Read Fulfulde Laataanooji 37 Bible Online

Laataanooji 37 - Fulfulde bible

Laataanooji 37

¹Yaakubu jooɗi nder lesdi Kanaana, haa baaba maako jooɗino.

²Ndaa habaru danygol Yaakubu: Yusufu suka, marino duuɓi sappo e joweeɗiɗi, o ɗonno durda bee deerɗiiko'en, ɓiɓɓe Bilha e ɓiɓɓe Zilpa, rewɓe baaba maako. Yusufu yecci baaba muuɗum kalluka ka ɓe mbolwata.

³Isra'iila ɓuri yiɗugo Yusufu dow ɓiɓɓe muuɗum fuu, ngam o danyi mo nder ndottaaku maako. O waɗani mo ngapaleewol jaage.

⁴Nde deerɗiraaɓe maako ngi'i baaba maɓɓe ɓuri yiɗugo mo dow deerɗiraaɓe maako fuu, ɓe nganyi mo, ɓe mbolwanaay mo nder neɗɗaaku sam.

⁵Nyalaade woɗnde, Yusufu hoyɗi. O yecci ɗum deerɗiiko'en. Ɓe ɓurti wanyugo mo fahin.

⁶O wi'i: “Nane koyɗol ngol koyɗumi:

⁷En ɗonno kaɓɓa ƴommbe haa ngesa. Haɓɓere am ummi, dari cir. Kaɓɓe mooɗon taari nde, cujidani nde.”

⁸Deerɗiraaɓe maako ƴami mo: “A yiɗi laamanaago min bana laamiiɗo malla jaagorɗo amin kadi?” Ɓe ɓurti wanyugo mo fahin ngam koyɗi maako e bolle maako.

⁹O hoyɗi koyɗol goɗŋgol fahin. O yecci ngol deerɗiraaɓe maako, o wi'i: “Ndaa koyɗol goɗŋgol koyɗumi: Naaŋge e lewru e koode sappo e go'o cujidani yam.”

¹⁰O yecci ɗum baaba maako e deerɗiiko'en. Baaba maako telɓani mo, wi'i: “Ɗume koyɗol ngol koyɗuɗa? Kadi min ngaran, min e daada ma e deerɗiraaɓe ma, min cujida yeeso maaɗa na?”

¹¹Deerɗiraaɓe maako kaaji mo, ammaa baaba maako tokki numtugo ɗum.

¹²Deerɗiraaɓe Yusufu njehi haa Sikem ngam durugo dammooji baaba muuɗum'en.

¹³Isra'iila wi'i Yusufu: “Naa deerɗiraaɓe maaɗa ɗon ndura dammooji haa Sikem? War, mi nele haa maɓɓe.” Yusufu jaabi: “Ndaa yam.”

¹⁴Yaakubu wi'i mo: “Yah, laar njamu deerɗa'en e njamu dammooji, waddanam habaru.” O neli mo diga waadiwol Heburuun. Yusufu yehi Sikem.

¹⁵Goɗɗo tawi mo, o ɗon yiilo nder ladde. O ƴami mo: “Ko ɗaɓɓititta?”

¹⁶O wi'i: “Mi ɗon ɗaɓɓita deerɗiraaɓe am. Useni tinndinam toy ɓe ndurata!”

¹⁷Goɗɗo go wi'i: “Ɓe ummake haa ɗo. Mi nani ɓe ɗonno mbi'a: Ndillen haa Dotan.” Yusufu taasni deerɗum'en, tawi ɓe haa Dotan.

¹⁸Ɓe eewi mo diga daayiiɗum. Hiddeko o ɓadito ɓe, ɓe kaɓɓi dabare mbarugo mo.

¹⁹Ɓe mbi'mbi'tiri: “Ndaa, koyɗoowo ɗon wara!

²⁰Jonta kam ngare, en mbara mo, cakkinen mo nder ɓulndu. Nden en mbi'a huunde ladde nyaami mo. En ngi'a ɗume koyɗi maako laatoto.”

²¹Ruben nani ɗum. O ɗaɓɓi hisnugo mo juuɗe maɓɓe, o wi'i: “Taa mbaren mo!

²²Nden o ɓesdi wi'ugo: Taa ndufe ƴiiƴam! Ndikka on cakkina mo nder ɓulndu haa ɗo nder ladde. Ammaa taa meeme mo.” Ɗo ngam hisnugo mo diga juuɗe maɓɓe, o lorna mo haa baaba maako.

²³Nde Yusufu yotti deerɗum'en, ɓe ɓorti mo ngapaleewol jaage ngol o ɓornino.

²⁴Ɓe koo'i mo, ɓe cakkini mo nder ɓulndu. Ɗum ɓulndu yoorndu, ndu walaa ndiyam.

²⁵Nden ɓe njooɗi ngam nyaamugo. Ɓe ɓaŋgti gite, ɓe ngi'i yimɓe filooɓe ɓe asŋgol Isma'iilu ɗon ngara diga Gile'at. Geelooɗi maɓɓe ɗon ndimndi uurle e ɗaccere uurnde e leɗɗe uurɗe. Ɓe ɗon njahra ɗum haa Misra.

²⁶Yahuuda wi'i deerɗiraaɓe mum: “Riba kaye keɓeten to en mbari deerɗiraawo meeɗen, en cuuɗi ƴiiƴam maako?

²⁷Ngare, coorren mo haa filooɓe ɓe asŋgol Isma'iilu, taa en meema mo. Ngam o deerɗiraawo meeɗen, o ɓanndu meeɗen.” Deerɗiraaɓe maako nanani mo.

²⁸Filooɓe Mediyan'en ɗonno caalo. Deerɗiraaɓe Yusufu ngurtini mo diga ɓulndu. Ɓe coorri mo haa filooɓe ɓe asŋgol Isma'iilu ceede cardi noogas. Kamɓe boo ɓe njahri mo haa Misra.

²⁹Nde Ruben lorti haa ɓulndu, o tawaay Yusufu. O seeki limce maako.

³⁰O lorti haa deerɗiraaɓe maako o wi'i: “Derkeejo walaa ton. Toy njahanmi min?”

³¹Ɓe kirsi njawdiri mbeewa, ɓe cuuwi ngapaleewol Yusufu nder ƴiiƴam.

³²Ɓe neldi ngol baaba maɓɓe, bee wi'go: “Ɗo ko min tawi. Laar, ɗum ngapaleewol ɓiya malla naa kaŋgol?”

³³Yaakubu annditi ngol, wi'i: “Ɗum ngapaleewol ɓiyam! Huunde ladde nyaami mo! Fakat Yusufu seekaama.”

³⁴O seeki limce maako, o taadi limce buhuuje. O woyi ɓiyiiko nyalɗe ɗuuɗɗe.

³⁵Ɓiɓɓe maako worɓe e rewɓe fuu ngari ngam de'itingo mo, ammaa o sali de'itineego. O wi'i: “Bee mettamɓeram kawtoyanmi bee ɓiyam nder joonde maayɓe.” Nden o tokki woyugo mo.

³⁶Mediyan'en go coorri Yusufu haa Misra, haa Potifar, saraakiijo Firawna. O mawɗo doogari'en.