Read Fulfulde 2 Samuyila 1 Bible Online

2 Samuyila 1 - Fulfulde bible

2 Samuyila 1

¹Ɓaawo maayde Sawulu, Daawuda jaalinooɗo Amaleki'en warti Cikilak, o faɓɓi ton nyalɗe ɗiɗi.

²Nyannde tataɓre goɗɗo iwi diga saŋngeere konu Sawulu, wari haa Daawuda, limce maako ɗon ceeki, mbulwuldi ɗon dow hoore maako[1]. O tuggi koppi, o waali, o hippi yeeso Daawuda.

³Daawuda ƴami mo: “Diga toy ngarɗaa?” O jaabi: “Mi daɗi, mi wari diga saŋngeere konu Isra'iila.”

⁴Daawuda ƴami mo: “Noy kubar? Yeccam ɗum!” O wi'i: “Jama'aare Isra'iila doggi, ɗuuɗɓe nder yimɓe men boo maayi. Sawulu e ɓiyum Yonatan, kamɓe boo ɓe maayi.”

⁵Daawuda ƴami mo fahin: “Noy anndirɗa Sawulu e ɓiyum Yonatan maayi?”

⁶O jaabi: “Mi ɗonno dow hooseere Gilbo'a. Mi yi'i Sawulu ɗon tuggi dow labbo mum, mootaaji pucci Filisti'en e wa'iiɓe pucci ɗon taasna mo, ɓe ndaayaaki sam.

⁷O wayliti, o yi'i yam, o ewni yam. Mi nooti: Na'am.

⁸O ƴami yam: An moy? Mi jaabi: Mi Amalekiijo.

⁹O wi'i yam: Ɓadita, mbaram! Giilol naŋngi yam, ammaa poofɗe am ta'aay tawon.

¹⁰Mi anndi o yeeɗataa ɓaawo konne'en njaali mo. Ngam maajum mi ɓaditi mo, mi mbari mo. Mi hoo'i woronnde laamu wonnde dow hoore maako e jawo haa juŋngo maako. Ndaa, mi waddani ma ɗum, barkaama.”

¹¹Daawuda seeki limce mum[2], kaŋko e worɓe wonduɓe bee maako fuu.

¹²Ɓe mboyi, ɓe nyalli suumaago ngam daliila Sawulu e ɓiyum Yonatan e Isra'iila'en, ummaatoore Jawmiraawo, mbaraaɓe haa konu fuu.

¹³Daawuda ƴami suka gadduɗo kubar go: “Toy iwɗaa?” O jaabi: “Mi ɓii Amalekiijo koɗo nder Isra'iila.”

¹⁴Daawuda telɓani mo, wi'i: “Asee, a hulaay mbarugo cuɓaaɗo Allah!”

¹⁵Daawuda ewni goɗɗo nder suka'en mum, umri mo mbarugo Amalekiijo. Suka fiyi mo, o maayi.

¹⁶Daawuda wi'i Amalekiijo: “Aybe[3] maayde ma ɗon dow hoore ma. Bolle ma kaɓɓi ma, ngam a wi'i a mbari laamiiɗo mo Jawmiraawo suɓino.”

¹⁷Daawuda waɗi gimol boyki dow Sawulu e ɓiyum Yonatan,

¹⁸o inndi ngol “Gimol Lagaawal”, ngol ɗon winndi nder Deftere Gooŋgaajo. Daawuda umri yimɓe Yahuuda ndurso ngol. Ndaa nii o yimi:

¹⁹“Yaa Isra'iila, honooɓe ma ɓurduɓe semmbe ndo'ake dow kooseeje ma, honooɓe ma maŋgtaaɓe boo maayi.

²⁰Taa anndine ɗum haa Gaat, taa ngooyne ɗum haa laabi Askalon, ngam taa rewɓe Filisti'en ceyo, taa ɓiɓɓe saadooni'en rewɓe mbelmbelta.

²¹Onon kooseeje Gilbo'a, taa saawawre waɗa dow mooɗon, taa iyeende boo toɓa dow mooɗon, taa gese dimooje cudda on. Ngam bawarɗe[4] semmbiɗɓe ngudinaama ton, wawarde Sawulu soɓi haa foroy.

²²Lagaawal Yonatan woofaay sam, kaafahi Sawulu lortaaki meere, ammaa ki heewi ƴiiƴam mbaraaɓe, ki simti ɓellere semmbiɗɓe.

²³Sawulu e Yonatan, welɓe e yiɗaaɓe, ɓe ceedaay nder ngeendam e maayde fuu. Ɓe ɓurduno dute jaawal, barooɗe boo semmbe.

²⁴Onon rewɓe Isra'iila'en, mboye Sawulu! Kaŋko o jaagniri on limce boɗeeje, kaŋko o fawniri on kaŋŋeeri.

²⁵Honooɓe ɓurduɓe semmbe maayi, ɓe mbaraama nder haɓre. Yonatan boo maayi, o ɗon waali haa towndiije.

²⁶Kayto deerɗiraawo am Yonatan, ɓernde am ɗon naawa ngam maaɗa. An wonno soobaajo am giɗaaɗo, yiide ma ɓurani yam wooɗugo dow yiide rewɓe fuu.

²⁷Ayye! Honooɓe ɓurduɓe semmbe maayi! Balmi maɓɓe natti, meetataa nafugo!”