Read Fulfulde Laataanooji 48 Bible Online

Laataanooji 48 - Fulfulde bible

Laataanooji 48

¹Ɓaawo kuuje ɗe'e, ɓe mbi'i Yusufu: “Ndaa, baaba ma nyawɗo.” Nden o hoo'idi bee maako ɓiyiiko'en ɗiɗo, Manassa e Efrayim.

²Ɓe anndini Yaakubu, ɓe mbi'i: “Ndaa, ɓiya Yusufu wari haa ma.” Isra'iila haɓdi, jooɗi dow leeso mum.

³Yaakubu wi'i Yusufu: “Allah Baawɗo waŋgani yam haa Luus nder lesdi Kanaana, barkiɗini yam.

⁴O wi'i yam: Mi laatinte ɗuuɗa-asŋgoljo, mi laatinte mooɓre ummaatooje, mi marnan danygol ma lesdi ndi'i maral duumiiŋgal ɓaawo maaɗa.

⁵Jonta ɓiɓɓe ma ɗiɗo, danyanaaɓe ma nder lesdi Misra hiddeko mi wara haa maaɗa haa ɗo, ɓe laatanto yam. Efrayim e Manassa laatano yam bana Ruben e Simeyon.

⁶Ammaa ɓiɓɓe ɓe ndanyata ɓaawo maɓɓe, laatano ma. Nder maral hammiraaɓe maɓɓe ɓe keɓata geɗal maɓɓe.

⁷Ngam saa'i mi warti diga Paddan-Aram, Rahiilu maayi haa am dow laawol nder lesdi Kanaana, daayaaki bee Efrata. Mi uwi mo ton, dow laawol Efrata.” Kanjum woni: Baytilaama.

⁸Nde Isra'iila yi'i ɓiɓɓe Yusufu, o ƴami: “Ɗum ɓeye ɓe'e?”

⁹Yusufu jaabi baaba muuɗum: “Ɗum ɓiɓɓe am ɓe Allah hokki yam haa ɗo.” Isra'iila wi'i: “Ɓadin ɓe haa am, haa mi barkiɗina ɓe.”

¹⁰Gite Isra'iila tampi ngam ndottaaku, o waawataa yi'ugo. Yusufu ɓadini ɓe haa maako, o hebbi ɓe, o harli ɓe.

¹¹Isra'iila wi'i Yusufu: “Mi tammaakino mi yi'ete fahin. Ndaa, Allah yi'ni yam koo danygol ma boo.”

¹²Yusufu sottini ɓe koppi baaba maako, o sujidi, yeeso haa lesdi.

¹³Nden Yusufu hoo'i ɓe ɗiɗo fuu, Efrayim bee nyaamo maako, ngam o wona haa nano Isra'iila, Manassa boo bee nano maako ngam haa o wona haa nyaamo Isra'iila. O ɓadini ɓe haa maako.

¹⁴Ammaa Isra'iila waafindiri juuɗe mum, yowi nyaamo dow Efrayim — minyiraawo — nano maako boo dow Manassa — afo.

¹⁵O barkiɗini Yusufu, o wi'i: “Allah mo maama am Ibrahiima e baaba am Isiyaaku ngeeɗi yeeso mum, Allah mo ayni yam bana gaynaako diga danyeeki am haa wargo hannde,

¹⁶malaa'ikaajo kisnuɗo yam sarru fuu, barkiɗina derke'en ɓe'e. Daliila maɓɓe innde am tabito bana innde maama am Ibrahiima e baaba am Isiyaaku. Ɓe ɗuuɗa masin haa lesdi.”

¹⁷Nde Yusufu yi'i baaba maako yowi juŋngo mum nyaamo dow hoore Efrayim, o yerdaaki ɗum. O naŋngi juŋngo baaba maako, ngam o sottina ngo dow hoore Efrayim, o yowa ngo dow hoore Manassa.

¹⁸O wi'i baaba maako: “Naa non, baaba am! Oo woni afo, yow nyaamo ma dow hoore maako.”

¹⁹Ammaa baaba maako sali, wi'i: “Mi anndi, ɓiŋngel am! Mi anndi kaŋko boo o laatoto ummaatoore. Kaŋko boo o laatoto mawɗo. Ammaa minyiiko ɓurdan mo maŋngu, danygol minyiiko laatoto mooɓre ummaatooje.”

²⁰O barkiɗini ɓe nyalaade maajum, o wi'i: “Isra'iila'en fuu mbarkiɗiniran bee innde maaɗa. Ɓe mbi'an: Allah waɗe bana Efrayim e Manassa.” Bana non o ardiniri Efrayim yeeso Manassa.

²¹Isra'iila wi'i Yusufu: “Ndaa, mi ɗon maaya. Ammaa Allah wondan bee mooɗon, lortinan on nder lesdi kaakiraaɓe mooɗon.

²²Mi hokkete Sikem, lesdi ɓurndi wooɗugo, deerɗa'en keɓataa ndi. Lesdi man, mi hoo'i ndi haa Amoori'en bee kaafahi am e lagaawal am.”