Read Fulfulde Laataanooji 42 Bible Online

Laataanooji 42 - Fulfulde bible

Laataanooji 42

¹Yaakubu nani alkamaari ɗon haa Misra. O wi'i ɓiyiiko'en: “Koni ndaarndaartirton?

²Mi nani alkamaari ɗon haa Misra. Njehe, coodane en alkamaari haa ton, haa en nguura, taa en maaya.”

³Deerɗiraaɓe Yusufu sappo ndilli soodoygo alkamaari haa Misra.

⁴Yaakubu accaay Benyamin, deerɗiraawo Yusufu yahda bee deerɗum'en. Ngam o wi'i: “Taata sarru heɓa mo.”

⁵Bana non ɓiɓɓe Isra'iila ngardi bee yimɓe woɗɓe soodugo alkamaari, ngam weelo waɗi nder lesdi Kanaana.

⁶Yusufu wonno ngomna lesdi, kaŋko soorranta yimɓe lesdi fuu alkamaari. Deerɗiraaɓe maako ngari, cujidani mo, geese haa lesdi.

⁷Nde o yi'i ɓe, o annditi ɓe. Ammaa o annditinaay ɓe hoore maako. O wolwani ɓe bee caatal, o ƴami: “Diga toy iwɗon?” Ɓe njaabi: “Diga lesdi Kanaana, haa min cooda nyaamdu.”

⁸Yusufu annditi deerɗum'en, ammaa kamɓe, ɓe annditaay mo.

⁹O siftori koyɗi ɗi o hoyɗuno ngam maɓɓe. O wi'i ɓe: “Onon, on horooɓe lesdi! Laarugo nokkuuje tampuɗe lesdi waddi on.”

¹⁰Ɓe njaabi mo: “Naa non, barkaama, min ngari soodugo nyaamdu tan.

¹¹Min fuu min ɓiɓɓe gorko gooto, min hoolaaɓe. Maccuɓe ma laataaki horooɓe.”

¹²O wi'i ɓe: “Aa'a, laarugo nokkuuje lesdi tampuɗe waddi on.”

¹³Ɓe mbi'i: “Minin maccuɓe ma min ɗonno sappo e ɗiɗo, ɓiɓɓe goɗɗo gooto nder lesdi Kanaana. Gaajiijo ɗon wondi bee baaba amin hannde, gooto boo majji.”

¹⁴Yusufu wi'i ɓe: “Fakat kanjum mi wi'no on, on horooɓe!

¹⁵Ndaa nii mi foondirta on: Mi ɗon hunoro bee ngeendam Firawna, on ngurtataako haa ɗo, sonaa minyiraawo mooɗon wara ɗo.

¹⁶Nele gooto mooɗon ɗaɓɓitoygo deerɗiraawo mooɗon. Ammaa onon on njooɗoto on haɓɓaaɓe. Bana non anndiranmi to on mbi'i gooŋga malla on mbi'aay. To naa non, bana Firawna o geeto, on horooɓe!”

¹⁷O nastini ɓe fuu nder fursina nyalɗe tati.

¹⁸Nyalaade tataɓre, Yusufu wi'i ɓe: “Min boo mi kulɗo Allah. To on ngiɗi yeeɗugo, mbaɗe ni'i:

¹⁹To on hoolaaɓe, gooto mooɗon lutta nder fursina. Ammaa onon luttuɓe boo, ndille njahrane ci'e mooɗon alkamaari, ngam weelo.

²⁰Nden on ngaddanammi minyiraawo mooɗon, ngam haa bolle mooɗon ngooŋɗine, on maayataa.” Ɓe mbaɗi non.

²¹Ɓe mbi'mbi'tiri: “Fakat, en mbaɗi aybe dow deerɗiraawo meeɗen. En ngi'i ɓillaare maako, nde o tori en enɗam, ammaa en nananaay mo. Ngam maajum ɓillaare nde'e warani en.”

²²Ruben wi'i ɓe: “Mi bi'nooɗo on taa on mbaɗa koo ɗume haa ɓiŋngel nge'el. Ammaa on nananaay yam. Jonta ƴiiƴam maako ɗon ƴamte.”

²³Ɓe anndaano Yusufu ɗon faama, ngam turjumanjo ɗonno hakkunde maɓɓe.

²⁴Nden Yusufu daaytiri bee maɓɓe, woyi. O lori wolwango ɓe. O naŋngi Simeyon, o haɓɓi mo yeeso maɓɓe.

²⁵Nden o umri ɓe kebbinana ɓe boorooji maɓɓe, ɓe mbaatana koo moy ceede mum nder booro, ɓe ndokka ɓe njooɓaari laawol. O waɗani ɓe bana non.

²⁶Deerɗiraaɓe Yusufu ndimdi alkamaari dow bamɗe maɓɓe, ndilli.

²⁷Nde ɓe njippi jemma, gooto maɓɓe maɓɓiti booro mum ngam hokkugo huɗo haa wamnde. O laari ceede maako ɗon mbaali haa hunnduko booro.

²⁸O wi'i deerɗiiko'en: “Ɓe lornani yam ceede am! Ndaa, ɗe ɗon haa hunnduko booro am.” Ɓerɗe maɓɓe ta'i, ɓe ndaarndaartiri bee diwŋgol, ɓe mbi'i: “Ɗume Allah waɗi en ɗo?”

²⁹Ɓe ngarti nder lesdi Kanaana haa baaba maɓɓe Yaakubu. Ɓe ngecci mo ko heɓi ɓe fuu.

³⁰Ɓe mbi'i: “Goɗɗo ngomnaajo lesdi oo, wolwani min bee caatal, o hoociri min bana horooɓe lesdi.

³¹Min mbi'i mo: Minin, min hoolaaɓe, naa min horooɓe.

³²Min ɗonno deerɗiraaɓe sappo e ɗiɗo, ɓiɓɓe goɗɗo gooto. Gooto majji, gaajiijo boo ɗon wondi bee baaba amin nder lesdi Kanaana.

³³Goɗɗo oo, ngomna lesdi, wi'i min: Bana nii anndiranmi on hoolaaɓe: Acce gooto mon haa am. Koo'e alkamaari ndi yimɓe ci'e mooɗon mari haaje, njahrane ɓe.

³⁴Ammaa ngaddaneeɗam minyiraawo mooɗon. Non anndiranmi naa on horooɓe, ammaa on hoolaaɓe. Nden lornananmi on deerɗiraawo mooɗon, on pila nder lesdi.”

³⁵Nde ɓe njuppi boorooji maɓɓe, ndaa, koo moy ceede mum ɗon nder booro mum. Ɓe ngi'i ceede maɓɓe, kamɓe e baaba maɓɓe, ɓe kuli.

³⁶Yaakubu wi'i ɓe: “On ɗon cooynammi ɓikkoy am. Yusufu majji, Simeyon boo majji, on ɗon kooca Benyamin. Ɗum fuu ɗum ɗon yowo dow am.”

³⁷Ruben wi'i baaba muuɗum: “Sey a mbara ɓikkoy am ɗiɗoy, to mi wartiraay mo haa maaɗa. Halfitinam ngel, mi wartirante ngel.”

³⁸Ammaa Yaakubu wi'i: “Ɓiŋngel am yahdataa bee mooɗon, ngam deerɗiiko maayi, kaŋko o lutti feere maako. To sarru heɓi mo dow laawol ngol njahoton, mettamɓeram mbaratam, ngam mi ndottiijo, marɗo dandanndi.”