Read Fulfulde Laataanooji 41 Bible Online

Laataanooji 41 - Fulfulde bible

Laataanooji 41

¹Ɓaawo duuɓi ɗiɗi Firawna hoyɗi. O yi'i o ɗon dari dow fomoonde maayo Niil.

²O yi'i na'i joweeɗiɗi ngurti maayo, ɗi booɗɗi, payɗi. Ɗi puɗɗi durugo haa fomoonde man.

³Ɓaawoɗon na'i goɗɗi joweeɗiɗi ngurti maayo. Ɗi nyidduɗi e pooyɗi. Ɗi ndari kommbi na'i arani go dow fomoonde maayo.

⁴Na'i nyidduɗi pooyɗi nyaami booɗɗi payɗi joweeɗiɗi go. Nden Firawna fini.

⁵O ɗaaniti kadiboo, o hoyɗi nde ɗiɗawre. Ndaa, cammeeje mawɗe booɗɗe joweeɗiɗi ngurti e ƴommbal gootal.

⁶Ɓaawo maaje, cammeeje joweeɗiɗi goɗɗe puɗi, ɗe cewɗe, henndu fuunaaŋge yoorni ɗe.

⁷Cammeeje cewɗe moɗi mawɗe, keewɗe joweeɗiɗi go. Firawna fini, tawi ɗum koyɗol.

⁸Nde weeti, hakkiilo maako sakli. O ewnoyi hiila'en e hikma'en Misra fuu. O yecci ɓe koyɗol maako, ammaa walaa koo gooto mo fassitirani mo ngol.

⁹Nden dokkoowo laamiiɗo njaramji go wi'i Firawna: “Barkaama, sey mi anndita aybe am hannde.

¹⁰Nyalaade woɗnde a tikkani huuwanooɓe ma masin, a maɓɓi yam nder suudu mawɗo aynooɓe, min bee hooreejo tamsanooɓe ma tamseeje.

¹¹Min koyɗi min ɗiɗo fuu jemmaare woore. Ammaa maana koyɗol ngole fuu feerotiri bee ngola.

¹²Woodino sukaajo Ibraniŋkeejo maccuɗo mawɗo aynooɓe bee amin. Min ngecci mo koyɗi amin, o fassitiri maana koyɗol koo moy fuu.

¹³Bana o fassitirani min, non ɗum laatani min boo: A lorni yam haa pellel am, oya boo ɓe ɓili ɗum.”

¹⁴Firawna umri ɓe ngadda Yusufu. Law ɓe ngurtini mo fursina. Yusufu laɓi, ɓorni limce laaɓɗe, o wari yeeso Firawna.

¹⁵Firawna wi'i mo: “Mi hoyɗi, walaa baawɗo fassitirgo ngol. Ammaa mi nani a waawi fassitirgo koyɗi ɗi ɓe anndinte.”

¹⁶Yusufu jaabi Firawna: “Naa ɗum min! Ɗum Allah hokkata fassaruuye haandunde haa Firawna.”

¹⁷Firawna wi'i Yusufu kadi: “Nder koyɗol am, tawmi mi ɗon dow fomoonde maayo Niil.

¹⁸Ndaa, na'i joweeɗiɗi payɗi, booɗɗi ngurti maayo. Ɗi puɗɗi durugo haa fomoonde man.

¹⁹Ɓaawo maaji, goɗɗi joweeɗiɗi ngurti. Ɗi nyidduɗi, pooyɗi masin. Mi meeɗaay yi'ugo ɓurɗi ɗi'i nyiddugo nder lesdi Misra fuu.

²⁰Na'i nyidduɗi pooyɗi nyaami na'i joweeɗiɗi payɗi arani go.

²¹Ammaa ɓaawo ɗi nyaami ɗi, walaa keɓtuɗo ɗum, ngam nyiddeeŋga maaji ɗonno bana naane non. Nden mi fini.

²²Mi hoyɗi koyɗol goɗŋgol fahin: Ndaa, cammeeje keewɗe booɗɗe joweeɗiɗi ngurti e ƴommbal gootal.

²³Ɓaawo maaje, cammeeje cewɗe goɗɗe joweeɗiɗi puɗi, henndu fuunaaŋge yoorni ɗe.

²⁴Cammeeje cewɗe moɗi cammeeje booɗɗe joweeɗiɗi go. Mi yecci ɗum hiila'en, ammaa walaa mo waawi fassitirango yam ɗum.”

²⁵Yusufu wi'i Firawna: “Koyɗi ma ɗiɗi ɗi'i, ɗi gooti, barkaama. Allah anndini ma ko o tammi waɗugo.

²⁶Na'i booɗɗi joweeɗiɗi ngoni duuɓi joweeɗiɗi, cammeeje booɗɗe joweeɗiɗi boo ngoni duuɓi joweeɗiɗi. Ɗum koyɗol gootol.

²⁷Na'i nyidduɗi pooyɗi joweeɗiɗi, gurtiiɗi ɓaawo, ɗum duuɓi joweeɗiɗi. Non boo cammeeje cewɗe joweeɗiɗi, ɗe henndu fuunaaŋge yoorni, ɗum duuɓi joweeɗiɗi bee weelo.

²⁸Bana mbi'maami, barkaama, Allah anndini ma ko o tammi waɗugo.

²⁹Ndaa, duuɓi joweeɗiɗi garanɗi, haarannde ɗuuɗnde waɗan nder lesdi Misra fuu.

³⁰Ɓaawo maaji, weelo waɗan duuɓi joweeɗiɗi, haa yimɓe ngejjita haarannde laatunoonde nder Misra. Weelo tampinan lesdi.

³¹Yimɓe ngejjitan ɗume wonno haarannde nder lesdi, ngam weelo ngo'o saatan masin.

³²Nde koyɗol man tokkiti waɗi nde ɗiɗi haa Firawna, ɗum yiɗi wi'go haala ka'a tabiti haa Allah, Allah ɗon yaawɗina waɗugo ɗum.

³³Barkaama, jonta kam, ɗaɓɓitit goɗɗo kakkilɗo, marɗo hikma. Darnu mo dow lesdi Misra.

³⁴Waɗ ɗum, ɓesdu aynooɓe lesdi boo. Kamɓe ɓe koo'a yeɓre woore nder jowi haa nyaamle lesdi Misra fuu nder duuɓi joweeɗiɗi ɗi haarannde.

³⁵Ɓe mooɓta nyaamduuji duuɓi joweeɗiɗi garanɗi booɗɗi ɗi'i fuu. Ɓe mbaɗa ɗum dow ardaaŋgal ma, barkaama! Ɓe mooɓta alkamaari ngam nyaamdu nder gure, ɓe ayna ɗum.

³⁶Nyaamdu maajum laatoto ndesaari lesdi ngam duuɓi joweeɗiɗi bee weelo, ngo tammi waɗugo nder Misra. Bana nii weelo nattidittaa yimɓe lesdi ndi'i.”

³⁷Haala ka'a fottani Firawna e saraaki'en mum fuu.

³⁸Firawna wi'i ɓe: “Gorko moy keɓeten bana oo, mo Ruuhu Allah wondi bee muuɗum?”

³⁹Nden o wi'i Yusufu: “Nde Allah anndini ma ɗum fuu, walaa kakkilɗo, marɗo hikma bana maaɗa.

⁴⁰An laatoto dow saare am, yimɓe am fuu tokkoto umrooje ma, sey bee leeso laamu tan ɓurdanmaami.”

⁴¹Firawna wi'i Yusufu: “Ndaa, mi darni ma dow lesdi Misra fuu.”

⁴²Firawna itti halagaare haa hoondu mum, waɗi nde haa hoondu Yusufu. O ɓorni mo limce ɓurɗe ɗiggugo, o waɗani mo koɗoy kaŋŋeeri haa daande.

⁴³O wa'ini mo dow moota pucci, tokkotooŋga nga laamiiɗo, ɓe kooli yeeso maako: “Kakkile! Laawol![73]” Bana non Firawna darniri mo dow lesdi Misra fuu.

⁴⁴Firawna wi'i Yusufu: “Min woni Firawna. Goɗɗo nder lesdi Misra fuu ɓaŋgtataa juŋngo mum malla kosŋgal mum bilaa duŋayeere ma.”

⁴⁵Firawna inndi Yusufu innde Jafnat-Paneyak, te'ani mo Asnat ɓii Poti-Fera, limanjo haa Oon. Nden Yusufu wurti, taari lesdi Misra fuu.

⁴⁶Yusufu woodi duuɓi cappanɗe tati, saa'i o fuɗɗa huuwango Firawna, laamiiɗo Misra. Yusufu ummi, dilli taaroyaago lesdi Misra.

⁴⁷Nder duuɓi joweeɗiɗi, lesdi rimrimni ɗuuɗɗum masin.

⁴⁸Yusufu mooɓti nyaamdu lesdi Misra fuu nder duuɓi joweeɗiɗi go. O sigi nyaamdu nder gure, nder wuro koo ngoye, o sigi nyaamdu gese taariiɗe wuro maajum.

⁴⁹Yusufu sigi alkamaari ɗuuɗndi masin bana njaareendi maayo, haa ɓe acci etugo, ngam ɗum limataako.

⁵⁰Aarti hitaande nde weelo fuɗɗa, Asnat ɓii Poti-Fera limanjo haa Oon, debbo Yusufu danyani ɗum ɓiɓɓe worɓe ɗiɗo.

⁵¹Yusufu inndi hammiraawo: Manassa[74], o wi'i: “Allah yejjitini yam torra am e saare baaba am fuu.”

⁵²Minyiraawo boo o inndi ɗum: Efrayim[75]. O wi'i: “Allah hokki yam danygol nder lesdi ɓillaare am.”

⁵³Duuɓi joweeɗiɗi ɗi haarannde nder lesdi Misra timmi.

⁵⁴Duuɓi joweeɗiɗi ɗi weelo ngari, bana Yusufu wi'no. Weelo waɗi nder lesɗe fuu, ammaa nder Misra fuu nyaamdu ɗon.

⁵⁵Nde yimɓe nder lesdi Misra nani weelo, ɓe ngookani Firawna ngam heɓugo nyaamdu, ammaa Firawna wi'i Misra'en fuu: “Njehe haa Yusufu, mbaɗe ko o wi'ata on.”

⁵⁶Nde weelo waɗi nder lesdi fuu, Yusufu maɓɓiti cigorɗi alkamaari, o soorrani ndi Misra'en, ngam weelo saati nder lesdi Misra masin.

⁵⁷Yimɓe koo toy nder duniyaaru fuu ngari haa Misra, haa Yusufu, coodi alkamaari, ngam weelo ngo'o saati masin nder duniyaaru fuu.