Read Fore 1 Yoni 2 Bible Online

1 Yoni 2 - Fore bible

1 Yoni 2

¹We, uwaena yakarantontonempitaba, aꞌyugu aguntaena pusanaga tigeti ma kamanapa kaeyuwe. Piya, kaꞌwainaba aguntaena pukibemipa tabarempa Koti nkaobi aoꞌmaema akaꞌi pukena yagaraba aeti mikiye. Pi aoꞌmaenta yagara aeba arupu yagara Isu Karaisitiwe.

²Aeba tae aguntaenare maeragaikena yugaba aesagabintiye. We, tabintoreka wanane. Aeba aꞌyaꞌma maga maga kinaꞌmikegaba kaga aesagabintine.

³Pigoya, Koti unti kamanapa wasiyompe kinaꞌmitaba, taeba: Taga taoꞌena potaune, yokana, tagantana piye.

⁴We, kaꞌwainaba: Naeba Kotipa naoꞌena potauwe, umagina Koti unti kamanapa kampa wasiyipa, pi ntagaraba aeba kumpari yagara miyegina, taga kamanaꞌamaba kampa antabaipintiba waiye.

⁵Piya, Koti kamana wasiyiꞌnaba aeba Kotiti agu kaoꞌena potagina anosaye. Taeba piya pokana anosagi, taeba: Kotiti atokaema miyune, yokana, tagantana piye.

⁶Eya: Aeti atokaema mima nasuwe yemiꞌnaba Karaisiti nasisa puma naseno. Eꞌwasaenama nkauꞌwapa aborama kayonenabi mpiyiyo

⁷We, nabugai ntaoꞌmitaba, ma kamana ago tigeti kaeyopa, kasa kamanapa kampaye. Marusa kamana pai maenta, pi kamana kaeyuwe. Pi kamanapa ago abita kananta kamanane.

⁸We, ma kamana ago iba tigeti kaeyopa, pipa kasaꞌena kanta piye. Piya, Karaisiti ntugarasabe tige yugarasabe pi kamanaꞌama nkauꞌwapa aogima aboraye. Eya, tununtanaba aꞌya wakena pegina, taga eꞌwasawamaba aborama taye.

⁹Piya, kaꞌwaina aeba: Eꞌwasaenabi mpiyuwe, umagina aoꞌyagaraba ata anta paritamipa, aeba tununtanabi mpiyi ntagarawe.

¹⁰Piya, to kaꞌwaina aeba aoꞌma agu kaoꞌena potamiꞌnaba aeba eꞌwasaenabi mpimagina, agisa aimisaꞌma wareꞌnakenaenaba kampa aboraye.

¹¹We, aoꞌmaka ata anta paritamiꞌnaba, aeba tununtanabi mpima tununtanabinti nasimagina, tununtanamaba aotikaetagina aeba kekaba aiboꞌnabo piye.

¹²We, uwaena yakarantontonempitaba, Karaisiti ntugarasa Kotiba aguntaenaripa maerigasagi, tiyoꞌmaekenaga naeba ma kamanapa tigeti kaeyuwe.

¹³Nabagitaba, pai uwa mita kananti ntagaraba tiyoꞌena potaga, tiyoꞌmaekenaga ma kamanapa tigeti kaeyuwe. Masimabi kinaꞌmitaba, tigeba ataenama nkagowamapa asugasaga, tiyoꞌmaekenaga ma kamanapa tigeti kaeyuwe. Araga yagaramitaba, tigeba tabapa tiyoꞌena potaga, tiyoꞌmaekenaga ma kamanapa tigeti kaeyuwe.

¹⁴We, nabagitaba, pai uwa mita kananti ntagaraba tiyoꞌena potaga, tiyoꞌmaekenaga ma kamanapa tigeti kaeyuwe. Masimabi kinaꞌmitaba, tigeba esegima asima mintagana, Koti kamanaꞌamaba tintabaipinti ago uwaiyegini, tigeba ataenama nkagowamapa asugasaga, tiyoꞌmaekenaga ma kamanapa tigeti kaeyuwe. Mampabisaenamapa taeba tagupa a-nkameno

¹⁵Pigoya, magabe mampabisaenagabe a-tibugano. Piya, kaꞌwaina aeba magaba abugamipa, aeba tabapa kampa abugaye.

¹⁶Piya, aꞌyaꞌma mampara aboraintanaba pipa mampabisaenawe. Eya, tantabaipisa kupiyona tabugaintanabe, tao iyeꞌena puma tabugaintanabe, tau maete ima tagebigoꞌena pompentanabe, pintanaba tabatisaba kampa aboraye. Kampaye. Pipa mampabisaenawe.

¹⁷Piya, mampabisaenaba aꞌya wakana, aeꞌwa abugaintanabe kaga aꞌya wakiye. We, Koti nkabemintana wasiye kinaꞌmiba miyaba mikibewe. Karaisiti kama kinapa ago aborawaye

¹⁸We, araga yagaramitaba, ma kanapa pabigo aꞌya wakena piye. Piya, Karaisiti kama kinaꞌwaka pai abintapa, pabigo aborakena piye. We, ibaba uwaena Karaisiti kama pota kinaꞌmiba aboraga, pika napima ma kanapa aꞌya wakena piyema, abune.

¹⁹Piya, pi kinaꞌmiba ago tagasawe. Paipa taege ka kinapa igeba kampa mintantane. Eya, igeba ka kina taege mintantasinta, taege mimagini kampa tagasasine. Piya, igeba ago tagasaga, taeba agowaipa agaompepa, aꞌyaꞌma pi kinapa taege ka kinapa kampaye.

²⁰We, tigeba aotane. Aota Awamusaꞌamaba paititantika, aꞌyaꞌma napiyenarintaga kina mintawe.

²¹Piya, tigeba taga kamanakaba aiboꞌena pe wanane. Tigeba aogima abeka tiyoꞌmaekenaga ma kamanapa tigeti kaeyuwe. Eya, taga kamanaꞌamaba kumpariꞌenaba kampa piyema, abeka, tigeti kaeyuwe.

²²We, kumpari yagaraba kewe, a. Piya, kaꞌwaina aeba Isuka: Pipa taga Karaisitiba kampaye yemi ntagaramaba, aeba kumpariꞌenaba piye. Eya, tabape yagarawape akabiwaisitaiꞌnaba, pipa Karaisiti kama kina mintiye.

²³Piya, kaꞌwainaba yagarawa akabitamiꞌnaba, aeba abawampati kampa atokaeye. Piya, to kaꞌwaina aeba yagarawampati amatiti potamiꞌnaba, aeba pabiyama abati kaga atokaeye. Aota Awamusaꞌama taga kamana uramiye

²⁴Pai abinta mono kamanapa a-tigeguꞌa puma upebe piyo. Piya, pai abinta kamanapa upebe pukibepa, tigeba yagarawampatibe abatibe aogima atokaema miyaba mikibewe.

²⁵Eya, aeba eꞌwasaenabi miyaba mikenaga utaratantiye.

²⁶Piya, timiyo puritakena kinaꞌmikaba naeba ma kamanapa tigeti kaeyuwe.

²⁷We, paipa tigepa Aota Awamusaꞌama esegiyenawapa tigeti uwa waiye. Piya, tigeba wasanami mono ago tiyakikenaenagaba a-nkaguyosagaiyo. Kampaye. Aota Awamusaꞌama paititantintanawapa aꞌyaꞌmaenaba puriyakikiye. Pi nkawamusaꞌama kamanapa tagane. Kumparipa kampaye. Piya, Awamusaꞌamaba puriyakigiri abima Karaisititi atokaema miyaba miyiyo.

²⁸We, uwaena yakarantontomitaba, tigeba piyama aeti atokaema miyaba miyiyo. Taeba piya pekanaba, ainti ampa aboraka, taeba asima taꞌmu pumagi kampa taekuru puma tanipa kampa peno.

²⁹Pigoya, Karaisiti aepa arupuyenama nkagoba agamagiri, pika mayama napiyiyo: Wasanama arupuyena pemiꞌnaba pipa Kotitisa aborayema, napiyiyo.