Read Fore 3 Yoni 1 Bible Online

3 Yoni 1 - Fore bible

3 Yoni 1

¹Naeba monota kabiyo ntagaramana, nabugai ntaoꞌyagara Kaiyasi kaetiba ma nkisapa kaeyuwe. Piya, naeba taga kamanaka napima akeka nabugaye.

²We, nabugai ntaoꞌyagara, kae kagupa kanara monoti waintiyema, ago abuwe. Pabiyamagi, aꞌyaꞌmaena kaega pempentanabe mikenaenabe aogima waisanaga nabiye.

³Piya, kaꞌisa mono kinaꞌmiba kanama kaekaba: Taga kiꞌiba aegaraye, yugu abite tabe naꞌmu puntone. We, kaeba tagantanamanati nasenema, taga abintone.

⁴Piya, yagaranempiba taga kiꞌi aegarakaba abima tabera naꞌmu puwe. Piya pekana, tonamaba pi ntaꞌmuntananepa kampa asugaikiye. Kaiyasi aogi yuga puntiye

⁵We, nabugai ntaoꞌyagara, kaeba mono kinaꞌmiti kayokayaꞌena puma iyoꞌmaeyampepa, kamatitiꞌenama nkauꞌwapa aogima aborane. Eya, namuꞌisa mono kinaꞌmiti pabiyama aborampepa anosama asugasaye.

⁶Piya, kaꞌisa iyoꞌmaentampe kinaꞌmiba monota aiꞌaru pompe kinaꞌmiteti irosaꞌma agu kaoꞌena puwaitampe ntanaraka uramewe. Piya, kaeba Koti ntugaraka napima keꞌisaena iyoꞌmaeyagana, kanarasano.

⁷Piya, igeba Karaisiti ntugaraka mawaipa atate namuꞌi wama namuꞌisa kinatasaba ikapa kampa maeyaka iyoꞌmaeyo.

⁸We, taeba piya kina taga kamanaꞌama ntugara iyoꞌmaekenaga keꞌisaena imekana, kanarasakiye. Tiyoterepisi aeba ataena puntiye

⁹Pigoya, naeba kaꞌisa kamanapa monota aiꞌaru pe kinaꞌmititi ago kaentone. We, Tiyoterepisi aeba paitama tabe misanaga pemi ntagaraba, aeba tae kamanapa kampa abiye.

¹⁰Piya, naeba tigeti uma irosakubopa, pintana pemikaba kamanapa ukuwe. Aeba taekaba ata kamana uma kumpari urataye. Pi abiwanane. Aeba mono kinapa kampa kayonena puwaitamagina, to kaꞌisa kina kayonena puwaitakena pegana, akunkitama mono aiꞌaruyenabisa igarubaye. Timiteriyasi aeba aogiyena puntiye

¹¹We, nabugai ntaoꞌyagara, kaeba ataenamapa a-nkaegaꞌma aogiyenamana aegarao. Piya, kaꞌwaina aeba aogiyena pemipa, aeba Kotitisa aborantiye. To kaꞌwaina aeba ataena pemipa, aeba Koti nkagoba kampa aogima agantiye.

¹²Pigoya, aꞌyaꞌma kinaꞌmiba Timiteriyasi nkagegaꞌe asagayuyewe. Piya, tagantanama nkagowamaba tabe agigaꞌe kaga aboraye. Piya pegi, naegeba ae agegaꞌe asagayuyogana, awaga kamanaꞌnepa taganema, ago abene. Nagarikena kamanane

¹³Pigoya, urimikena kamanaꞌnepa uwaena waintegi, naeba esapi kaesanagaba kampa nabiye.

¹⁴Piya, naeba karuꞌena tigeti waka, nawamupisa uma abenema, yuwe.

¹⁵Paruyenaba kaeti waima waiyeno. Taoꞌmiba: Aya pene, yewe. Kaeba aꞌyaꞌma pitaꞌi miye taokinaꞌmikaba: Aya pewe, uwaitao.Yoni piya isa kaentiye.