Read Fore 1 Yoni 5 Bible Online

1 Yoni 5 - Fore bible

1 Yoni 5

¹Pigoya, aꞌyaꞌma kinaꞌmiba: Isu aeba taga Karaisitiwema, abima yeꞌnagiba, igeba Koti ntagaraena puma miyewe. Piya, abawampa agu kaoꞌena potaꞌnagiba, igeba kaga aꞌyaꞌma yagarawake agu kaoꞌena puwaitawe.

²Eya, taeba Kotiti agu kaoꞌena potama, unti kamanaꞌwapa wasiyompeka taeba mayama abune: Taeba Koti ntagaramipa kaga agu kaoꞌena puwaitaunema, abune.

³Piya, taeba Koti unti kamanapa wasiyompepa, taeba Kotiti agu kaoꞌena taga potaune. We, ae kamanaꞌamaba kampa kuntaba tabiye.

⁴Piya, Kotitisa aborantaꞌnagiba igeba mabisaenaba asugasawe. Piya, taeba Kotiti tamatiti potaompepa, pi tamatitiꞌenarempaba mabisaenaba aeguma maema metama asugasaye.

⁵We, ke esegi puma mabisaenaba maema megasi piye. Piye: Isu aeba Koti ntagarawema, abima yeminaba, aeba asugasi piye. Kotiba yagarawampa kamanapa uma arantiye

⁶Piya, Isu Karaisiti aeba aborama yogawa agobikenaba wani mpaemagina, nagarikenaba korankapa airigintiye. Piya, wanitasa abiwanane. Wanitasabe koratasabe agowapa aborantine.

⁷Pigoya, Awamusapa tagantanama nkago mintana, pi Nkawamusaꞌamaba Karaisiti nkawaga kamanapa uma taga aboraramegi abune.

⁸Piya, pintanaba kakagami uma aborawe. Eya, Awamusana, wanina, korana suma, pi kakagaba igeba ka awaga aborawe.

⁹Piya, wasanami nkiwaga kamanapa taeba abune. We, Koti yemi kamanaꞌamaba wasanami kamanapa igasaye. Piya, Kotiba Isukaba: Yagaranene, yoga abuntune.

¹⁰Pigoya, kaꞌwainaba Koti ntagaramati amatiti potamiꞌnaba, aeꞌwa nkagupipa Koti uma aborami kamanaꞌama nkauꞌwapa aboraye. Kampa Kotiti amatiti potamiꞌnaba, aeba Koti yagarawakaba awaga kamana untipa kampa abibebe piye. We, pika aeba Kotikaba: Kumpari yagarawe, uma ata potaye.

¹¹Pigoya, taga awaga kamanapa mayamawe: Kotiba eꞌwasaenaba tamika miyaba mikune. Pi nkeꞌwasaenamaba yagarawampapisa aboraye.

¹²Piya, Koti ntagarari uma kabo pemiꞌnaba, aeba pi nkeꞌwasaena wantagane. We, Koti ntagarari kampa kabo pemiꞌnaba, aetiba pi nkeꞌwasaenaba kampa waiye. Eꞌwasaenaba taeti waiyaba miyema napiyeno

¹³We, Koti ntagaramati timatiti pe kinaꞌmitaba, ma kamanapa tigeti kaeyuwe. Piya, tigeba pi waiyaba eꞌwasaenaba ago maeyawema napiyiyoma, kaeyuwe.

¹⁴Piya, taeba Kotikaba kampa taekuru punta taꞌmuntanabisa ae agori wano. Piya, taeba kampa taekuru punta, kaꞌenaga ae abukibintanaga abigakubompepa, kamanatepa aogima abikiye.

¹⁵Eya, abigakenaenarepa abiyema, abintompeka, taoꞌmaeyaka abigakenaenarempa nkauꞌwapa ago maekunema abima tagantanagaba yune.

¹⁶Pigoya, kaꞌwaina aeba agupa aꞌabibi agora kaikena aguntaena wanane. To aguntaena pekanaba, to ka yagaramaba agantanaba, aeba aoꞌyagaraga Kotipa abigakana, Kotiba eꞌwasaenaba pi nkaoꞌyagaraba ameno. We, agupa agora kaikena aguntaenaba ka waintiye. Piya pemi ntagaragaba abigaoma naeba kampa yuwe. Kampaye.

¹⁷We, aꞌyaꞌma kampa arupu pemintanaba pipa aguntaenama nkauꞌwane. Piya, aguntaenama nkauꞌwapa kampa wasanama nkagupa agorapa kaikiye.

¹⁸Piya, Kotitisa aboraꞌnagiba agunta kiꞌi kampa aegaraga, agaune. Eya, Kotitisa aboranti ntagaramaba kabiwaitagina, ataenama nkagowamaba kampa ata puwaitaye.

¹⁹We, taeba Kotitisa aborantokana, aꞌyaꞌma mampabisa kinaꞌmiba ataenama nkagowama nkamentanti miyewema, abune.

²⁰Piya, Koti ntagaraba aboramagina aogi napiyenaba tamiye. Eya, aeba taga ntagarama nkagowaka abibebe pukena napiyenaba tamiye. Pikaba abimagi, taeba tagantanama nkagoripa atokaemagi, yagarawa Isu Karaisitige kaga aeti atokaeyune. We, aeba Koti mima, waiyaba eꞌwasaenama nkagowe.

²¹We, uwaena yakarantontompitaba, tigeba ama kotipa tikabiwaitaiyo.Yoni piya isa kaentiye.