Read Fulfulde 2 Samuyila 6 Bible Online

2 Samuyila 6 - Fulfulde bible

2 Samuyila 6

¹Daawuda mooɓti honooɓe Isra'iila'en suɓaaɓe, baakin ujine cappanɗe tato (30.000).

²O yahdi bee maɓɓe haa Ba'ala nder lesdi Yahuuda ngam haa ɓe koo'oya sundukru Allah wi'eteendu fodde innde Jawmiraawo honooɓe asama, jooɗiiɗo haa dow keruba'en.

³Ɓe njo'ini sundukru Allah dow moota ga'i kesa. Ɓe ngurtini ndu saare Abinadabu wonnde dow towndiire. Uzza e Ahiyo ɓiɓɓe Abinadabu ɗon ɗowa moota man,

⁴Ahiyo ɗon ardo nga.

⁵Daawuda e Isra'iila'en fuu ɗon ngima bee seyo yeeso Jawmiraawo bee kuuje gimruɗe ɗe leɗɗe, bee moolooji e garayaaji, bee bawɗi e leŋngi e koŋsiije.

⁶Nde ɓe njotti laarre[10] Nakon, Uzza forti juŋngo mum, naŋngi sundukru, ngam ga'i mosti.

⁷Ammaa Jawmiraawo tikkani Uzza, ngam ɗum haanaayno o meema sundukru Allah. Ɗon nii Allah mbari mo.

⁸Ɓernde Daawuda metti ngam tikkere Jawmiraawo ukki dow Uzza. O inndi nokkuure nde'e Peres-Uzza[11], kanjum laati innde maare haa wargo hannde.

⁹Nyalaade maajum Daawuda huli Jawmiraawo, o ƴami: “Noy sundukru Jawmiraawo wardata haa am?”

¹⁰Ngam maajum o yiɗaa yahrugo ndu haa maako nder Berniwol Daawuda. O selni ndu haa saare Obet-Edoom, Gaatiijo.

¹¹Sundukru Jawmiraawo faɓɓi ton lebbi tati. Jawmiraawo barkiɗini Obet-Edoom e saare mum fuu.

¹²Daawuda nani: “Jawmiraawo barkiɗini Obet-Edoom e ko o mari fuu ngam daliila sundukru alkawal Allah.” Ngam maajum o seyi, o yehi ton haa o yahra sundukru haa Urusaliima.

¹³Nde roondiiɓe ndu njehi palanɗe joweego, o hirsi ngaari kalhaldi e gaggel payŋgel.

¹⁴Daawuda ɗon wama yeeso Jawmiraawo bee semmbe fuu, o ɗon ɓorni toggoore limanku.

¹⁵Bana nii Daawuda e Isra'iila'en fuu njahri sundukru Jawmiraawo haa Urusaliima, bee hoolo seyo e hoolo luwe.

¹⁶Wakkati sundukru Jawmiraawo ɗon nasta Berniwol Daawuda, Mikal ɓii Sawulu, debbo Daawuda laari gal wurdere nder mahol suudu mum. O yi'i laamiiɗo ɗon diwa, ɗon wama yeeso Jawmiraawo. Ngam maajum Mikal yawi mo haa ɓernde muuɗum.

¹⁷Ɓaawo man, ɓe nastini sundukru nder suudu laymaaru ndu Daawuda darnino ngam maaru, ɓe njo'ini ndu haa nokkuure maaru ton. Daawuda lii'ani Jawmiraawo guleteeɗi e kirseteeɗi ngam kawtal yimɓe bee Allah.

¹⁸Nde Daawuda timmini lii'aago guleteeɗi e kirseteeɗi man, o barkiɗini ummaatoore bee innde Jawmiraawo honooɓe asama.

¹⁹Isra'iila'en worɓe e rewɓe wonɓe ton fuu, Daawuda yeɗi koo moy maɓɓe tamseere e tamre dibinooje e tamre inabooje joorɗe. Nden ɓe kooti, koo moy haa saare muuɗum.

²⁰Daawuda boo hooti, ngam barkiɗingo saare mum. Mikal ɓii Sawulu wurti, fotti bee maako, wi'i: “Yowwa, hannde laamiiɗo Isra'iila teddini hoore mum bee temmbinaago yeeso horɓe e maccuɓe mum, bana goɗɗo meereejo waarata.”

²¹Daawuda jaabi mo: “Mi waɗi ɗum ngam teddingo Jawmiraawo. Kaŋko o yerdi e o suɓi yam mbattudi[12] baaba ma e saare mum, o waɗi yam laamiiɗo yimɓe maako Isra'iila'en. Fakat mi tokkoto waŋgingo seyo am yeeso maako,

²²mi ɓesdan famɗitingo hoore am ko ɓuri nii ammaa ɗum ustataa daraja am yeeso horɓe ɓe mbolwanɗa.”

²³Mikal ɓii Sawulu heɓaay ɓiŋngel haa o maayi.