Read Fulfulde Laataanooji 25 Bible Online

Laataanooji 25 - Fulfulde bible

Laataanooji 25

¹Ibrahiima te'i debbo feere, innde maako Ketura.

²O danyani mo Zimran e Yoksan e Medaan e Mediyan e Yisbak e Suhak.

³Yoksan danyi Seba e Dedan. Ɓiɓɓe Dedan ngoni: Assuuri'en e Letusi'en e Lewmi'en.

⁴Ɓiɓɓe Mediyan ngoni: Efa e Efer e Hanok e Abida e Elda'a. Ɓe fuu ɓe yimɓe danygol Ketura.

⁵Ibrahiima hokki Isiyaaku mardi muuɗum fuu.

⁶Ɓiɓɓe sulaaɓe maako boo, o hokki ɓe dokke. Hiddeko o maaya o neli ɓe haa fuunaaŋge, daayiiɗum bee ɓiyiiko Isiyaaku.

⁷Ibrahiima waɗi duuɓi teemerre e cappanɗe joweeɗiɗi e jowi (175).

⁸Ɓaawo ndottaaku mbooɗŋgu keewŋgu e caftuki balɗe, o maayi, o hawtoyi bee kaakiraaɓe maako.

⁹Ɓiɓɓe maako: Isiyaaku e Isma'iilu uwi mo nder lowol Makpela haa ngesa Efruuna ɓii Cohar Hetiijo, haa fuunaaŋge Mamre.

¹⁰Ibrahiima soodno ngesa ka'a haa Heti'en. Ton Ibrahiima e debbo muuɗum Saraatu uwa.

¹¹Ɓaawo maayde Ibrahiima, Allah barkiɗini Isiyaaku, ɓiyiiko. Isiyaaku jooɗi haa kommbi ɓulndu Lahay-Roy.[37]

¹²Ndaa habaru danygol Isma'iilu ɓii Ibrahiima, mo Hajara Misraajo, korɗo Saraatu, danyani ɗum.

¹³Ndaa inɗe ɓiɓɓe Isma'iilu bee tokkindirki: Nebayot woni afo Isma'iilu, nden Keedar e Adbeel e Mipsaam

¹⁴e Misma e Duuma e Massa

¹⁵e Hadat e Teema e Yetuuru e Naafis e Keduma.

¹⁶Kamɓe ngoni ɓiɓɓe Isma'iilu sappo e ɗiɗo, ɓe inndi gure maɓɓe e caŋngeeje maɓɓe bee inɗe maɓɓe.

¹⁷Isma'iilu waɗi duuɓi teemerre e cappanɗe tati e joweeɗiɗi (137). Nden o maayi, o hawtoyi bee kaakiraaɓe maako.

¹⁸Danygol maako jooɗi hakkunde Hawila bee Sura, gal fuunaaŋge Misra, gal laawol yahugo Assuura. Ɓe njooɗi daayiiɗum bee banndiraaɓe maɓɓe fuu.

¹⁹Ndaa habaru danygol Isiyaaku ɓii Ibrahiima:

²⁰Isiyaaku woodino duuɓi cappanɗe nayi yaake o te'i Rebekka, ɓii Betu'iila Aramiijo, mo lesdi Paddan-Aram, deerɗiraawo Laban.

²¹O tori Jawmiraawo ngam daliila debbo maako, ngam o dimaro. Jawmiraawo jaɓi tornde maako, debbo maako Rebekka reedi.

²²Ɓikkoy ciwtukoy ɗonno lukkindira nder reedu maako. O wi'i: “To non ɗum laatake kam, ngam ɗume ɗum warani yam?” O yehi ƴamugo Jawmiraawo.

²³Jawmiraawo wi'i mo: “Ummaatooje ɗiɗi ngoni nder reedu ma, jama'aaje ɗiɗi cenndoto diga wurtaago maaje nder reedu ma. Jama'aare woore ɓuran ndeya semmbe, mawniraawo huuwanan minyiraawo.”

²⁴Saa'i danyugo maako yotti, ɗum siwtuɓe ngoni nder reedu maako.

²⁵Arano wurti, o boɗeejo, o fuu maako bana alkibbaare sannyaande bee gaasa. Ɓe inndi mo Isuwa[38].

²⁶Ɓaawo man deerɗiiko wurti, juŋngo maako jogi teppere Isuwa. Ɓe inndi mo Yaakubu[39]. Isiyaaku mari duuɓi cappanɗe joweego, saa'i ɓe ndanya.

²⁷Ɓiɓɓe worɓe ɓe'e mawni. Isuwa laati gawjo baawɗo, goɗɗo ladde. Yaakubu laati de'uɗo, mo ɗonno tum haa saare.

²⁸Isiyaaku yiɗi Isuwa, ngam kusel ladde welani hunnduko maako. Ammaa Rebekka yiɗi Yaakubu.

²⁹Nyanndere go Yaakubu waɗi nyaamdu, Isuwa boo warti ladde, o comɗo.

³⁰Isuwa wi'i Yaakubu: “Accu mi nyaama boɗeejum ɗu'um ngam mi comɗo.” Ngam maajum o ewna Edoom[40].

³¹Yaakubu jaabi: “Soorranam daraja afaaku ma hannde nden tawon.”

³²Isuwa wi'i: “Ndaa, mi ɗon maaya, ɗume afaaku man nafatammi?”

³³Yaakubu wi'i: “Hunanam tawon!” O hunani mo, o soorrani Yaakubu daraja afaaku maako.

³⁴Nden Yaakubu hokki Isuwa tamseere bee irin nyebbe defaaɗe. O nyaami, o yari, nden o ummi, o dilli. Bana non Isuwa yawri daraja afaaku muuɗum.