Read Fulfulde Laataanooji 18 Bible Online

Laataanooji 18 - Fulfulde bible

Laataanooji 18

¹Jawmiraawo waŋgani Ibrahiima haa leɗɗe mawɗe haa Mamre, yaake o ɗonno jooɗi haa dammugal suudu laymaaru maako wakkati naaŋge ɗon wula.

²O ɓaŋgti gite, o laari, worɓe tato ɗon ndari ɓadiiɗum bee maako. Nde o yi'i ɓe, o doggi ngam fottugo bee maɓɓe diga dammugal laymaaru, o sujidi haa lesdi.

³O wi'i: “Jawmiraawo, to mi heɓi mo'ere yeeso maaɗa, useni, taa saala kommbi saare maccuɗo maaɗa!

⁴Ɓe ngadda ndiyam seɗɗa, on loota kosɗe mooɗon, nden ciwte les lekki ki'i.

⁵Mi waddana on nyaamdu seɗɗa ngam on keɓa semmbe hiddeko on tokkitina laawol mooɗon, ngam on njaali kommbi saare maccuɗo mooɗon”. Ɓe njaabi: “Waɗ ko mbi'ɗa.”

⁶Nden Ibrahiima lorti bee jaawal nder laymaaru muuɗum, wi'i Saraatu: “Law, hoo'u kilo kuroori ɗiggundi noogas e jowi, tamsu tamseeje!”

⁷Ɓaawo maajum o doggi gal na'i, o hoo'i nyalbel booɗŋgel, hokki ngel suka. Kaŋko boo, o yaawi taaskitingo ngel.

⁸Nden Ibrahiima ɗaɓɓiti kettuŋgol belŋgol e ɓiraaɗam e kusel gaggel go, o jo'ini ɗum yeeso maɓɓe. O dari kommbi maɓɓe les lekki, yaake ɓe ɗonno nyaama.

⁹Ɓe ƴami mo: “Toy debbo maaɗa Saraatu?” O jaabi ɓe: “Ndaa o ɗon les laymaaru”.

¹⁰Gooto caka maɓɓe wi'i: “Fakat, mi lortoto haa maaɗa mawri bana jonta. Nden debbo maaɗa Saraatu maran ɓiɗɗo gorko.” Saraatu ɗonno heɗito haa dammugal laymaaru, ɓaawo koɗo.

¹¹Ibrahiima e Saraatu fuu ndottidi, ɓe ɗuuɗa-duuɓi'en. Al'aada rewɓe[26] ta'i haa Saraatu.

¹²Saraatu jali nder ɓernde muuɗum, wi'i: “Jonta bana naywirmi nii, suuno gorko ngoye maatanmi? Jawmu saare am boo naywi.”

¹³Jawmiraawo wi'i Ibrahiima: “Ngam ɗume Saraatu jali, wi'i: Gooŋga kadi mi danyan nde naywumi na?

¹⁴Woodi ko Jawmiraawo waawataa waɗugo na? Mawri bana jonta, nde mi lortoyto haa maaɗa, Saraatu maran ɓiɗɗo gorko.”

¹⁵Saraatu huli, ngam maajum o yeddi, o wi'i: “Mi jalaay.” Kaŋko boo o wi'i: “Aa'a, a jalɗo.”

¹⁶Worɓe go ummi, tiiti Sodoma, Ibrahiima yahdi bee maɓɓe, ɗofti ɓe.

¹⁷Jawmiraawo wi'i: “Mi suuɗataa Ibrahiima ko mi tammi waɗugo.

¹⁸Fakat, o laatoto kaakiraawo ummaatoore mawnde, marnde baawɗe. Ummaatooje duniyaaru fuu keɓan barka ngam daliila maako.

¹⁹Mi suɓi mo ngam o umra ɓikkoy maako e saare maako ɓe kakkilana laawol am, ɓe mbaɗa pottuɗum e adiliijum ɓaawo maako, ngam mi hebbinana mo ko mi iinani mo.”

²⁰Nden Jawmiraawo wi'i Ibrahiima: “Gullaali dow Sodoma e Gomorra ɗuuɗi, hakke jooɗiiɓe ton mawni masin.

²¹Mi yahan, mi laara to ɓe mbaɗi fakat bana gullaali garɗi yeeso am. To naa non, mi anndan ɗum boo.”

²²Worɓe ɗiɗo kam ndilli, tiiti Sodoma. Ammaa Ibrahiima lutti ɗon dari tawon yeeso Jawmiraawo.

²³Ibrahiima ɓaditi, ƴami mo: “Gooŋga a halkidan adiliijo bee kalluɗo na?

²⁴Teema adili'en cappanɗe njowo ɗon nder berniwol. Gooŋga a halkan ɓe boo na? A yaafataako berniwol ngo'ol ngam daliila adili'en cappanɗe njowo wonɓe nder maagol na?

²⁵A waɗataa irin ɗu'um! A mbarda adiliijo bee kalluɗo, a hiito ɓe kal-kal! Waɗataako! Kadi kiitoowo duniyaaru fuu waɗataa kiita ngooŋɗuka na?”

²⁶Jawmiraawo wi'i: “To mi tawi nder Sodoma adili'en cappanɗe njowo, nden kam mi yaafoto berniwol fuu ngam daliila maɓɓe.”

²⁷Ibrahiima wi'i: “Yaafam, ngam mi aaƴi wolwango Jawmiraawo am, min mo mbulwuldi e ndoondi meere!

²⁸Teema adili'en njowo ŋakki haa cappanɗe njowo. A halkan berniwol fuu ngam daliila maɓɓe na?” Jawmiraawo jaabi: “Mi halkataa ngol, to mi tawi ton cappanɗe nayo e njowo (45).”

²⁹Ibrahiima tokki wolwango mo, wi'i: “Teema adili'en cappanɗe nayo tan ngoni ton.” Jawmiraawo jaabi: “Mi halkataa berniwol ngam daliila cappanɗe nayo ɓe'e.”

³⁰Ibrahiima wi'i: “Yaa Jawmiraawo, taa tikku, haa mi wolwane fahin. Teema cappanɗe tato non ngoni ton.” Jawmiraawo jaabi: “Mi waɗataa koo ɗume, to mi tawi ton cappanɗe tato.”

³¹Ibrahiima wi'i: “Ndaa mi aaƴi wolwango Jawmiraawo. Teema sey noogas non ɗon ton.” O jaabi: “Mi halkataa ngol ngam daliila noogas ɓe'e.”

³²Ibrahiima wi'i: “Taa tikku, yaa Jawmiraawo, haa mi ɓesda wolwango ma nde woore tan. Teema sey sappo tan ngoni ton.” O jaabi: “Mi halkataa ngol ngam daliila sappo ɓe'e.”

³³Jawmiraawo dilli nde o timmini wolwididgo bee Ibrahiima, Ibrahiima boo lori haa nokkuure muuɗum.