Read Fulfulde 2 Samuyila 10 Bible Online

2 Samuyila 10 - Fulfulde bible

2 Samuyila 10

¹Ɓaawo maajum, Nahas, laamiiɗo Ammooni'en maayi. Ɓiyiiko Hanun laami haa pellel maako.

²Daawuda wi'i: “Mi waɗanan Hanun ɓii Nahas mbooɗeeŋga, bana baaba maako waɗani yam.” Daawuda neli nelaaɓe haa ɓe nde'itina mo dow maayde baaba maako. Nde nelaaɓe man njotti lesdi Ammooni'en,

³mawɓe Ammooni'en mbi'i laamiiɗo muuɗum'en: “A numi Daawuda neli de'itinooɓe haa maaɗa ngam siŋkango ma daliila maayde baaba ma na? O nelaay ɓe haa maaɗa ngam wiɗitaago e horugo e hippaago berniwol ngo'ol na?”

⁴Hanun umri ɓe naŋnga nelaaɓe Daawuda go. Ɓe naŋngi ɓe, ɓe laɓi reeta bakkuɗe maɓɓe, ɓe ta'i limce maɓɓe haa yotti pooɓe. Nden o lorti ɓe.

⁵Worɓe ɓe'e cemti masin haa ɓe ngiɗaa hootugo. Nde Daawuda nani kubar maajum, o neli haa maɓɓe, o wi'i: “Paɓɓe haa Yeriko, haa bakkuɗe mon puɗa fahin, nden ngarton.”

⁶Nde Ammooni'en annditi ɓe toonyi Daawuda, ɓe taaski konu, ɓe njoɓi honooɓe Siriya'en ujine noogas (20.000) haya diga Bayti-Rehob e Soba, ujineere (1.000) diga laamiiɗo Ma'aka e ujine sappo e ɗiɗi (12.000) diga laamiiɗo Tooba.

⁷Nde Daawuda nani ɗum, o neli Yo'ab, mawɗo ardiiɓe sooje'en, bee honooɓe suusɓe fuu.

⁸Ammooni'en ngurti berniwol muuɗum'en, ndarni caffuuji[15] yeeso nastirde maagol. Ammaa Siriya'en warɓe diga Soba e Rehob e yimɓe Tooba e Ma'aka ɗon ndari feere muuɗum'en haa ladde.

⁹Nde Yo'ab yi'i konne'en taarake ɗum yeeso e ɓaawo fuu, o suɓi woɗɓe nder suɓaaɓe Isra'iila, o darni ɓe dow Siriya'en.

¹⁰Yimɓe luttuɓe fuu, o halfini ɓe haa juŋngo Abisay deerɗiiko mo huucitini ɓe dow Ammooni'en.

¹¹Yo'ab wi'i Abisay: “To Siriya'en calorake yam, mballa mi. An boo to Ammooni'en calorake ma, mi wallete.

¹²Semmbiɗiɗ, en tiiɗa ngam daliila yimɓe meeɗen e ngam berniiji Allah meeɗen! Jawmiraawo boo waɗan ko fottanta mo.”

¹³Nden Yo'ab e wonduɓe bee muuɗum njehi haɓoygo bee Siriya'en. Siriya'en ndoggi yeeso maako.

¹⁴Nde Ammooni'en ngi'i Siriya'en ndoggi, ɓe ndoggi kamɓe boo yeeso Abisay, ɓe lori nder berniwol. Nden Yo'ab acci Ammooni'en, o hooti Urusaliima.

¹⁵Nde Siriya'en ngi'i Isra'iila'en njaali ɓe, ɓe mooɓti jama'aaje maɓɓe fuu.

¹⁶Hadad'ezer neli haa Siriya'en wonɓe gaɗa Efratis, ɓe ngari haa Heelam. Sobak, mawɗo honooɓe Hadad'ezer ardi ɓe.

¹⁷Nde Daawuda nani ɗum, o mooɓti Isra'iila fuu. Ɓe eeri maayo Urdun, ɓe ngari Heelam. Siriya'en ndarni caffuuji muuɗum'en, nden ɓe kaɓi bee yimɓe Daawuda.

¹⁸Isra'iila'en ndiiwi Siriya'en. Daawuda e yimɓe mum kalki mootaaji pucci teemeɗɗe joweeɗiɗi (700) e wa'iiɓe pucci ujine cappanɗe nayo (40.000). Ɓe njuwi boo Sobak, mawɗo ardiiɓe honooɓe, o maayi ton.

¹⁹Nde laamiiɓe ɗowtaniiɓe Hadad'ezer ngi'i Isra'iila'en njaali ɓe, ɓe culhotiri bee Isra'iila'en, ɓe kuuwani ɓe. Ɓaawoɗon Siriya'en kuli wallugo Ammooni'en.