Read Fulfulde Laataanooji 13 Bible Online

Laataanooji 13 - Fulfulde bible

Laataanooji 13

¹Abraama ummi diga Misra, warti Lesdi Fombina bee debbo maako e ko o mari fuu. Ludu ɗonno bee maako.

²Abraama diskuɗo masin. O mari dabbaaji e cardi e kaŋŋeeri.

³O yehi seɗɗa seɗɗa diga Lesdi Fombina haa yotti Baytila, haa nokkuure laymaaru maako ndu o darnuno naane hakkunde Baytila e Ayu,

⁴haa nokkuure nde o mahuno hirsirde naane boo. Haa ton Abraama ewni innde Jawmiraawo nder do'a.

⁵Ludu, jahduɗo bee Abraama, woodi dammooji e na'i e cuuɗi laymaaji maako.

⁶Lesdi maajum he'aay haa ɓe njooɗodo ngam marle maɓɓe ɗuuɗi masin haa ɓe mbaawaay jooɗodaago.

⁷Jokkirgol ummi hakkunde waynaaɓe Abraama e waynaaɓe Ludu. Wakkati man Kanaani'en e Perezzi'en ɗonno nder lesdi maajum.

⁸Nden Abraama wi'i Ludu: “Taa jokkirgol wona hakkunde am bee maaɗa, hakkunde waynaaɓe am bee waynaaɓe maaɗa ngam en banndiraaɓe.

⁹Naa lesdi fuu ɗon yeeso maaɗa na? Seedu bee am! To a yiɗi yahugo gal juŋngo nano, mi yahan haa nyaamo. To a yiɗi yahugo gal juŋngo nyaamo, mi yahan gal nano.”

¹⁰Ludu ɓaŋgti gite muuɗum, yi'i waadiwol Urdun fuu no soofri booɗɗum, haa yotti Co'ar. Hiddeko Allah nattina Sodoma e Gomorra, ngol nanndino bana jarne Jawmiraawo, bana lesdi Misra.

¹¹Ludu suɓani hoore muuɗum waadiwol Urdun fuu, o dilli gal fuunaaŋge. Bana non ɓe ceediri.

¹²Abraama jooɗi nder lesdi Kanaana, Ludu boo jooɗi nder gure waadiwol. O darni cuuɗi laymaaji maako haa yotti Sodoma.

¹³Yimɓe berniwol Sodoma ɓe halluɓe, ɓe ɗonno mbaɗa hakke masin heedi Jawmiraawo.

¹⁴Nde Ludu seedi bee maako, Jawmiraawo wi'i Abraama: “Ɓaŋgtu gite maaɗa, laar diga nokkuure nde a woni haa gal woyla[19] e fombina[20] e fuunaaŋge e hiirnaaŋge.

¹⁵Ngam lesdi ndi ngi'ata fuu, haa maaɗa e danygol maaɗa ndokkanmi ndi ngam foroy.

¹⁶Mi ɗuɗɗinan danygol maaɗa bana njaareendi. To goɗɗo waawi limugo njaareendi maayo, o waawan limugo danygol maaɗa boo.

¹⁷Umma, widda lesdi, nder njuutirka e njaajirka maari fuu, ngam mi hokkete ndi.”

¹⁸Abraama ummidi bee cuuɗi laymaaji muuɗum, wari jooɗi les leɗɗe mawɗe haa Mamre, baŋnge Heburuun. Ton o mahani Jawmiraawo hirsirde.