Read Fulfulde Laataanooji 23 Bible Online

Laataanooji 23 - Fulfulde bible

Laataanooji 23

¹Saraatu yeeɗi duuɓi teemerre bee noogas e joweeɗiɗi (127).

²O maayi haa Kiriyat-Arba, waato Heburuun, nder lesdi Kanaana. Ibrahiima wari mayiti Saraatu, debbo muuɗum.

³Nden o ummi, o acci maayɗo maako. O wolwani ɓiɓɓe Heti, o wi'i:

⁴“Mi jananno, mi koɗo haa mooɗon. Ndokkeeɗam mi mara pellel yenaande haa mooɗon, haa mi uwa maayɗo am”.

⁵Ɓiɓɓe Heti njaabi Ibrahiima:

⁶“Naywa, nan min! Allah waɗi ma a tedduɗo caka amin, uw maayɗo ma nder yenaande ɓurnde genaale amin fuu wooɗugo. Walaa goɗɗo nder amin haɗata ma yenaande mum, ngam uwa maayɗo ma.”

⁷Nden Ibrahiima ummi, sujidi yeeso danygol Heti, yimɓe lesdi maajum,

⁸o wi'i ɓe: “To on njaɓani yam mi uwa maayɗo am haa ɗo, nananeeɗam e ƴamaneeɗam Efruuna ɓii Cohar,

⁹o hokkammi lowol Makpela, maral maako, haa timmitorde ngesa maako. O soorrammi ngol bee saman keewɗo, mi mara pellel yenaande caka mooɗon.”

¹⁰Efruuna, Hetiijo, ɗonno jooɗi caka ɓiɓɓe Heti, o jaabi Ibrahiima yeeso Heti'en e wonɓe haa dammugal berniwol muuɗum fuu:

¹¹“Naa non, naywa! Nanam, mi hokki ma ngesa man meere, bee lowol nder maaka fuu. Yeeso yimɓe ummaatoore am mi hokki ma ngol, ngam a uwa maayɗo ma.”

¹²Ibrahiima sujidi yeeso yimɓe lesdi maajum.

¹³O wolwani Efruuna yeeso maɓɓe fuu, o wi'i: “Useni nanam! Mi yoɓete saman ngesa, jaɓ ɗum, nden mi uwa maayɗo am ton.”

¹⁴Efruuna jaabi Ibrahiima:

¹⁵“Naywa, nanam! Lesdi ndi saman mum ceede cardi teemeɗɗe nayi, ɗum ɗume hakkunde ma e am? Uw maayɗo maaɗa!”

¹⁶Ibrahiima narri bee Efruuna. O foondani mo saman mo o wolwi ɗum yeeso ɓiɓɓe Heti: Ceede cardi teemeɗɗe nayi, pottananɗe filooɓe.

¹⁷Bana non ngesa Efruuna haa Makpela, gal fuunaaŋge Mamre e lowol nder maaka e leɗɗe gonɗe haa ngesa haa keeri maaka fuu,

¹⁸ɗum laati maral Ibrahiima yeeso Heti'en fuu tawaaɓe haa dammugal berniwol maako.

¹⁹Ɓaawo maajum Ibrahiima uwi debbo mum Saraatu nder lowol haa ngesa Makpela, tiitotiri bee Mamre, waato: Heburuun, nder lesdi Kanaana.

²⁰Bana nii ngesa e lowol nder maaka laatanaaki Heti'en fahin, ɗum warti maral Ibrahiima, ngam pellel yenaande uwugo maayɓe mum.