Read Fulfulde Laataanooji 32 Bible Online

Laataanooji 32 - Fulfulde bible

Laataanooji 32

¹Jaŋngo maajum, Laban dawi cub, jaɓɓiti ɓiɓɓe mum rewɓe e taaniraaɓe mum, barkiɗini ɓe. Nden o lorti haa maako.

²Yaakubu tokkiti laawol muuɗum. Malaa'ika'en Allah ngari, potti bee maako.

³Nde o yi'i ɓe, o wi'i: “Ɗum saŋngeere Allah!” O inndi nokkuure maajum Mahanayim[63].

⁴Yaakubu neli nelaaɓe yeeso muuɗum haa deerɗum Isuwa haa lesdi Se'ir nder kawye lesdi Edoom.

⁵O umri ɓe: “Ndaa nii mbi'oton jaagorɗo am Isuwa: Maccuɗo ma Yaakubu wi'i ni'i: Mi faɓɓi haa Laban, mi njooɗi ton haa wargo jonta.

⁶Mi woodi na'i e bamɗe e dammooji e maccuɓe e horɓe. Mi neli anndingo ɗum jaagorɗo am, ngam mi heɓa mo'ere yeeso ma.”

⁷Nelaaɓe go ngarti haa Yaakubu, mbi'i mo: “Min njehi haa deerɗiraawo ma Isuwa. Kaŋko boo o ɗon wara fottugo bee maaɗa bee worɓe teemeɗɗe nayo.”

⁸Yaakubu hultori masin, o tampi. Nden o senndi yimɓe wonduɓe bee maako e dammooji e na'i e geelooɗi caŋngeeje ɗiɗi.

⁹O numi: “To Isuwa ukkanake saŋngeere woore, woɗnde daɗan.”

¹⁰Yaakubu tori: “Yaa Allah mo maama am Ibrahiima e baaba am Isiyaaku, yaa Jawmiraawo, bi'ɗo yam: Lorta haa lesdi ma e banndiraaɓe ma, mi woonante!

¹¹Mi he'aay mbooɗeeŋga fuu e gooŋgaaku maaɗa fuu ko a waŋginani yam, min maccuɗo ma. Mi eeri maayo Urdun bee sawru am tan, jonta mi waɗi caŋngeeje ɗiɗi.

¹²Mi tori ma hisnam juŋngo deerɗiraawo am, diga juŋngo Isuwa! Mi ɗon hula mo, ngam taa o wara o halka yam e rewɓe bee ɓikkoy fuu.

¹³Siftor ko a wi'no: Mi woonante fakat, mi ɗuɗɗinan danygol maaɗa bana njaareendi maayo, ndi limataake.”

¹⁴Yaakubu waali ton jemmaare maajum. Haa caka dabbaaji maako, o hoo'i goɗɗum, ngam o saaha deerɗiiko Isuwa:

¹⁵be'i teemeɗɗe ɗiɗi e jawɗi be'i noogas, baali teemeɗɗe ɗiɗi e jawɗi baali noogas,

¹⁶geelooɗi musininanɗi cappanɗe tati e moli maaji, na'i cappanɗe nayi e ga'i kalhali sappo, non boo bamɗe debbe noogas e gorɗe sappo.

¹⁷O sennditi ɗum tokkere tokkere, o hokki ɗum huuwooɓe maako. O wi'i ɓe: “Arde yeeso am, ndaaytine tokkere fuu bee woɗnde.”

¹⁸O umri arano, o wi'i: “To deerɗiraawo am Isuwa fotti bee ma, ƴami ma: Moy jeyi ma, toy njahataa, moy jeyi ɗum ko woni yeeso ma? —

¹⁹Sey a wi'a: Ɗum maccuɗo ma Yaakubu. O neldi caahu ngu'u haa jaagorɗo maako Isuwa. Ndaa, kaŋko bee hoore maako o ɗon wara ɓaawo amin.”

²⁰Non boo o umri ɗiɗaɓo e tataɓo e tokkiiɓe tokke fuu. O wi'i: “Kanjum mbi'oton jaagorɗo am Isuwa, to on potti bee maako.

²¹Ngecce mo: Maccuɗo ma Yaakubu bee hoore mum ɗon wara ɓaawo amin.” Yaakubu tammi: “Mi de'itinan mo bee caahu ardotooŋgu yeeso am. Nden mi yi'an yeeso maako, teema o jaɓɓoto yam.”

²²Caahu go ardi mo, kaŋko kam o waali jemmaare maajum nder saŋngeere.

²³Nder jemmaare maajum Yaakubu ummi, hoo'i rewɓe muuɗum ɗiɗo e horɓe muuɗum ɗiɗo e ɓikkoy muuɗum sappo e ngo'o, eeri eerorde maayo Yabbok.

²⁴O eerni ɓe, o eerni boo ko o mari fuu.

²⁵Yaakubu lutti feere muuɗum. Goɗɗo haɓi bee maako haa subaha waɗi.

²⁶Nde goɗɗo go yi'i o waawataa jaalaago Yaakubu, o fiyi mo haa asaaŋgal, ngal sokkiti yaake ɓe ɗon ngaɗa gala.

²⁷Goɗɗo go wi'i: “Yooftam, ngam subaha waɗi.” Ammaa Yaakubu jaabi: “Mi yooftataa ma, sonaa to a barkiɗini yam.”

²⁸O ƴami Yaakubu: “Noy innde ma?” O jaabi: “Yaakubu.”

²⁹O wi'i: “A ewnataake Yaakubu fahin, ammaa Isra'iila[64]. Ngam a haɓi bee Allah e bee yimɓe, a jaalake.”

³⁰Yaakubu ƴami mo: “Anndinam innde ma.” O jaabi: “Ngam ɗume ƴamata yam innde?” Nden o barkiɗini Yaakubu.

³¹Yaakubu inndi nokkuure maajum Peniyel[65], ngam o wi'i: “Mi yi'i yeeso Allah, bee maajum fuu yoŋki am hisi.”

³²Naaŋge fuɗi yaake o saali Peniyel, o ɗon laƴa ngam asaaŋgal maako.

³³Ngam maajum yimɓe Isra'iila nyaamataa ɗaɗol asaaŋgal haa wargo hannde, ngam o naawni ɗaɗol asaaŋgal Yaakubu.