Read Fulfulde Laataanooji 44 Bible Online

Laataanooji 44 - Fulfulde bible

Laataanooji 44

¹Yusufu umri kaliifaajo saare muuɗum: “Hebbin boorooji worɓe ɓe'e bee nyaamdu fodde ko ɓe mbaawata roondaago. Waatu ceede koo moy haa hunnduko booro mum.

²A waata jardugel am ngel cardi nder booro gaajiijo, hawtaade bee ceede alkamaari maako.” Kaliifaajo waɗi bana Yusufu umri mo.

³Nde weeti, ɓe acci ɓe, ɓe ndilli bee bamɗe maɓɓe.

⁴Nde ɓe ngurti berniwol, ɓe ndaayaaki tawon, Yusufu wi'i kaliifaajo saare muuɗum: “Yaawɗa, taasnu ɓe, jokku ɓe! Wi' ɓe: Koni mbarjirɗon booɗɗum bee kalluɗum?

⁵Naa bee maagel jaagorɗo am yardata e o laardata sirriijum na? Ko mbaɗɗon ɗo ɗum kalluɗum!”

⁶Kaliifaajo jokki ɓe, wi'i ɓe bolle ɗe'e.

⁷Ɓe mbi'i mo: “Naywa! Noy noy mbi'rata irin ɗu'um? Maccuɓe ma potaay mbaɗa bana non!

⁸Min ngartiri ceede ɗe min tawno haa kunnduɗe boorooji amin diga lesdi Kanaana. Noy min ngujjirta cardi malla kaŋŋeeri haa saare jaagorɗo ma?

⁹Mo ngel tawa haa muuɗum caka maccuɓe ma, maaya! Minin boo min laato maccuɓe ma.”

¹⁰Kaliifaajo wi'i: “Ngaɗen bana mbi'ɗon. Mo ngel tawa haa muuɗum, laato maccuɗo am, ammaa onon luttuɓe on rimɓe.”

¹¹Koo moy yaawɗi rifti booro mum haa lesdi, maɓɓiti ngo.

¹²Kaliifaajo fuɗɗi linyugo diga booro hammiraawo haa o timminiri dow gaajiijo. Jardugel tawaama nder booro Benyamin.

¹³Ɓe ceeki limce maɓɓe, koo moy rimndi wamnde mum, ɓe lorti haa berniwol.

¹⁴Yahuuda e deerɗum'en nasti saare Yusufu. Yusufu dillaayno tawon. Ɓe cujidani mo.

¹⁵Yusufu ƴami ɓe: “Kuugal ngale kuuwɗon ɗo? On anndaa goɗɗo bana am anndi laarugo sirriijum na?”

¹⁶Yahuuda jaabi: “Ko min mbi'ata ma, barkaama? Ɗume min mbolwata? Noy noy min ngooŋɗinta ko'e amin? Allah waŋgini aybe maccuɓe maaɗa. Ndaa, min maccuɓe ma, barkaama, minin e mo jardugel ma tawa haa muuɗum fuu.”

¹⁷Yusufu wi'i: “Woodaa! Mi waɗataa ɗum. Mo jardugel tawa haa muuɗum, kaŋko laatoto maccuɗo am. Ammaa onon luttuɓe, koote jam haa baaba mon.”

¹⁸Nden Yahuuda ɓaditi Yusufu, wi'i: “Useni, barkaama, accu maccuɗo ma wolwa wolde woore yeeso ma. Taa tikkere ma saata dow maccuɗo ma, ngam a laati bana Firawna.

¹⁹Barkaama, a ƴamno maccuɓe ma: Baaba mooɗon ɗon na malla deerɗiraawo mooɗon goɗɗo ɗon?

²⁰Min njaabi ma: Min ngoodi baaba ndottiijo e derkeejo pamaro, danyanaaɗo mo nder ndottaaku maako. Deerɗiraawo derkeejo man boo maayi, o lutti feere maako haa daada maako, baaba maako boo yiɗi mo masin.

²¹A wi'i maccuɓe maaɗa: Ngaddaneeɗam mo, haa gite am ndaara mo.

²²Min njaabi ma: Derkeejo waawataa ɗalugo baaba muuɗum. To o ɗali mo, o maayan.

²³Ammaa a wi'i maccuɓe ma: To minyiraawo mon wardaay bee mooɗon, on meetataa yi'ugo yam.

²⁴Nde min kooti haa maccuɗo ma, baaba amin, min ngecci mo bolle maaɗa, barkaama.

²⁵Baaba amin wi'i: Lorte, coodane en nyaamdu seɗɗa.

²⁶Ammaa min mbi'i: Min potaay yahugo ton bilaa minyiraawo amin yahda bee amin. Ngam min potaay yi'ugo gorko oo, to minyiraawo amin wondaay bee amin.

²⁷Maccuɗo ma, baaba amin wi'i min: On anndi debbo am danyani yam ɓiɓɓe ɗiɗo.

²⁸Gooto maɓɓe majji. Mi numi huunde ladde faɗɗi mo, ngam mi meetaay yi'ugo mo sam haa wargo hannde.

²⁹To on koo'ani yam oo boo, to sarru heɓi mo, on nastintam nder joonde maayɓe bee mettamɓeram.

³⁰Jonta, to mi lortake haa maccuɗo ma, baaba am, to derkeejo wondaay bee amin, bana o ɗakkotiri bee maako ɗo, o maayan to o yi'aay mo. Bana non maccuɓe ma nastinan maccuɗo ma, baaba amin nder joonde maayɓe bee mettamɓeram.

³²Barkaama, min maccuɗo ma, mi fiyi dammaana yeeso baaba am ngam derkeejo oo bee wi'go: To mi wartiraay mo haa maaɗa, limanam ɗum aybe haa foroy.

³³Jonta kam, barkaama, accu mi jooɗo bana maccuɗo mbattudi derkeejo, kaŋko boo o hootida bee deerɗiiko'en.

³⁴Noy mbaawranmi hootugo haa baaba am, to derkeejo wondaay bee am? Mi yiɗaa laarugo sarru ngu heɓata baaba am!”