Read Fore Areberesoni 22 Bible Online

Areberesoni 22 - Fore bible

Areberesoni 22

¹Piyama agauwagana, enisorewamaba anompa nayakintiye. Pi nkwanipa eꞌwasaena maekena wani, karasiwama taꞌneraꞌne pusu pi wani, pipa Kotige sipisipi awarowampage isiyemu yabaerasa aborami nkwanine.

²Piya, pi waninkama pi kumapintisa kiꞌama nkakapinti wagina, to awamori to awamori eꞌwasaena maekena ya waintiye. Pi ntawamaba nagisarisa tara tumpaema toma toma aꞌwapa waiyegina, piꞌna oka oka aborama agutaye. Piya, pi ntawama nkaꞌyenkapa maga maga kinaꞌmiba naigina, kamparagaenawaipa maegasima kaba itakiye.

³Piya, pi kumatiba kaikenaenaba to kapa kampa aborakiye. Piya, pi kumapintiba Kotige sipisipi awarowampage isiyemu yabaewama waiyekini, kayokaya kinaꞌwampiba agisuma mikibewe.

⁴Piya, igeba aogawapa agama miyigina, iꞌnera ae ageba aborama waikiye.

⁵Piya, pi kumatapa kampa toba ase ukiye. Kampaye. Pi kumatasa kinaꞌmiba kanepe pape kampa aguyosagaigina, Waꞌega Koti aeba arakenaenawaipa mikiye. Aibekini, igeba asi nasiba waꞌega kina kanta puma miyaba mikibewe. Isu kanakena kamanane

⁶Pigoya, pi enisorewamaba mayama unamintiye: Pi abempe kamana pipa kampa antageꞌena puma, pipa tagatakaꞌyane. Piya, Waꞌega Koti, poropete kina uwaitantiꞌna, aeba enisorewapa otagina tumpa kayokaya kinaꞌwapa agaro nkaborakibintanaba iyakegini agawe.

⁷Piya, abo. Naeba agarosama kanakuwe, iyema unamoga abintuwe. Piya, kaꞌwaina ma nkisapi kaeyo kamana, Koti nkawamupisa kamanapa aegaramiꞌnaba, aeba aꞌmuntanabi mpikiye.

⁸Pigoya, nae Yonina, pintana agama abiwaentuwe. Piya agama abiwaemagi, naeba nayakinti enisorewama nkagisabi parokaema agisukena puwagana,

⁹aeba maya unamintiye: Kampaye. Kaeba piyaba a-po. Piya, naebe, kaebe, poropete kaokinape, ma nkisapisa kamana wasiye kinape, taeba ka yuga pompene. Kaeba Kotitimana agiso, untiye.

¹⁰Piya, to ka maya unamintiye: Kaeba ma nkisapisa Koti nkawamupisa kamanapa a-nkasaema akumpaꞌma miyo. Kampaye. Piya, pi kamanaꞌama nkaꞌwa aborakena kanaꞌwapa ago agarosaye.

¹¹Pi kanaꞌwakaba ataena peꞌnagiba ataena pikena puntanaba peno. Iꞌnintana peꞌnagiba iꞌnintana pukena puntanaba peno. Piya, arupuyena peꞌnagiba arupuyena pukena puntanaba peno. Aota miyeꞌnagiba aota mikena puntanaba aota miyeno, untiye.

¹²Abo. Naeba agarosama kanamagi, antotaꞌenanentaga irosaꞌmagi, aꞌyaꞌma wasana pentanawaika ikankaipa kaꞌmasa puma aꞌwae puma imikuwe, iye.

¹³Piya, naeba paitanta yagara mite aintisa yagara mite puma, marusabe atutasabe aꞌyaꞌmaenama nkagonawe, piya untiye.

¹⁴Piya, itasaenaba wani nkaema aebarupaꞌnagiba, igeba iꞌmuntanabi mpikibewe. Piya peꞌnagipa uwaitakini eꞌwasaena maekena yawamankapa namagini, pi kumaꞌama kabirasa wama antabaipinti ubasigina kanarasano.

¹⁵We, yaga kara kanta pe kinape, kiyoꞌena pe kinape, kumiyena pe kinape, wasana iyeguye kinape, ama koti nkagise kinape, aꞌyaꞌma kumpariꞌena ibugagina aegaꞌma pe kinape, igeba Koti kumaꞌama nkabeꞌi mikibewe, piya untiye.

¹⁶Piya: Naeba Isuna, naeba enisorene agarubaogana monota aiꞌaru pe kinaꞌmititi wama ma nkawaga kamanapa uma aborarimiye. Piya, naeba Tebiti tupisa ago aiꞌne nawe. Naeba abayara eꞌwasa nori nawe, piya untiye.

¹⁷Pigoya, Awamusaꞌamage sipisipi awaroma nkwaeꞌmage: Kanao, untase. Wasana ma kamana abiꞌnaba: Kanao, yeno. Piya, wanika abemiꞌnaba aeba kanano. Eya, eꞌwasaena maekena wanika abemiꞌnaba aeba kanama eꞌwasa wanipa uwa ampaema nano. Nagarikena kamanane

¹⁸Pigoya, wasanami ma nkisapisa Koti nkawamupisa kamanapa abeꞌnagipa, naeba esegi kamanapa maya urimuwe: Piya, kaꞌwaina ma kamanata kaꞌisa to kamana atokaekibipa, Kotiba ma nkisapisa wasana ata puwaitakena kamanaꞌama nkauꞌwapa aeti atokaetakiye.

¹⁹Piya, to kaꞌwaina ma nkisapisa Koti nkawamupisa kamanatasa kaꞌisa maegaikibemipa, aogi antotaꞌenawapa Kotiba maegaikiye. Eya, eꞌwasaena maekena yagabe, aota kumakabe unti nkantotaꞌenawapa maegaikiye.

²⁰Pigoya, ma kamana uma aborama: Taga, tagane, yika, aeba: Karuꞌena kanakuwe, iye. Eya, Waꞌega Isu kaeba karuꞌena kanao.

²¹Pigoya, Waꞌega Isu nkawagaenawampa aꞌyaꞌma tigeti waima waiyeno. Tagane.