Read Fore 1 Yoni 4 Bible Online

1 Yoni 4 - Fore bible

1 Yoni 4

¹We, nabugai ntaoꞌmitaba, uwaena kumpari poropete kinaꞌmiba mampabintiba nasima kamana yepa, tigeba karuꞌenaba a-nkiyegaraiyo. Piya, awamusapa toma toma mintiya, pipa Kotipisa kanayo, to aukaꞌisa kanayoma napima, agowaipa aogima agaiyo.

²Piya, Koti Nkawamusano, to awamusanoma tigeba mayama abikibewe: Isu Karaisitiba wasana aborantine ye, pi kinaꞌmiba Koti Nkawamusa yagane.

³Piya, to kaꞌisa kina Isukaba: Kampa wasana aborantiye, ye kinaꞌmiba, igeba Koti Nkawamusa yagaba kampaye. Pi nkawamusaꞌama Karaisiti kama kinaꞌma nkawamusane. Piya, paipa aeka: Mampara aborakiye, yogiri abintagana, ibanto mampabi ago aboraye.

⁴We, uwaena yakarantontomitaba, tigeba Kotintana mimagiri, kumpari poropete kina asu igasawe. Eya, ma nkawamusaꞌama tigupinti waintemiꞌna, aeba mampabi wainti nkawamusapa asugasaye.

⁵Piya, pi kumpari poropete kinaꞌmiba igeba mampabisa kinane. Piya pegana, kamanaꞌwaimpaba mampabisaena kanta pegini, mampabisa kinaꞌmiba abewe.

⁶We, taeba Kotitisawe. Piya, Kotiti atokaeya kinaꞌmiba kamanatepa abewe. Pigoya, Kotitisa kampa aborantaꞌnagiba kamanatepa kampa abewe. Pintanaraka taga awamusape kumpari awamusape isige agoba pako pikenaga napiyune. Koti aeba agu kaoꞌenama nkagowe

⁷We, nabugai ntaoꞌmitaba, taeba agu kaoꞌena peno. Piya, agu kaoꞌena pukenaenaba pipa Kotitisawe. Piya, taga agu kaoꞌena pemiꞌnaba aeba Kotitisa aboramagina, aeba Kotiti atokaentine.

⁸We, wasanama kampa agu kaoꞌena potamiꞌnaba, aeba Kotiti kampa atokaema, agowapa kampa agaye. Kampaye. Piya, Kotiba agu kaoꞌenama nkagowe.

⁹Pigoya, Kotiba yagarawapa kaꞌanto mintogana otaogana mampabipa tumintiye. Piya, taeba: Aeti atokaema eꞌwasaena maeyiyema, otaogana tumintiye. Piya pumagina, pi ntugarasa Kotiba agu kaoꞌenawapa taetiba aboraramintiye.

¹⁰Eya, agu kaoꞌenama nkagoba mayama aborantiye: Piya, taeba agu kaoꞌena kampa potantokana, Koti aewa agu kaoꞌena puratamagina, yagarawapa otaogana, aguntaenarepa asuꞌa puragaikenaga mampabipa tumintiye.

¹¹We, nabugai ntaoꞌmitaba, Koti agu kaoꞌena puratamika, taegeba pabiyama taoꞌmipa agu kaoꞌena puwaitakanaba kanarasakiye.

¹²Pigoya, ka yagaramaba aobisaba Kotipa kampa agantiye. We, taeba taoꞌmipa agu kaoꞌena puwaitakubompepa, Kotiba taege miyeka, abekana, agu kaoꞌenawapa tantabaipinti anosama waikiye.

¹³Piya, Koti aeba Awamusaꞌwapa pako puratamika, taeba mayama abune: Taeba aege kaꞌena puma miyokana, aeba tagupi miyaba miyema, abune.

¹⁴Piya, tababa yagarawapa otaogana maga maga kina iꞌikenaga tumintegi, taeba agamagi, pi nkawaga kamanapa uma aborama miyune.

¹⁵Piya, kaꞌwaina aeba Isuka: Koti ntagarawe, yiꞌnapa Kotiba aege miyegina, pi ntagaramaba Kotiti atokaema miye.

¹⁶Piya, Kotiba agu kaoꞌena puratamikaba agamagi tamatiti pune. Piya, Kotiba agu kaoꞌenama nkagowe. Eya, kaꞌwaina aeba agu kaoꞌena wantaga miyiꞌnaba aeba Kotige miyegina, Kotiba aege miye.

¹⁷Piya, agu kaoꞌenawapa tantabaipinti anosagina auꞌwapa mayama aboraye: Taeba Koti antotaꞌena tamikibi ntagagaba kampa taekuru pune. Eya, ibantoba Karaisiti ae kanta puma taeba mampabi mintune.

¹⁸Pigoya, kaꞌwaina agu kaoꞌena potamiꞌnaba kampa aekuruba piye. Eya, taga agu kaoꞌenamaba taekuruyenarepa agarubakasaye. Piya, ata ika mpaekenaga taekuruyenaba aboraye. Aibegina, kaꞌwainaba aekuru piꞌnapa, ae antabaipintiba Koti nkagu kaoꞌenaba kampa anosama waiye.

¹⁹Pigoya, Kotiba marupa agu kaoꞌena puratantika taeba agu kaoꞌena yaga miyune.

²⁰Piya, kaꞌwaina aeba aoꞌmipa ata anta pariwaitamagina: Kotipa agu kaoꞌena potauwe, yipa, aeba kumpari iye. We, aeba aganta nkaoꞌmipa kampa agu kaoꞌena potamipa, ayamabaya kampa aganta Kotipa agu kaoꞌena potakiye. Pipa kampaye.

²¹We, Kotiba maya kamanapa uratantiye: Piya, kaꞌwainaba Kotipa agu kaoꞌena potamiꞌnaba, aeba aoꞌmakeba pabiyama agu kaoꞌena potakana kanarasano, untiye.