Read Fulfulde 2 Samuyila 19 Bible Online

2 Samuyila 19 - Fulfulde bible

2 Samuyila 19

¹Laamiiɗo diwtori ngam naaworla ɓernde mum. O wa'i dow soorowol gonŋgol dow dammugal wuro bee bojji: “Ayye ɓiŋngel am, ɓiŋngel am Absalom! Absalom, ɓiŋngel am, koni mi maayaay mbattudi[24] maaɗa? Ayye, ɓiŋngel am, ɓiŋngel am Absalom!”

²Yo'ab nani kubar: “Laamiiɗo ɗon woya Absalom bee gonɗi ɗuuɗɗi.”

³Nde yimɓe nani haala maajum, seyo maɓɓe dow jaalorgal warti suno.

⁴Ɓe nasti berniwol ɓe jeeɗiiɓe, bana honooɓe semtinaaɓe dogganɓe haɓre.

⁵Laamiiɗo ɗon jooɗi ton, o ɗon suddi yeeso maako, o ɗon woya bee semmbe: “Ɓiŋngel am Absalom! Absalom, ɓiŋngel am, ɓiŋngel am!”

⁶Yo'ab nasti haa laamiiɗo woni, wi'i mo: “A ɗon semtina yimɓe maaɗa hannde. Ɓe kisni yoŋki ma e yoŋkiiji ɓiɓɓe ma worɓe e rewɓe e yoŋkiiji rewɓe ma e sulaaɓe ma fuu.

⁷Ammaa a ɗon wanya yiɗɓe ma, a yiɗi wanyɓe ma. Ngam hannde a waŋgini, ardiiɓe honooɓe ma e maccuɓe ma, ɓe huunde meere yeeso maaɗa. Ngam mi anndi to minin fuu min maayino hannde, ammaa Absalom kam yeeɗi, kanjum ɓuranno fottango ma.

⁸Umma, wurta, seynu yimɓe ma seɗɗa. Mi ɗon hunoro innde Jawmiraawo, to a wurtaaki, walaa koo gooto nder yimɓe ma luttante jemmaare nde'e. Kanjum ɓurata hallugo dow sarruuji keɓɗi ma fuu diga nderkaaku ma haa wargo hannde.”

⁹Laamiiɗo ummi, wurti, jooɗi haa dammugal. Ɓe mbi'i yimɓe: “Laamiiɗo ɗon jooɗi haa dammugal.” Nden ɓe fuu ɓe ngari. Isra'iila'en fuu ndoggino, koo moy hooti haa saare mum.

¹⁰Koo toy nder Isra'iila yimɓe puɗɗi felindirgo. Ɓe ɗon mbi'a: “Laamiiɗo hisni en juuɗe Filisti'en e konne'en meeɗen woɗɓe fuu. Jonta boo o doggi yeeso Absalom, o wurti lesdi.

¹¹Absalom mo moytuɗen, ndaa o maayi nder haɓre. Ngam ɗume en kooraay laamiiɗo tawon?”

¹²Laamiiɗo Daawuda nani ko wolwa nder Isra'iila. Ngam maajum o neldi kubar haa Cadok e Abiyatar, liman'en, o wi'i: “Mbi'e ndotti'en Yahuuda ni'i: Ngam ɗume cakitiiɗon hoorugo laamiiɗo haa saare maako?

¹³Naa on banndiraaɓe maako nder lenyol gootol na? Ko waɗi on ɗon cakito hoorugo mo?

¹⁴Mbi'e Amasa boo bee innde am: An woni banndiraawo am. Yeeso ɗo an laatoto haa foroy mawɗo honooɓe am mbattudi Yo'ab. Allah hiito yam bee caatal to mi gooŋɗinaay wolde am nde'e.”

¹⁵Bana nii Daawuda wartiri ɓerɗe yimɓe Yahuuda fuu haa muuɗum. Ɓe neldi kubar haa maako, ɓe mbi'i: “Sey laamiiɗo e wonduɓe bee muuɗum fuu ngarta.”

¹⁶O ummi, o yotti maayo Urdun. Yimɓe Yahuuda ngari haa Gilgal ngam haa ɓe njaɓɓo mo, ɓe mballa mo eeraago maayo Urdun.

¹⁷Sim'i ɓii Gera, Benyaminiijo mo Bahuriima go, kaŋko boo o yaawɗi, o wari, o hawti bee yimɓe Yahuuda wakkati maajum ngam haa o fotta bee laamiiɗo.

¹⁸Yimɓe Benyamin ujineere ɗon ngondi bee maako. Siba, suka saare Sawulu ɗon nder maɓɓe, o wardi bee ɓiɓɓe maako sappo e njowo e huuwooɓe maako noogas. Kamɓe ɓe aarti laamiiɗo yottaago haa Urdun.

¹⁹Ɓe ngaddi koommbowal[25] ngam haa ɓe eerna saare laamiiɗo, ɓe mbaɗana laamiiɗo ko o yiɗi fuu. Nde laamiiɗo eeri, Sim'i ɓii Gera wari, waali, hippi yeeso maako,

²⁰wi'i: “Taa siftor aybewol ngol mbaɗmi dow maaɗa nyalaade nde ngurtiiɗa Urusaliima, barkaama. Taa limanam aybe man.

²¹Mi anndi mi waɗi hakke. Ngam maajum ngarmi hannde, aartumi yimɓe le'i Yusufu fuu, haa mi jaɓɓe, barkaama.”

²²Abisay ɓii Seruyatu wi'i: “Sim'i he'i mbareego, ngam o huɗi laamiiɗo mo Jawmiraawo suɓi.”

²³Ammaa Daawuda wi'i: “Kadi ɗum haala mooɗon na, onon ɓiɓɓe Seruyatu? Koni laatiiɗon konne'en am? Hannde mi heɓti laamu am haa Isra'iila. Ngam maajum walaa Isra'iilaajo koo gooto mbarete hannde.”

²⁴Nden o wi'i Sim'i: “Mi hunanake ma a maayataa.”

²⁵Mefiboset taaniraawo Sawulu boo wari jaɓɓaago laamiiɗo. Diga laamiiɗo dilluno haa o warti jam, Mefiboset suklanaaki kosɗe mum e wakkude mum, lootaay limce mum boo.

²⁶Nde o wari haa Urusaliima haa laamiiɗo, laamiiɗo ƴami mo: “Koni a yahdaay bee am, Mefiboset?”

²⁷O jaabi: “Barkaama, a anndi mi jiijiiɗo. Mi yiɗino daɗɗugo wamnde am haa mi ɗofte, nden suka am waɗi yam rikici, o waɗi yam tufle haa maaɗa boo. Ammaa a nanndi bee malaa'ikaajo Allah, barkaama, waɗ ko fottani ma.

²⁹Yimɓe saare baaba am fuu ke'i mbareego dow umroore ma, barkaama, ammaa an a jaɓi yam caka nyaamanɓe haa saare ma. Mi fotaay toraago ma mbooɗeeŋga feere.”

³⁰Laamiiɗo wi'i: “Ɗum he'i, taa ɓesdu bolle. Ndaa mi umri senndugo ngesa Sawulu hakkunde maaɗa bee Siba.”

³¹Mefiboset wi'i laamiiɗo: “Accu Siba hoo'a ɗum fuu. An a warti jam, ɗum he'i yam, barkaama.”

³²Barjillay warno diga Rogeliima nder lesdi Gile'at, o ɗofti laamiiɗo haa yotti maayo Urdun.

³³Barjillay naywi masin, o ndottiijo mo duuɓi cappanɗe joweetati. Wakkati laamiiɗo ɗonno jooɗi haa Mahanayim, Barjillay yahrani mo nyaamdu, ngam o diskuɗo masin.

³⁴Laamiiɗo wi'i mo: “Yahdu bee am haa Urusaliima, mi hakkilane ton.”

³⁵Ammaa Barjillay jaabi: “Luttanaay yam balɗe ɗuuɗɗe, barkaama. Ko nafata to mi eggi, mi yahdi bee maaɗa haa Urusaliima?

³⁶Mi woodi duuɓi cappanɗe joweetati jonta, mi waawataa senndindirgo booɗɗum e kalluɗum bana no haandi. Mi mettataako dakam haa nyaamduuji ma e njaramji ma. Mi nanataa sawtu yimooɓe worɓe e rewɓe. Mi yiɗaa mi laatano ma doŋngal, barkaama.

³⁷Ko mi huuwani ma fuu, ɗum he'aay mbarjaari ɗuuɗndi bana nii. Mi yiɗno ɗoftugo ma haa laawol seɗɗa haa gaɗa Urdun tan.

³⁸Jonta kam accu mi hoota, mi maaya haa wuro am, haa genaale baaba am e daada am ngoni. Ndaa ɗo Kimham, kaŋko o kuuwanoowo ma, to a yiɗi, o eerdo bee maaɗa. Waɗan mo ko fottani ma.”

³⁹Laamiiɗo wi'i: “Booɗɗum, sey o eerdo bee am. Mi waɗanan mo bana ngiɗɗa. An boo, to woodi ko a ɗaɓɓata haa am, mi waɗante ɗum.”

⁴⁰Yimɓe Daawuda fuu eeri maayo, nden laamiiɗo bee hoore mum boo eeri. Laamiiɗo jaɓɓiti Barjillay, hebbi mo, barkiɗini mo. Nden Barjillay hooti saare mum.

⁴¹Laamiiɗo yehi haa Gilgal, Kimham yahdi bee maako. Yimɓe Yahuuda fuu e reeta Isra'iila'en ɗofti mo.

⁴²Nden Isra'iila'en luttuɓe ngari haa laamiiɗo. Ɓe ƴami: “Koni banndiraaɓe amin yimɓe Yahuuda kooci ma, eerni ma Urdun barkaama, an bee saare ma e yimɓe ma fuu?”

⁴³Yimɓe Yahuuda njaabi: “Na laamiiɗo o goɗɗo lenyol amin! Ngam ɗume on mbaɗata haala? Kadi kaŋko wurni min na? Woodi dokkal o hokki min na?”

⁴⁴Isra'iila'en mbi'i: “Geɗal amin haa laamiiɗo ɓuri ngal mooɗon nde sappo, koo to o iwi haa lenyol mon boo. Koni on meeriɗinta min? Kadi minin min aartaay on wolwugo haala hoorugo laamiiɗo na?” Ammaa yimɓe Yahuuda njaabi ɓe bee caatal, caatal maɓɓe ɓuri ngal Isra'iila'en.