Read Fulfulde Laataanooji 17 Bible Online

Laataanooji 17 - Fulfulde bible

Laataanooji 17

¹Nde Abraama waɗi duuɓi cappanɗe joweenayi e joweenayi (99), Jawmiraawo waŋgani mo, wi'i mo: “Min woni Allah Baawɗo, yeeɗu yeeso am a timmuɗo!

²Mi haɓɓan alkawal bee maaɗa, mi ɗuɗɗinan danygol ma masin.”

³Abraama sujidi dow yeeso muuɗum. Allah tokki wi'ugo mo:

⁴“Ndaa, alkawal am bee maaɗa. A laatoto baaba ummaatooje ɗuuɗɗe.

⁵A ewnortaake fahin Abraama, ammaa Ibrahiima[25], ngam mi waɗi ma a baaba ummaatooje ɗuuɗɗe.

⁶Mi waɗete a ɗuuɗa-asŋgoljo masin. Danygol ma boo laatoto ummaatooje, laamiiɓe iwan haa maaɗa.

⁷Mi haɓɓan alkawal bee maaɗa e ɓaawo maaɗa boo bee danygol ma, nder gide maɓɓe fuu. Alkawal nga'al duumoto haa foroy, haa mi laato Allah maaɗa e Allah danygol maaɗa ɓaawo ma.

⁸Mi marnete maral duumiiŋgal lesdi Kanaana fuu, lesdi ndi jooɗiɗa nder muuɗum bana koɗo, an e danygol maaɗa ɓaawo maaɗa boo. Mi laatoto Allah maɓɓe.”

⁹Allah wi'i Ibrahiima fahin: “An, hakkilan alkawal am, an e danygol maaɗa ɓaawo ma, nder gide maɓɓe fuu.

¹⁰Ndaa bana noy on kakkiliranta alkawal ngal kaɓɓanmi bee mooɗon, waato danygol maaɗa ɓaawo ma: Ngorkoy mooɗon fuu juulne.

¹¹Juulnol ngo'ol laatoto alaama alkawal hakkunde am bee mooɗon.

¹²Gorgel caka mooɗon fuu, to waɗi balɗe joweetati, ngel juulne, ɗum laato non haa gide mooɗon fuu. A juulno boo maccuɓe danyaaɓe haa saare maaɗa fuu, non boo soodaaɓe bee ceede diga ɓiɓɓe jananɓe ɓe laataaki lenyol maaɗa.

¹³Maccuɗo danyaaɗo haa saare e coodaaɗo bee ceede, ɓe njuulne. Ngam haa alkawal am laato haa ɓalli mooɗon bana maandorde alkawal duumiiŋgal.

¹⁴Gorko mo juulnaaki, o gurtinteeɗo diga jama'aare maako, ngam o ƴaɓɓake alkawal am.”

¹⁵Nden Allah wi'i Ibrahiima: “Taa tokka ewnaago debbo maaɗa Saray. Innde maako warta Saraatu.

¹⁶Mi barkiɗinan mo, mi hokkete ɓiɗɗo bee maako. Mi barkiɗinan mo, o laatoto daada ummaatooje. Laamiiɓe ummaatooje iwan haa maako.”

¹⁷Ibrahiima sujidi dow yeeso mum, o jali, o wolwi nder ɓernde maako: “Bana noy mardanmi ɓiŋngel min mo duuɓi teemerre (100)? Malla Saraatu mo duuɓi cappanɗe joweenayi (90) danyan na?”

¹⁸Nden Ibrahiima wi'i Allah: “Isma'iilu yeeɗa yeeso maaɗa!”

¹⁹Allah jaabi: “Naa non! Debbo maaɗa Saraatu danyante ɓiɗɗo gorko, a inndan mo: Isiyaaku. Mi haɓɓan alkawal bee maako, non boo bee danygol maako ɓaawo maako. Ngal duumoto foroy.

²⁰Ngam Isma'iilu kam, mi nani do'a maaɗa. Ndaa, mi barkiɗinan mo. Mi waɗan mo o ɗuuɗa-asŋgoljo, mi ɗuɗɗinan danygol maako masin. O danyan laamiiɓe sappo e ɗiɗo. Mi laatinan mo ummaatoore mawnde.

²¹Ammaa alkawal am kam, mi haɓɓan ngal bee Isiyaaku, mo Saraatu danyante mawri bana nii.”

²²Nde Allah timmini wolwango mo, o eeŋgi, acci Ibrahiima.

²³Nden Ibrahiima hoo'i ɓiyum Isma'iilu e danyaaɓe nder saare muuɗum fuu e soodaaɓe bee ceede, worɓe nder saare muuɗum fuu, o juulni ɓe nder nyalaade maajum, bana no Allah umri mo.

²⁴Ibrahiima marino duuɓi cappanɗe joweenayi e joweenayi (99), saa'i o juulno.

²⁵Ɓiyiiko Isma'iilu boo marino duuɓi sappo e tati, saa'i o juulno.

²⁶Nder nyalaade woore Ibrahiima e ɓiyum Isma'iilu njuulna.

²⁷Worɓe saare maako fuu, danyaaɓe nder saare e soodaaɓe bee ceede haa jananɓe, njuulnodi bee maako.