Read Fulfulde Laataanooji 9 Bible Online

Laataanooji 9 - Fulfulde bible

Laataanooji 9

¹Allah barkiɗini Nuuhu e ɓiyum'en, o wi'i ɓe: “Ndanye, ɗuuɗe, kebbine lesdi!

²On laatoto daliila kultoreeŋgol maŋngol haa dabbaaji e colli, Ko duɓata dow lesdi e liɗɗi fuu. Mi hokki ɗum fuu haa juuɗe mooɗon.

³Ladoojum e marɗum poofɗe fuu laatano on nyaamdu. Mi hokki on ɗum fuu bana naane ndokkirmi on haako hecco.

⁴Ammaa taa nyaame kusel bee yoŋki muuɗum, waato bee ƴiiƴam muuɗum.

⁵Ƴiiƴam mooɗon ɗum yoŋki mooɗon. Mi ƴaman ɗam haa ndabbaawa mbarnga neɗɗo, bana mi ƴamirta haa neɗɗo mbarɗo tanum. Mi ƴamtan yoŋki neɗɗo haa mbarɗo ɗum.

⁶Koo moy rufi ƴiiƴam neɗɗo, ƴiiƴam muuɗum rufe boo bee juŋngo neɗɗo, ngam Allah tagi neɗɗo dow jaati muuɗum.

⁷Onon kam, ndanye, ɗuuɗe masin dow lesdi, ɓesde dow maari!”

⁸Nden Allah wi'i Nuuhu e ɓiyum'en wonduɓe bee maako:

⁹“Ndaa, mi haɓɓan alkawal bee mooɗon e danygol mon ɓaawo mooɗon

¹⁰e marɗum yoŋki gonduɗum bee mooɗon fuu, colli e dabbaaji saare malla ɗi ladde, ko wurti koommbowal bee mooɗon fuu e dabbaaji gonɗi dow lesdi fuu.

¹¹Mi ɗon haɓɓa alkawal bee mooɗon: Marɗum ɓanndu fuu meetataa nattineego bee ndiyam tuufaana. Ilam ngoɗɗam meetataa nattingo lesdi fahin.”

¹²Allah ɓesdi wi'ugo: “Ndaa alaama alkawal ngal darnanmi hakkunde am bee mooɗon, non boo hakkunde am bee yoŋkiiji geeti ngonduɗi bee mooɗon fuu, ngam zamanuuji garanɗi fuu:

¹³Mi waɗan timotimooŋgal am nder duule. Kaŋgal laatoto alaama alkawal hakkunde am bee duniyaaru.

¹⁴Nde mooɓtanmi duule dow lesdi fuu e to timotimooŋgal waŋgi nder maaje,

¹⁵mi siftoran alkawal am bee mooɗon, bee dabbaaji e bee ko mari ɓanndu fuu. Ndiyamji meetataa laataago ilam tuufaana ngam nattingo marɗum ɓanndu fuu.

¹⁶Timotimooŋgal waŋgan nder duule. Mi laaran ngal e mi siftoran dow alkawal duumiiŋgal ngal kaɓɓumi ngam foroy hakkunde am e marɗum yoŋki fuu dow lesdi.”

¹⁷Allah wi'i Nuuhu: “Kanjum woni alaama alkawal ngal kaɓɓumi hakkunde am bee marɗum yoŋki fuu dow lesdi fuu.”

¹⁸Ɓiɓɓe Nuuhu wurtiiɓe koommbowal ngoni: Sem e Haamu e Yafet. Haamu woni baaba Kanaana.

¹⁹Diga ɓiɓɓe Nuuhu tato ɓe'e, jooɗiiɓe dow lesdi fuu iwi.

²⁰Nuuhu woni aartuɗo fuɗɗugo ndemri. O jubi leɗɗe inabooje.

²¹O yari inaboojam, o wuyki, o suuriti nder suudu maako.

²²Haamu, baaba Kanaana yi'i temmbu baaba muuɗum, o yehi yaasi, o anndini ɗum deerɗum'en ɗiɗo go.

²³Nden Sem e Yafet koo'i ngapaleewol, ɓe ngaɗi ngol dow balbe maɓɓe. Ɓe njehi ɓaawo ɓaawo, ɓe cuddi temmbu baaba maɓɓe, ɓe ndaaraay gal baaba maɓɓe, non ɓe ngi'aay temmbu baaba maɓɓe.

²⁴Nde Nuuhu fini e wuykere mum, o nani ko ɓiyiiko minyiraawo waɗi.

²⁵Nden o wi'i: “Kanaana o naalaaɗo! O laatano deerɗiiko'en maccuɗo ɓaawoojo.”

²⁶O wi'i boo: “Tedduŋgal laatano Jawmiraawo, Allah mo Sem! Kanaana laato maccuɗo maako.

²⁷Allah mawnina Yafet, ammaa joonde maako laato nder cuuɗi laymaaji Sem. Kanaana boo laatano mo maccuɗo.”

²⁸Ɓaawo ilam tuufaana, Nuuhu yeeɗi fahin duuɓi teemeɗɗe tati e cappanɗe jowi (350).

²⁹Duuɓi Nuuhu fuu ngaɗi, teemeɗɗe joweenayi e cappanɗe jowi (950), nden o maayi.