Read Fulfulde Laataanooji 30 Bible Online

Laataanooji 30 - Fulfulde bible

Laataanooji 30

¹Nde Rahiilu yi'i o danyanaay Yaakubu ɓiɓɓe, o haaji deerɗiiko. O wi'i Yaakubu: “Hokkam ɓikkoy malla boo mi maaya.”

²Yaakubu ɓernani Rahiilu, o wi'i: “Kadi min mi Allah, kaɗɗo ma heɓugo ɓiŋngel na!”

³Rahiilu wi'i: “Ndaa korɗo am Bilha. Hawtu bee maako ngam o danya dow koppi am, daliila maako min boo mi heɓa ɓikkoy.”

⁴O hokki mo korɗo maako Bilha. Yaakubu hawti bee maako.

⁵Bilha reedi, danyani Yaakubu ɓiɗɗo gorko.

⁶Rahiilu wi'i: “Allah waɗani yam gooŋgaaku, o nani tornde am e hokki yam ɓiɗɗo.” Ngam maajum o inndi mo Dan[52].

⁷Bilha, korɗo Rahiilu, reedi kadiboo, danyani Yaakubu ɓiɗɗo ɗiɗaɓo.

⁸Rahiilu wi'i: “Haɓre wulnde jaw kaɓmi bee deerɗiraawo am, mi jaalake boo.” O inndi mo Neftali[53].

⁹Nde Leya yi'i o acci danyugo, o hoo'i korɗo maako Zilpa, o hokki mo Yaakubu.

¹⁰Zilpa, korɗo Leya, danyani Yaakubu ɓiɗɗo gorko.

¹¹Leya wi'i: “Mi waɗi saa'a!” O inndi mo Gada[54].

¹²Zilpa, korɗo Leya, danyani Yaakubu ɓiɗɗo ɗiɗaɓo.

¹³Leya wi'i: “Mi heɓi barka! Ngam ɓiɓɓe rewɓe mbi'atam barkiɗinaaɗo.” O inndi mo Aser[55].

¹⁴Nyanndere feere yaake wa'ugo alkamaari, Ruben yehi haa gese. O tawi ɓiɓɓe leɗɗe jooɗooje[56] haa ngesa, o waddani daada maako Leya. Rahiilu wi'i Leya: “Useni, hokkam jooɗooje seɗɗa diga ɗe ɓiɗɗo ma?”

¹⁵Leya jaabi: “A jaɓti yam gorko, ɗum he'aay ma na? A yiɗi hoo'ugo jooɗooje ɓiɗɗo am boo na?” Rahiilu wi'i: “Booɗɗum! Sey o waalda bee ma jemmaare nde'e ngam mbattudi jooɗooje ɓiɗɗo ma.”

¹⁶Kiikiiɗe, nde Yaakubu ɗon wartoya diga ngesa, Leya wurti, fottoyi bee maako, wi'i mo: “Sey a nasta haa am, ngam mi hoo'i ma mbattudi jooɗooje ɓiɗɗo am.” Yaakubu hawti bee maako jemmaare maajum.

¹⁷Allah nanani Leya tornde muuɗum, o reedi, o danyani Yaakubu ɓiɗɗo njowaɓo.

¹⁸O wi'i: “Allah hokki yam mbarjaari am, ngam mi hokki korɗo am haa gorko am.” O inndi mo Issakar[57].

¹⁹Leya reedi kadiboo, o danyani Yaakubu ɓiɗɗo njoweegoojo.

²⁰O wi'i: “Allah hokki yam caahu mbooɗŋgu masin. Ngam jonta kam, gorko am teddintam, ngam mi danyani mo ɓiɓɓe njoweego.” O inndi mo Zabulon[58].

²¹Ɓaawo maajum o danyi ɓiɗɗo debbo, o inndi mo Dina.

²²Nden Allah siftori Rahiilu. Allah nani tornde maako, waɗi mo o danyoowo.

²³O reedi, o danyi ɓiɗɗo gorko. O wi'i: “Allah ittani yam mbustu am kadi.”

²⁴O inndi mo Yusufu[59]. O wi'i “Jawmiraawo ɓesdanammi ɓiɗɗo goɗɗo.”

²⁵Ɓaawo Rahiilu danyi Yusufu, Yaakubu wi'i Laban: “Accam mi loro haa nokkuure am e lesdi am.

²⁶Hokkam rewɓe am e ɓikkoy am ɓe kuuwanmaami ngam muuɗum'en, mi dilla. A anndi kuugal ngal mi huuwani ma.”

²⁷Laban jaabi: “Accu mi heɓa mo'ere yeeso ma. Nde mi waɗi hatti, mi faami Jawmiraawo barkiɗini yam ngam daliila maaɗa.

²⁸Wi'am ngeenaari ma, mi hokkete ndi.”

²⁹Yaakubu wi'i: “A anndi bana noy mi huuwrani ma. A anndi boo no dabbaaji ma laatori bee am.

³⁰Ɗum ko marɗa hiddeko mi wara ɗuuɗaayno. Jonta ɗum ɓesdi masin. Jawmiraawo barkiɗini ma diga mi wari saare ma. Jonta kam, ndey kuuwanmi ngam saare am?”

³¹Laban ƴami: “Ɗume ndokkanmaami?” Yaakubu jaabi: “Taa hokkam koo ɗume! To a waɗani yam ko mi tammi ƴamugo ma, mi fuɗɗitan durugo dammooji ma, mi aynan ɗi.

³²Hannde mi saaloto caka tokke fuu. Mi wurtinan cirgum e jamalum e ɓaleejum caka baali fuu, non boo cirgum e jamalum caka be'i fuu. Kanjum laatoto ngeenaari am[60].

³³Gooŋgaaku am waŋgan jaŋngo, to a wari laarugo ngeenaari am. Ko laataaki cirgum malla jamalum caka be'i e ɓaleejum caka baali, ɗum laato haa am gujjaaɗum.”

³⁴Laban wi'i: “Booɗɗum, en ngaɗa bana mbi'ɗa.”

³⁵Nyalaade man nden Laban wurtini jawɗi be'i diidaaɗi e jamali fuu, non boo be'i cirgi e jamali, waato marɗi daneejum fuu e baali ɓaleeji fuu. O hokki ɗum haa juuɗe ɓiyiiko'en.

³⁶O dilli jahaaŋgal daayiiŋgal seɗɗa, baakin yahdu nyalɗe tati hakkunde maako e Yaakubu. Yaakubu duri luttuɗi tokkere Laban go.

³⁷Yaakubu itti cabbi kecci haa leɗɗe tati feere feereeje, o hefi ɗi haa ciifi daneeji mbaŋgi.

³⁸O darni cabbi man yeeso keeleeje haa dammooji ngarata yara. Nde dammooji ngarata yarugo fuu, ɗi ɗon ngoowrindira.

³⁹Dammooji ngoowrindiri saa'i ɗi ngarata gal cabbi ɗi'i. Ɓaawo maajum ɗi ndimi diidaaɗi e cirgi e jamali.

⁴⁰Yaakubu senndi ɓiɓɓe dammooji. O wayliti ɗi dow diidaaɗi e ɓaleeji caka dabbaaji Laban. Bana non o waarani hoore maako tokkere, o hawtaay nde bee tokke Laban fahin.

⁴¹Koo ndeye dammooji cemmbiɗɗi ngoowrindiri fuu, Yaakubu darni cabbi yeeso keeleeje, haa gite dammooji. Non ɗi ngoowrindiri baŋnge cabbi.

⁴²To ɗum dammooji pooyɗi, o darnataa cabbi go. Bana non pooyɗi laatani Laban e cemmbiɗɗi boo ɗi Yaakubu.

⁴³Yaakubu faggi jawdi, o mari dammooji ɗuuɗɗi e horɓe e maccuɓe e geelooɗi e bamɗe.