Read Fulfulde 2 Samuyila 3 Bible Online

2 Samuyila 3 - Fulfulde bible

2 Samuyila 3

¹Haɓre hakkunde yimɓe Sawulu e yimɓe Daawuda duuri. Semmbe yimɓe Daawuda ɗon ɓesdo ammaa yimɓe Sawulu ɗon tampa.

²Daawuda danyi ɓiɓɓe worɓe haa Heburuun. Ndaa inɗe maɓɓe: Ahino'am mo Yisre'el danyani mo Amnon, afo maako.

³Abigayel laatinooɗo debbo Nabal, danyani mo Kiliyabu, ɗiɗaɓo maako. Tataɓo boo Absalom, innde daada mum Ma'aka, ɓii Talmay, laamiiɗo Gesur.

⁴Nayaɓo woni Adoniya, innde daada maako Haggit. Sefatiya woni njowaɓo, innde daada mum Abital.

⁵Njoweegoojo Yitiriyam, Egila woni daada maako. Daawuda danyi ɓe fuu haa Heburuun.

⁶Wakkati haɓre ɗonno tokki hakkunde saare Sawulu e saare Daawuda, baawɗe Abineer ɓesdi yeeso yeeso nder saare Sawulu.

⁷Nyannde go'o Isboset feli Abineer ngam daliila culaaɗo baaba maako Sawulu, innde culaaɗo oo Rispa ɓii Aya. O wi'i: “Koni mbaalduɗa bee culaaɗo baaba am?”

⁸Abineer ɓerni masin, o wi'i: “Mi zammboowo! Mi walaa amaana! Mi huuwani saare baaba ma Sawulu e banndiraaɓe muuɗum e soobiraaɓe muuɗum bee ɓernde am fuu. Mi ayni ma ngam taa nasta juuɗe Daawuda. Ammaa hannde a takkanammi haala debbo?

⁹Jawmiraawo hiito yam bee caatal to mi waɗanaay Daawuda ko Jawmiraawo hunani mo,

¹⁰o wi'no o ɓortan saare Sawulu diga laamu, o waɗa Daawuda laamiiɗo dow Isra'iila e Yahuuda fuu, diga Dan haa yotto Biirsaba.”

¹¹Isboset waawaay jaabaago Abineer koo wolde woore, ngam o huli mo.

¹²Nden Abineer neli nelaaɓe haa Daawuda, o wi'i: “Naa a anndi mo mari baawɗe haa lesdi ndi na? Kadi haɓɓu alkawal bee am. Juŋngo am wondan bee maaɗa haa mi waylitane Isra'iila fuu.”

¹³Daawuda jaabi: “Booɗɗum, mi haɓɓan alkawal bee maaɗa. Ammaa woodi huunde woore nde ɗaɓɓanmi haa maaɗa: Sey a waddanammi Mikal ɓii Sawulu debbo hiddeko a wara, a yi'ammi.”

¹⁴Daawuda neli boo nelaaɓe haa Isboset, o wi'i mo: “Hokkitam debbo am Mikal. Mi ɓaŋri mo bee lare saadooniiku Filisti'en teemerre.”

¹⁵Isboset neli hoocugo mo haa goriiko Paltiyel ɓii Layis.

¹⁶Goriiko tokki mo bee bojji haa ɓe njotti Bahuriima. Nden Abineer wi'i mo: “Dillu jonta, hootu!” Nden o hooti.

¹⁷Abineer dawri bee ndotti'en Isra'iila. O wi'i ɓe: “Naa diga ɓooyma on ɗon ɗaɓɓa haa Daawuda wona laamiiɗo mon na?

¹⁸Kadi jonta woni saa'iire fottunde. Ciftore ko Jawmiraawo wi'no: Bee juŋngo jaggiiɗo am Daawuda kisnanmi yimɓe am Isra'iila'en juuɗe Filisti'en e konne'en muuɗum'en woɗɓe fuu.”

¹⁹Abineer wolidi bee yimɓe Benyamin boo. Nden o yehi haa Heburuun ngam haa o anndina Daawuda ko Isra'iila'en e yimɓe Benyamin narri waɗugo.

²⁰Nde Abineer wari haa Heburuun, kaŋko e worɓe noogas, Daawuda waɗani ɓe nyaamduuji.

²¹Abineer wi'i mo: “Mi yahan jonta, mi mooɓta Isra'iila'en fuu, mi yahra ɓe haa maaɗa, barkaama. Sey ɓe kaɓɓa alkawal bee maaɗa, ngam haa a laato laamiiɗo mo a yiɗi laamanaago fuu.” Daawuda jaɓɓiti Abineer, kaŋko o dilli jam.

²²Wakkati seɗɗa ɓaawoɗon Yo'ab e yimɓe Daawuda ngarti diga jaɓtol feere. Ɓe ngaddi keɓal ɗuuɗŋgal. Nde Yo'ab warti bee yimɓe muuɗum, o nani Abineer warino haa Heburuun haa Daawuda, Daawuda jaɓɓiti mo, o dilli jam.

²⁴Ngam maajum Yo'ab yehi haa laamiiɗo, wi'i mo: “Ɗume mbaɗɗaa? Abineer wari haa maaɗa! Ngam ɗume accuɗa mo o dilli?

²⁵Naa a anndi Abineer? O wari ƴoyrugo ma tan, ngam haa o heɓta taaskara ma e ko waɗata fuu.”

²⁶Nde Yo'ab wurti saare laamiiɗo, o neli nelaaɓe ɓaawo Abineer ngam haa ɓe ngartira mo. Daawuda anndaa koo ɗume. Nelaaɓe tawi Abineer haa ɓulndu Sira.

²⁷O lorti bee maɓɓe haa Heburuun. Yo'ab yahri mo feere maako haa nastirde berniwol, bana o yiɗi wolwango mo bee sirri. Ton o yuwi mo haa reedu, o maayi. Bana nii Yo'ab mbardiri mo ngam waataago deerɗum Asa'el mbaraaɗo.

²⁸Nde Daawuda nani haala maajum, o wi'i: “Mi walaa aybe dow maayde Abineer, min bee yimɓe laamu am. Jawmiraawo woni ceedoowo yam. Ngam maajum kiita maako warataa dow amin haa foroy.

²⁹Ka ukkano Yo'ab e banndiraaɓe mum. Foroy woɗɓe nder asŋgol maako nyawa nyawuji ilooji malla saɗawre, woɗɓe laato jiijiiɓe tuggiiɓe dow cabbi, woɗɓe maaya nder haɓre malla bee weelo.”

³⁰Bana nii Yo'ab e Abisay mbardiri Abineer, ngam kaŋko o mbarno Asa'el, deerɗiraawo maɓɓe, nder haɓre haa Gibiyon.

³¹Nden Daawuda umri Yo'ab e yimɓe wonduɓe bee muuɗum: “Ceeke limce mon, ɓorne limce buhuuje, ngam haa on mboya Abineer.” Nde ɓe ɗon njaha uwoygo mo, laamiiɗo Daawuda bee hoore muuɗum tokki naasiwo[7].

³²Ɓe uwi Abineer haa Heburuun. Daawuda woyi bee sawtu haa yenaande maako, yimɓe fuu mboyi.

³³Laamiiɗo yimi gimol boyki dow Abineer: “Kayto Abineer, ngam ɗume maayɗa bana faataaɓe maayrata?

³⁴Juuɗe ma kaɓɓaaka, kosɗe ma naataay ge'elle. Ammaa a maayi bana mbaraaɗo mo waɗooɓe zunuuba mbari.” Nde yimɓe nani ɗum, ɓe ɓesdi woyugo.

³⁵Ɓaawoɗon ɓe tori Daawuda o nyaama seɗɗa hiddeko jemma waɗa, ammaa o sali. O huni: “Allah hiito yam naawɗum, to mi mettake nyaamdu koo nduye hiddeko naaŋge muta.”

³⁶Yimɓe ngi'i no Daawuda woyri Abineer, ɗum fottani ɓe, ko o waɗi fuu fottani ɓe.

³⁷Nyalaade maajum koo moy nder yimɓe Daawuda e nder Isra'iila fuu faami mbarki Abineer iwaay haa laamiiɗo.

³⁸Kaŋko o wi'i saraaki'en maako: “On paamaay na? Hannde ardiiɗo mawɗo maayi nder Isra'iila.

³⁹Koo mi laamiiɗo boo, mi tampuɗo hannde, ngam mi waawaay haɗugo ɓiɓɓe Seruyatu ɓe'e. Caatal maɓɓe salori yam. Jawmiraawo hiito ɓe deydey halleende maɓɓe.”