Read Fulfulde 2 Samuyila 21 Bible Online

2 Samuyila 21 - Fulfulde bible

2 Samuyila 21

¹Weelo waɗino nder zamanu Daawuda, ngo duuri duuɓi tati. Daawuda ƴami Jawmiraawo daliila weelo man. Jawmiraawo jaabi mo: “Aybe ƴiiƴam ɗon dow Sawulu e saare mum, ngam o mbari Gibiyoni'en woɗɓe.”

²Gibiyoni'en ngonaay nder Isra'iila'en, ammaa ɗum luttuɓe Amoori'en jooɗinooɓe lesdi maajum. Isra'iila'en kunanino ɓe, ɓe mbarataa ɓe. Ammaa Sawulu muuyino halkugo ɓe, ngam o yiɗino fottango yimɓe Isra'iila e Yahuuda. Laamiiɗo Daawuda mooɓti Gibiyoni'en, ƴami ɓe: “Ɗume mbaɗananmi on, noy mi hefirta aybe man? Ngam mi yiɗi on mbarkiɗina yimɓe Jawmiraawo fahin.”

⁴Gibiyoni'en njaabi: “Min njaɓataa cardi malla kaŋŋeeri haa saare Sawulu ngam kefergal aybe man. Min ngiɗaa mbarugo goɗɗo feere nder Isra'iila boo.” Daawuda wi'i: “Mi waɗan ko on mbi'i yam fuu!”

⁵Ɓe njaabi: “Sawulu muuyino halkugo min, ngam taa goɗɗo lenyol amin lutta nder Isra'iila sam.

⁶Ngam maajum hokku min worɓe njoweeɗiɗo nder ɓiɓɓe maako, ngam haa min ɓila ɓe yeeso Jawmiraawo haa Gibiya, berniwol Sawulu, cuɓaaɗo Jawmiraawo.” Laamiiɗo wi'i: “Mi hokkan on ɓe.”

⁷Ngam daliila hunayeere nde Daawuda bee soobaajo mum Yonatan ɓii Sawulu kuni yeeso Jawmiraawo, Daawuda acci Mefiboset ɓii Yonatan ɓii Sawulu.

⁸O naŋngi Armooni e Mefiboset, ɓiɓɓe Sawulu ɓe debbo mum Rispa ɓii Aya danyani mo. O naŋngi boo ɓiɓɓe njowo ɓe Mikal ɓii Sawulu debbo danyani gorum Adiriyel ɓii Barjillay mo Mehola.

⁹Kamɓe laamiiɗo hokki ɓe haa juuɗe Gibiyoni'en. Ɓe ɓili ɓe dow hooseere maɓɓe yeeso Jawmiraawo. Bana nii worɓe njoweeɗiɗo ɓe'e maaydi nyalaade woore. Ɗum wakkati puɗɗuki codol sa'iiruuri.

¹⁰Rispa, ɓii Aya hoo'i limce buhuuje, we'iti ɗi dow tapaare haa nokkuure man, o jooɗi ton kommbi nyawmanɗe diga fuɗɗam codol haa fuɗɗam iyeele. Nyalawma o haɗa jigaaje jippaago dow nyawmanɗe, jemma boo o riiwa kuuje ladde.

¹¹Nde Daawuda nani ko Rispa ɓii Ayya debbo waɗani mbaraaɓe,

¹²o neli hoo'ugo i'e Sawulu e ɓiyum Yonatan haa Yaabes nder lesdi Gile'at. Nde Filisti'en njaalino Sawulu dow hooseere Gilbo'a, ɓe ɓilino ɓalli Sawulu e Yonatan haa babal kiita haa Baytisaanu. Haa ton yimɓe Yaabes koocuno ɗi bee sirri.

¹³Diga ton Daawuda hoo'i i'e maɓɓe, ɓe mooɓti i'e ɓilaaɓe njoweeɗiɗo go.

¹⁴O yahri ɗe haa Ceela nder lesdi Benyamin, ɓe uwdi ɗe ton bee i'e Sawulu e Yonatan nder yenaande Kis, baaba Sawulu. Ɓe mbaɗi ko laamiiɗo umruno ɓe fuu. Ɓaawo maajum Allah woonani lesdi man.

¹⁵Filisti'en puɗɗiti haɓre bee Isra'iila'en. Daawuda e yimɓe mum njippi, kaɓi bee maɓɓe. Nde Daawuda somi,

¹⁶Yisbi-Benob, gooto nder ɓiɓɓe Rafa ɗaɓɓi mbarugo Daawuda. O ɗonno haɓɓi kaafahi kesi, teddeeŋga njamndi mboɗeeri ceeɓndi labbo maako, ɓuri kilo tati.

¹⁷Ammaa Abisay ɓii Seruyatu walli Daawuda, mbari Filistiijo. Wakkati maajum yimɓe kunni laamiiɗo ngam taa o meeta yahugo haɓre. Ɓe mbi'i: “To an a halki, ɗum laatoto bana to jayŋgol Isra'iila nyifi.”

¹⁸Ɓaawo maajum haɓre bee Filisti'en fuɗɗiti haa Gob. Wakkati man Sibbekay Husatiijo mbari Saf, goɗɗo lenyol Rafa.

¹⁹Fahin haɓre fuɗɗiti haa Gob, Elhanan ɓii Ya'ir Oregiima mo Baytilaama mbari Goliyat Gaatiijo mo leggal labbo mum nanndi bee leggal cannyargal.

²⁰Fahin haɓre fuɗɗiti haa Gaat. Woodino ton goɗɗo juutɗo, marɗo kooli cindi haa juuɗe e kosɗe muuɗum, limgal maaji fuu noogas e nayi. Kaŋko boo o goɗɗo lenyol Rafa.

²¹O janci Isra'iila, ammaa Yonatan ɓii Sime'a deerɗiraawo Daawuda mbari mo.

²²Ɓiɓɓe nayo ɓe'e ɓe danygol Rafa haa Gaat. Daawuda e yimɓe mum mbari ɓe.