Read Fulfulde Laataanooji 19 Bible Online

Laataanooji 19 - Fulfulde bible

Laataanooji 19

¹Malaa'ika'en ɗiɗo go njotti Sodoma bee kiikiiɗe. Ludu ɗonno jooɗi haa dammugal Sodoma. Nde o yi'i ɓe, o ummi, o yehi fottoygo bee maɓɓe, o sujidi, yeeso maako haa lesdi.

²O wi'i: “Barka mooɗon, useni, njaɓe nastugo saare maccuɗo mooɗon, looton kosɗe mooɗon e mbaalon. Fajiri cub on ummoto, nden on tokkitina laawol mooɗon.” Ɓe mbi'i: “Aa'a, min mbaalan haa daldal berniwol.”

³Ammaa o tori ɓe ɗuuɗɗum, haa ɓe ngari ɓe nasti saare maako. O waɗani ɓe nyaamduuji e tamseeje ɗe ufnaakaa, ɓe nyaami.

⁴Diga ɓe ciwaa waalugo, worɓe berniwol Sodoma, derke'en e nayeeɓe ngari diga pattule fuu, taari saare.

⁵Ɓe ewni Ludu, ɓe mbi'i mo: “Toy worɓe warɓe haa maaɗa jemmaare nde'e? Wurtin ɓe haa amin, haa min mbaalda bee maɓɓe.”

⁶Ludu wurti haa maɓɓe haa dammugal, o maɓɓi parewal ɓaawo maako.

⁷O wi'i: “Sooba'en am, taa mbaɗe kalluɗum ɗu'um.

⁸Ndaa, mi woodi ɓiɓɓe rewɓe ɗiɗo, ɓe anndaa gorko. Mi wurtinan ɓe haa mooɗon, on mbaɗa ɓe ko fottani on. Ammaa worɓe ɓe'e, taa mbaɗe ɓe koo ɗume, ngam ɓe ngari haa am.”

⁹Ɓe mbi'i: “Wosta ɗo! A jananno meere haa ɗo, a yiɗi hiitaago min na? Yowwa! Min mbaɗete kalluɗum, ko ɓurata ɓeya.” Ɓe ɓilli Ludu, ɓe ɓaditi haa ɓe cokkita parewal.

¹⁰Ammaa malaa'ika'en ɗiɗo go porti juuɗe muuɗum'en, ɓe nastini Ludu nder saare, nden ɓe maɓɓi parewal.

¹¹Nden ɓe mbumni wonɓe yaasi fuu, diga derke'en haa ndotti'en, haa ɓe mbaawaay heɓtugo dammugal.

¹²Malaa'ika'en ɗiɗo go mbi'i Ludu: “Woodi goɗɗo maaɗa haa ɗo na? Koo esiraawo, koo ɓiɓɓe maaɗa worɓe e rewɓe, koo moye nder berniwol ngo'ol, wurtin ɓe diga ɗo.

¹³Ngam min nattinan nokkuure nde'e. Jawmiraawo nani gullaali ɗuuɗɗi dow yimɓe Sodoma, ngam maajum o neli min halkugo ngo.”

¹⁴Ludu wurti, yehi ngam wolwango esum'en, tammiiɓe te'ugo ɓiyum'en rewɓe, wi'i ɓe: “Umme, ngurte nokkuure nde'e, ngam Jawmiraawo yiɗi halkugo berniwol ngo'ol!” Ammaa esiraaɓe maako ndaari bana o jalnan ɓe non.

¹⁵Bee subaha, malaa'ika'en njaawɗini Ludu, mbi'i: “Umma, hoo'u debbo maaɗa e ɓiɓɓe maaɗa rewɓe ɗiɗo, wonɓe haa ɗo, ngam taa kalkon nder kiita ngam halleende berniwol ngo'ol!”

¹⁶Nde o ɗon neeɓa, ɓe naŋngi juŋngo maako e juŋngo debbo maako e juuɗe ɓiyiiko'en rewɓe, ngam Jawmiraawo yiɗi hisnugo mo. Ɓe ngurtini ɓe, ɓe acci ɓe yaasi berniwol.

¹⁷Nde ɓe ngurtini ɓe, gooto maɓɓe wi'i: “Doggu ngam kisna yoŋki maaɗa, taa yeesita, taa dara nder waadiwol fuu! Doggu haa hooseere ngam taa a natta!”

¹⁸Ammaa Ludu jaabi: “Naa non, Jawmiraawo, ɗum saɗi.

¹⁹Ndaa, maccuɗo maaɗa heɓi mo'ere yeeso maaɗa, a waɗani yam mbooɗeeŋga ɗuuɗŋga bee hisnango yam yoŋki am. Ammaa mi waawataa doggugo haa hooseere, teema masiibo jokkoto yam, mi maaya.

²⁰Ndaa wuro famaro, ɓadiiŋgo boo ngam mi dogga ton. Accu mi suɗoya ton. Naa ngo famaro na? Ngam haa yoŋki am hisa!”

²¹O wi'i: “Booɗɗum, mi mo'ani ma ɗum fahin. Mi nattintaa wuro ngo mbolwanta.

²²Yaawɗa suɗoya ton, ngam mi waɗataa koo ɗume, sey to a yottake ton.” Ngam maajum wuro ngo ewna Co'ar[27].

²³Naaŋge fuɗi, Ludu boo yotti Co'ar.

²⁴Nden Jawmiraawo toɓni yiite e baruudu[28] diga asama dow Sodoma e Gomorra.

²⁵O halki berniiji ɗiɗi ɗi'i e yimɓe wonɓe ton fuu e waadiwol bee fuɗŋgooji mum fuu.

²⁶Debbo Ludu yeesiti, laati daŋraŋgal mannda.

²⁷Ibrahiima dawi cub, yehi haa nokkuure nde o darino yeeso Jawmiraawo.

²⁸O laari gal Sodoma e Gomorra e waadiwol man fuu. O yi'i cuurɗe eeŋgi diga lesdi bana cuurɗe ɓolinirde.

²⁹Nde Allah nattini berniiji waadiwol man, o siftori Ibrahiima. Nde o wili berniiji haa Ludu jooɗino, o wurtini Ludu jam.

³⁰Ludu huli jooɗaago haa Co'ar. Ngam maajum o wurti wuro man, o wa'i hooseere, o jooɗi ton nder lowol, kaŋko e ɓiyiiko'en rewɓe ɗiɗo.

³¹Nden afo wi'i minyum: “Baaba meeɗen naywi, walaa gorko boo nder lesdi mo warata nasta haa meeɗen fodde ɗabiya duniyaaru fuu.

³²War, njarnen baaba meeɗen nguykinoojam, nden mbaalden bee maako, ngam keɓen danygol diga maako.”

³³Jemma maajum ɓe njarni baaba maɓɓe nguykinoojam. Afo nasti, waaldi bee baaba mum. Baaba anndaa ndey ɓiyum wari waali e ndey o ummi.

³⁴Jaŋngo maajum afo wi'i minyum: “Ndaa, mi waaldi haŋki bee baaba am. Sey en nguykina mo jemmaare nde'e boo. Nden waaldu bee maako an boo, ngam keɓen danygol diga baaba meeɗen.”

³⁵Jemmaare maajum boo ɓe njarni baaba maɓɓe nguykinoojam. Ɗiɗaɓo yehi, waaldi bee maako. Baaba anndaa ndey ɓiyum wari waali e ndey o ummi.

³⁶Ɓiɓɓe Ludu ɗiɗo ndeedi diga baaba maɓɓe.

³⁷Afo danyi ɓiɗɗo gorko, inndi ɗum Mo'ab[29]. Kaŋko woni baaba Mo'abi'en hannde.

³⁸Ɗiɗaɓo boo danyi ɓiɗɗo gorko, inndi ɗum Ben-Ammi[30]. Kaŋko woni baaba Ammooni'en hannde.