Read Fore 2 PitA 2 Bible Online

2 PitA 2 - Fore bible

2 PitA 2

¹We, paipa kumpari poropete kinaꞌmiba Isureyo kinaꞌmi nkikapi asintasa puma, kumpari mono tisa kinaꞌmiba tige tikapipa asikibewe. Asimagini, igeba kakama toma toma kumpari mono kamana tikapinti maete kanama atararitakena pewe. We, ika puma ibabunti Waꞌegawamapa igeba ikabitamagini igewai nkigupa ata puwaitaigina igaikiye.

²Igeba piya pigini, uwaena kinaꞌmiba iꞌni mpikenaenawaipa aegaꞌma ataena pukibewe. Piya pigini, wasanamiba agama taga kiꞌamakaba akayasotakibewe.

³Pigoya, pi kumpari kinaꞌmiba mampabisaena ibugai kina mimagini, kumpari kamana uma kotatipa paibikibewe. We, paitakaꞌya Kotiba kamanapa uritakuwe, untemipa, kampa kaintiye. Eya, igaikibemi ntagaramaba kampa auwaita mintantiye. Pipa kampaye.

⁴We, Koti nkagoba agaune. Piya, paipa kaꞌisa enisore kinaꞌmiba aguntaena pugunaba, Kotiba uwaba kampa itantine. Kampaye. Aeba igaꞌna puwaitantegini igeba tunusuwanta kabinti miyegana, antotaꞌena imikena yagaga igaꞌna puwaitantine.

⁵Piya, paipa mampabi miyume kinaꞌmiba igeba ikabitauguna, aeba uwaba kampa itantine. Kampaye. Aeba tabe wanitasa ipaikaintegini puꞌwaewantane. Piya, Nowa aeba arupuyenama nkago uma aboranti ntagarabe tonaentisa tarumaema aokinape Kotiba kabiyogini aogima miyuguni aꞌyaꞌma to kaꞌisa puꞌwaewantane.

⁶Piya, Sotomu kumatasa kinaꞌmibe Komora kumatasa kinaꞌmibe ataena puguna, Kotiba igama antotapa pi tabe kuma taraba taraba yakutasa kaegasogana kaguꞌamana waitantine. Eya, aintiba pika ikabitakibe kinaꞌmiba abima igeꞌwai nkantotaꞌena maekibeka napikibewema, Kotiba piya puntine.

⁷Piya, Kotiba arupu yagara Arotipa aba purogana, aeba kampa tabatintiye. Piya, Arotiba kumiyena pumekaba tabera kunta abuntiye.

⁸Eya, pi arupu yagara ikapi mpima, ige puntantana agama kamanaꞌwaipa abintiye. Piya, igeba akakaꞌyoꞌnaꞌnaenawaipa aborauguna asi nasiba igaogana, arupu antawamaba tabera pami puntiye.

⁹We, Waꞌegawamaba abintiye. Ae aegara kinaꞌmipa imiyoꞌenabisa iba pukenaba aeba agantiye. Ata pe kinaꞌmipa antotaꞌena imikena yagaga iki naki igaꞌna puwaitakenaba agantiye.

¹⁰We, aeba agasiyaena iꞌnintana potakena kumiyena puma kamana akayuye kinaꞌmipa igaꞌna puwaitakenaba aogima agantiye. Piya pe kinaꞌmiba igebigoꞌena puma igeꞌwaintana aegaꞌma kampa iyekuruba puma inatisa eꞌwasaenayaga kinakaba ikayasuwaitawe.

¹¹Aibegini, enisore kinaꞌmiba pi kinaꞌmi nkesegiyenaba igaintini, pigoyemagini igeba kampa ikayasuwaitama Waꞌegawama nkaobipa kamanapa kampa uwaitawe.

¹²Piya, pi kinaꞌmiba igeba kabu yaga kanta puma aborawe. Pi ata yaga irakuꞌma iyegukenaba maꞌataisa puma, igeba ago kampa agantantanagaba akayasekana kaga iyeguma kaikiye.

¹³Eya, igeba tonarona ataena pegini, igepa antota ataena puwaitawe. We, igeba arantita tikapi kamparagaena puma pika iꞌmu pewe. Igeba iꞌnintana tamakaema araꞌena puma abuyasa pisa puntini, tigege kaga tiꞌmuntana namagini timiyo pukenaga iꞌmupa pewe.

¹⁴Iyobintiba kumiyena pumaeyagina, aguntaena pikenaenamaba kampa igaꞌe paye. Kampaye. Igeba tara igi napiye kinaꞌmipa ibaibumagini, mabisaena ibugaintanama nkagowapa agawaeyawe. We, igeba aꞌabibi nkaesakena kinane.

¹⁵Igeba arupu kipa ikabitategini, antageꞌenaba pewe. Aibegana, Peyo ntagara Peramu aeba ataena pometasa ika mpaekenaga abugantisa puma, pi kiꞌi aegarawe.

¹⁶Piya, Peramu aeba aiboꞌena pogana, tonki yaga, kamana kampa unta kinaꞌmaba wasanama usu pumagina: Aꞌa-o, uma kabiꞌma, pi poropete yagarama nkaiboꞌena potakena pomentanaba akunkatantiye.

¹⁷Pigoya, pi kumpari mono kinaꞌmiba igeba mabintisa nabai nami wani tagankwamisa puma miyewe. Igeba esibawama ibina mpanta agarubagina, wagasa pisa puma miyewe. We, aꞌabibisa tununtanaba igeti itaye.

¹⁸Piya, igeba igebigoꞌena puma aiboꞌenawaipa tabera aborama kampa inipa pewe. Piya pumagini, igeba iꞌamantana puma iꞌni kumiyena pukenarasa wasanaba imiyoꞌena puwaitama, ataena pe kinaꞌmi nkaiꞌaruyenabisa iyegaka wama monota inamu kanta pe kinapa, igeba paibuma miyewe.

¹⁹Piya, igeba: Igaꞌna kampa punta tae kanta puma uwa miyiyo, uwaimewe. Uwaimimagini, igewaipa kamparagaenara igaꞌnabi mpiyewe. Piyama, kaꞌenama wasana asugasaginaba, pi ntagaramaba amentapinti igaꞌnabi miye.

²⁰Tagane. Igeba tauꞌikena yagara Waꞌegare Isu Karaisiti nkagoba aogima abima aegaꞌmagini, mampabisa iꞌnintanabisa iyegaka wantawe. We, igeba to aꞌwae puma iꞌnintanabi ubasegina, to irakuꞌma igaꞌna puwaitaginaba, mikenaenawaipa tabera ata puwaitaye. Eya, maru iꞌni kina mintantapa ata maru mpintantane. We, igeba aꞌwae pepa, ainti mikenaenawaipa tabera asugasima ata marunkaipa to awametane.

²¹Piya, piya pe kinaꞌmiba arupuyenama kikaba aiboꞌena puma kampa aegarantasinta, igeba ataba puntasine. We, pi kita aegarantaꞌnagiba to aꞌwae puma Koti nkaota uwaiminti kamanapa ikabitapa, ige ataenaba to awametane.

²²Piya kinaꞌmitiba maya kamana umarantapa esegi piye: Karawamaba naninta nagaitegina muyena pumagina, to aꞌwae puma naye, iye. Piya, yagaba wani paiꞌataginaba, pabiyama to aꞌwae puma auba pasiye, iye.