Read Fulfulde Laataanooji 33 Bible Online

Laataanooji 33 - Fulfulde bible

Laataanooji 33

¹Yaakubu laari, yi'i Isuwa ɗon warda bee worɓe teemeɗɗe nayo. O senndani Leya e Rahiilu e horɓe ɗiɗo go ɓikkoy.

²O darni horɓe bee ɓikkoy muuɗum'en haa yeeso, nden Leya bee ɓiyum'en, ɓaawo boo Rahiilu bee Yusufu.

³Ammaa kaŋko o ardi ɓe. O sujidi nde joweeɗiɗi hiddeko o ɓadito deerɗiiko.

⁴Nden Isuwa yaawɗi, fotti bee maako, hebbi mo, harli mo daande, ɓe ɗiɗo fuu ɓe mboyi.

⁵Nde Isuwa ɓaŋgti gite, o yi'i rewɓe e ɓikkoy, o ƴami: “Ɗum ɓeye ngondi bee maaɗa?” Yaakubu jaabi: “Ɗum ɓikkoy koy Allah nder mo'ere muuɗum hokki maccuɗo ma.”

⁶Horɓe ɓaditi bee ɓiyum'en fuu, ɓe cujidi.

⁷Leya boo ɓaditi bee ɓiyum'en, cujidi. Ɓaawo maajum Yusufu e Rahiilu ɓaditi, cujidi.

⁸Isuwa ƴami: “Ɗume ngiɗɗaa bee tokke ɗe pottumi?” O jaabi: “Haa mi heɓa mo'ere yeeso maaɗa.”

⁹Isuwa wi'i: “Deerɗiraawo am, mi woodi mardi boo ɗuuɗndi, joga ko marɗa.”

¹⁰Yaakubu wi'i: “Naa non. To mi heɓi mo'ere yeeso maaɗa, useni, jaɓ caahu ngu'u diga juŋngo am. Ngam mi laari yeeso ma bana goɗɗo laardata yeeso Allah, a jaɓɓi yam booɗɗum.

¹¹Useni jaɓ caahu ngu mi neldani ma, ngam Allah mo'ani yam ɗum, mi sooyaay koo ɗume.” O tori mo ɗuuɗɗum, nden Isuwa jaɓi.

¹²Isuwa wi'i: “Ummen, ndillen. Mi ardoto yeeso ma.”

¹³Yaakubu wi'i mo: “Jaagorɗo am, anndu no ɓikkoy koy tampukoy, mi woodi boo baali e na'i musininanɗi. To mi ɓilli ɗi bee yahdu koo nyalaade woore tan, dammooji fuu mbaatdan.

¹⁴Jaagorɗo am ardo yeeso maccuɗo muuɗum. Min, mi yahan bee hakkiilo deydey yahdu dabbaaji gonɗi yeeso am e deydey yahdu ɓikkoy, haa mi wara mi yotto jaagorɗo am haa Se'ir.”

¹⁵Isuwa wi'i: “Mi accan yimɓe am woɗɓe bee maaɗa.” Yaakubu jaabi: “Ngam ɗume? To mi heɓi mo'ere yeeso maaɗa kam, ɗum he'i yam.”

¹⁶Nyalaade maajum Isuwa lori dow laawol muuɗum gal Se'ir.

¹⁷Ammaa Yaakubu ummi, yehi Sukkot. Ton o mahani hoore maako suudu, o waɗani dabbaaji maako boo bukkaaji. Ngam maajum o inndi nokkuure nde'e: Sukkot[66].

¹⁸Nde Yaakubu lortoyi diga Paddan-Aram, o yotti jam haa wuro Sikem nder lesdi Kanaana. O saŋngini yeeso wuro.

¹⁹O soodi tayre ngesa ceede cardi teemerre diga ɓiɓɓe Hamor, haa o darnuno laymaaru maako.

²⁰O nyiɓi hirsirde boo, o inndi nde: Allah mo ɗowanteeɗo Isra'iila.