Read Fore 2 PitA 1 Bible Online

2 PitA 1 - Fore bible

2 PitA 1

¹Nae Saimoni Pita, Isu Karaisiti nkaposoro, kayokaya yagarawa ntawe. Piya, taege kaꞌmasa puma timatitiꞌena aogima maeya kinaꞌmititi ma nkisapa kaeyuwe. Piya, Kotirepe, tauꞌikena yagara Isu Karaisitibe, isigetisa arupuyenama tamatitiꞌenaba tabe ikatasa kaga maentompene.

²Piya, Kotike Waꞌegare Isuke, tigeba agowaisipa aogima abigina, awagaenabe paruyenabe tigeti anosama aborarimeno. Monoꞌama nkauꞌwa aboratawama miyiyo

³Pigoya, Kotiba aeꞌwa nkeꞌwasaenabipe aogiyenawapipe: Ubasiyoma, tagegaꞌe yoga, abima ubasintompeka aeba mantarasa esegiyenawatasa aꞌyaꞌma Koti kanta puma mikenaenarepa tamiye.

⁴Piya, utaratanti ntanaba asugasima tabe ika kanta pegina agowapisaba tamiye. We, wasanami nkiꞌni ntapiyenabisa mampabisa uwoma kamparagaena waintipisa tiyegaka kanamagiri mantarasa eꞌwasabi ubasiyoma, utaratama agowapisaba taoꞌmaeye.

⁵We, tigeba pika napiyiyo. Tigeba timatitiꞌenarita aogi yugaba puma amato piyo. Aogi yugarita taga nkabibebe puma amato piyo.

⁶Taga nkabikenaenarita titipa kabima mima amato piyo. Titipa kabima mikenaenarita esegima asima amato piyo. Esegima asikenaenarita Koti kanta puma aota mima amato piyo.

⁷Koti kanta puma aota mikenaenarita tiyoꞌena puma amato piyo. Tiyoꞌena puma mikenaenarita agu kaoꞌena puma amato piyo.

⁸Piya, pintanaba tigeti waima aborawaeyakanaba, anagiyena wanane. Tigeba Waꞌegare Isu Karaisiti nkagoba aogima abima, mono yugaba taga pumagiri auꞌwapa aogima aborakibewe.

⁹Pigoya, kaꞌwaina piyaena kampa aeti waintiꞌnaba aeba pagasari kampa agama aorika kina kanta piye. Tagane. Aeba Koti paisa aguntaenawapa kaintikaba ago ageguꞌa puntiye.

¹⁰We, naoꞌmitaba, Koti utaritama tiba puntintana esegi potakenaraka mono auꞌwapa aogima aboraiyo. Tibega piya pukibepa, kampa wareꞌnakibewe.

¹¹Piya, tigeba pintana aegarakibepa, waiyaba kumati ubasikena kabiba tigeti aꞌwaiyekiri, tigeba tiꞌmuntanayaga ubasikibewe. Eya, Waꞌegare tauꞌikena yagara Isu Karaisiti kabiratakena kumati ubasikibewe.

¹²Pigoya, tigeba taga kamanapa ago maema esegi puma asimagiri, pintanama nkagoba abintawe. Kanarane. Asi nasiba to ka urimekiri, pika napiyiyomawe.

¹³Piya, naeba ma ntauꞌyaga mima asi nasi ma kamanapa urimekiri napiyiomawema napiyopa kanaraꞌenawe.

¹⁴Piya, naeba uwaena yaganto nauꞌnepa kaikuwema, Waꞌegare Isu Karaisiti unamintegi abintone. Pika napima asi nasiba kamana urimuwe.

¹⁵Toganaba naeba mampa kaikubopa, tigeba pi kamanapa aꞌyaꞌma yagaba aogima napiyiyoma, esa kaerimukuwe. Pita aeba Karaisiti nkagoba agantiye

¹⁶Pigoya, taeba paisa kinaꞌmi napinta nkamani kamana nane. Taeba Waꞌegare Isu Karaisiti nkeꞌwasaenawapa taorepisa agantompeka esegiyenawatasa aborakibi kamana urimintogiri abintane.

¹⁷Eya, amuta Koti tababa tabe agigaꞌe amima asagayumagina, pi asugasima eꞌwasa Kotiba yegina maya kamanapa Isuti tumintiye: Pi ntagara aeba nabugai ntagaranene. Aekaba tabera naꞌmu potauwe, untiye.

¹⁸Piya yoga, taeba aege aota amuta mintuwakana, pi kamana mantabintisa tumoga abintompene.

¹⁹Piya, taeba poropete kinaꞌmi kamanaꞌama nkauꞌwapa aogima agaune. Pika tigeba aogima upebe pigina kanarasano. Piya, eꞌama tununtanabinti araisa puma, poropete kinaꞌmi kamanapa kaꞌisaenaba aogima aboraye. We, tintabaipinti abayasa noriwamaba asiyekana taga marekiripa, kamanaꞌama nkagowapa aogima agakibewe.

²⁰Pigoya, tigeba maruꞌenaba pika abiyo: Poropete kinaꞌmi kamana mono isapi wainti, piꞌna nkagowapa kaꞌwainaba aeꞌwa ntapiyenabisaba kampa aboraye. Kampaye.

²¹Piya, poropete kinaꞌmi kamanaꞌamaba wasanami ntapiyenabisa wanane. Aota Awamusaꞌama uwaitantegini wasanamiba Koti nkawamupa uma aborantane.