞌwai nkitasa antotaꞌenaba maema puꞌwantapa, Koti miyisa puma misanaga imawaimpaba kamanapa aborantine. Koti nkesegiyenarasa aogi yuga puma tiyoꞌena piyo

⁷Pigoya, aꞌyaꞌmaena nagarikena kanapa pabigo arosaye. Piyama, tigeba aogima ntapima, nunamu ukenaraka asoyaena piyo.

⁸Tigeba tiyoꞌmi agu kaoꞌena puwaitakenaenaba aogima upebe puyaba miyiyo. Pintanamaba tonaba agasaye. Piya, agu kaoꞌena potakenaenamaba agasima uwoma aguntaenaba airari kaeye.

⁹Tigeba tiyekitaenaba a-pumagiri, tiyoꞌmipa aogima maruntana puma kabiwaitaiyo.

¹⁰Kotiba awagaenawapisa tonarona aꞌmuntanaba ka ka kinaꞌmiti timegiripa, a-kakatama, pitasa aogi mono yuga puma tiyoꞌmipa iyoꞌmaeyiyo.

¹¹Piya, kaꞌwainaba kamana uma aborakibipa, pipa Koti nkawaga kamana uma aborano. To kaꞌwainaba wasana aoꞌmaekibipa, pipa Koti nkamemi nkesegiyenarasa aoꞌmaeyano. Eya, aꞌyaꞌmaenagaba Isu Karaisiti ntugarasa Koti nkagigaꞌe asagayukenagaba aogi yuga piyo. We, eꞌwasaenabe esegiyenabe aꞌyaꞌma yaga aeti waiyabane. Tagane. Karaisitikaba tauki nakiyena maekune

¹²We, nabugai ntaoꞌmitaba, tigetiba yaku tasu puma timiyoꞌena pukenaenaba aborakiye. Piya, kasaꞌena wanane. Pipa tige agoripa aogima aborakena piye. A-pami piyo.

¹³Piya, tigeba Karaisiti nkauki nakiyenaba kaga maema aesaga peka tiꞌmu piyo. Eya, aintiba eꞌwasaenawapa aborakiripa, tigeba to ka tinta asoyaena puma tiꞌmu pukibewe.

¹⁴Tigeba Karaisiti nkagera iyekita puritaigiripa, Koti akayona puritakiye. We, eꞌwasaenama Nkawamusa, Koti Nkawamusaꞌama tigeti ago miya, tiꞌmu piyo.

¹⁵Pigoya, tige tikapisa kaꞌwainati auki nakiyena aborakibipa, aꞌyugu wasanama aeguntaꞌenarasawo, kuntanarasawo, ataenawatasawo, to waina ntanari ara agata nasikibi ntanarasawoma aborakiye. Piya puta nasekiniba igeba antotaꞌenawapa taga aboramikibewe.

¹⁶We, ka yagarama Karaisiti nkaegarakenaga auki nakiyena maentanaba, aeba anipa a-peno. Aeba Karaisiti nkaegarakenagaba napima Koti nkage asagayuyeno.

¹⁷Pigoya, Koti utaratakena yagaba agarosagina, marupa Koti nkaokinaꞌmiteti kamanapa aborakiye. We, taete nkagoba marupa aboragaitegina, Koti kamana akayuye kinaꞌmitiba ayabaya puma aꞌya pukiye.

¹⁸Pika mono isaꞌamaba maya iye:Arupu kina iꞌikenaba kunta pikana, Koti ikabitate aguntaena pe kinaꞌmiba ae nkaukaꞌibaya mikibewe, a, piya iye.

¹⁹Piya pegini, wasamiba Koti nkabemika iki nakiyenaba maeyapa, aogiyena puma aꞌyaꞌmaena aboratanti ntagarama nkayapi imawaipa ataigina, aeba tagantana puma kabiritano.