Read Fore 2 PitA 3 Bible Online

2 PitA 3 - Fore bible

2 PitA 3

¹We, nabugai ntaoꞌmitaba, ma nkisa kaeyogana taraena piye. Naeba tigutipa abage pekana to kanara abibebe pukibeka, tara isa kaema timuwe.

²Piya, aota poropete kinaꞌmiba ainti aborakibi kamanapa untana, aogima abiyo. Pigoya, tauꞌikena yagara Waꞌegawamaba uwaitaogini, aposororimpiba ae awamu wasimagini ae kamanapa untana, aogima abiyo.

³Pigoya, aꞌyaꞌma kinaꞌmitaba, tigeba maruꞌenaba abiyo: Agogo yaga karana pukena kinaꞌmiba aborama iꞌni ntapiyenawaipa aegaꞌma amiyo kamana uma,

⁴maya ukibewe: Waꞌega kanakiye, untapa, auꞌwapa aempaye, umagini: Tayabamagi Waꞌegawama kanama arupu pukena kamana untapa, puꞌwauguna, pai Koti pumarantintanaba antota kampa tonarona punta uwa mirite kanantiye, ukibewe.

⁵We, igeba maya kamanapa abitegini kaiyawe: Paitakaꞌya Koti yogana mantaba aborama waintogana, waninkama meki menkaki puma maba wanitasa aborama waintantine.

⁶Piya, Koti yogana, tabe wanitasa aboranti mpaba aerari kaeyogini aꞌyaꞌma kinapa puꞌwaewantawe.

⁷Eya, Koti aeꞌwa kamana yogana, aboranti mpantabe mabe yaku kaekenaga uwaisitantine. Piya, ibaba Kotiba mantabe mabe kabima mima aobi pumagina, ae ikabita kinaꞌmi kamana uwaitama kaikena yagaba kaegaikiye. Pika aiboꞌena puma kasawe.

⁸We, nabugai ntaoꞌmitaba, tigeba ma kamanapa abima aibopa a-piyo. Waꞌegawama nkaobipa uwaena kabuwamaba ka yaga kanta pegina, to ka yagaba uwaena kabu kanta piye.

⁹Piya, kaꞌisa kinaꞌmiba: Waꞌegawama pase puma migarayema, napiyewe. Pipa kumparine. Waꞌegawamaba aeba kampa pase pase puma mima, utaratanti kamanaꞌwapa kampa uwa ataye. Kampaye. Aeba tigeka napimagina, kaꞌwaina kakasanagaba kampa abegina, aꞌyaꞌma kinapa: Tigupa aꞌwae piyo, umagina, tigeka ibaba paebuma miye. Mabe mantabe aꞌya wakana kasaꞌena aborakiye

¹⁰Pigoya, Waꞌegawama kanapa ku kinaꞌmi pesa puma aborakiye. Pi ntagaba mantawamaba tapo uma aꞌya wakana, aꞌyaꞌwaemaenama nkagoba yaku tawakana kaguꞌena pekana, mabe aꞌyaꞌma mara pumarantaꞌenabeba kaga yaku tawaewakiye.

¹¹We, pintanaba piyama aꞌya wakiripa, tigeba to awameta mima, aota kina mima Koti kanta puma miyiyo.

¹²Eya, tigeba Koti kanaka tibugakiri kabima miyiyo. Piya, pi ntaga mantaba yaku tama aꞌya wakana, aꞌyaꞌwaemaenama nkagoba tawaewakana kaguꞌena pekiri, pika to awameta miyiyo.

¹³We, Kotiba kasa mantabe kasa mabe aborakana, pita arupuyenawampaba pumaewakiye. Pika utaratantegi, kabima mima aobi pune. Taeba Waꞌegawamati anosano

¹⁴We, nabugai ntaoꞌmitaba, pintanagaba aogima kabima mima aobi peka, esegima yogaba puma mima kaꞌena ataenabe kamparagaenabe a-puma, paruyenabi miyigina, aeba tigakiri aogima miyiyo.

¹⁵Piya, Waꞌegawamaba taeti pasema miye. We, aeba tauꞌikenaga pasema miyema napiyiyo. Pika tabugai taoꞌyagararakaꞌya Poroba aogi napiyena maemagina, aegeba pi kamanapa tigetiba kaentine.

¹⁶Eya, aꞌyaꞌma esaꞌwapipa pika kaentine. We, ae isapipa kaꞌisa kamanapa esegima waiyegini, wasanamiba kampa aogima napiyewe. Aibegini, kampa abinta kinaꞌmibe tara agi napiye kinaꞌmibe pi kamanapa uma pai ampa paibumagini keꞌwaipa kasawe. Eya, pi kinaꞌmiba to kaꞌisa mono kamanapa kaga paibuma ata pewe.

¹⁷We, nabugai ntaoꞌmitaba, tigeba pika napima esegima kabiyiyo. Piya, ainti kamana akayuye kinaꞌmiba aiboꞌenawaitasa tibaibigiri, monota esegima asikenaenaripa kaisanaga kabiyiyo.

¹⁸Piya, tigeba Waꞌegare tauꞌikena yagara Isu Karaisiti nkawagaenabi mimagiri, agowapa aogima abigina anosano. Ibabe aꞌyaꞌma yagabe, ae agegaꞌeba asagayuyeno. Tagane.Pita piya isa kaentiye.