Read Fulfulde 1 Laamiiɓe 12 Bible Online

1 Laamiiɓe 12 - Fulfulde bible

1 Laamiiɓe 12

¹Robo'am yehi Sikem, ngam Isra'iila'en fuu mooɓti haa Sikem ngam laamingo mo.

²Nde Yerobo'am ɓii Nebat nani haala mooɓturu maajum, o ɗonno haa Misra tawon, ngam o doggino laamiiɗo Suleymaanu.

³Ɓe neli ewnoyaago mo. O wari, kaŋko e jama'aare Isra'iila fuu. Ɓe mbolwani Robo'am:

⁴“Baaba ma saatini kaɓɓirgal dow amin. Ammaa an, hoynu kuuɗe baaba ma caatuɗe e kaɓɓirgal maako tedduŋgal nga'al dow amin, nden kam min kuuwante.”

⁵O jaabi ɓe: “Njehe, munye nyalɗe tati, nden lorte haa am.” Yimɓe ndilli.

⁶Nden laamiiɗo Robo'am ƴami sawari haa ndotti'en jagganiiɓe baaba muuɗum Suleymaanu, nde o ɗonno bee yoŋki. O ƴami ɓe: “Ɗume mi jaaboto yimɓe ɓe'e? Mbi'eeɗam.”

⁷Ndotti'en mbi'i mo: “To hannde to a woonanan ɓe, to a jaɓan ko ɓe ƴami ma, to a wolwanan ɓe bolle belɗe, nden kam ɓe mboonante foroy.”

⁸Ammaa Robo'am wudini sawari ndotti'en. O yehi, o sarwotiri bee sukaaɓe ɓe o mawnidi, jagganiiɓe mo.

⁹O wi'i ɓe: “Ɗume mi jaaboto yimɓe ɓe mbi'i mi hoyna kaɓɓirgal ngal baaba am yowani ɓe? Ko mbi'ɗon?”

¹⁰Sukaaɓe ɓe o mawnidi mbi'i mo: “Ndaa ko mbi'ata ɓe: Cimatel am ɓuri haddorde baaba am loorugo.

¹¹Baaba am yowani on doŋgle tedduɗe, min mi ɓesdanan on doŋgle ɓurɗe teddugo. Baaba am elti on bee ɓoccol, ammaa min mi eltan on bee ngabbuwol.”

¹²Nyannde tataɓre Yerobo'am e ummaatoore fuu lorti haa laamiiɗo Robo'am, bana o wi'no ɓe.

¹³Laamiiɗo wolwani yimɓe bee caatal. O wudini sawari ndotti'en,

¹⁴o jaabi fodde sawari sukaaɓe. O wi'i: “Baaba am yowani on doŋgle tedduɗe, min mi ɓesdanan on doŋgle ɓurɗe teddugo. Baaba am elti on bee ɓoccol, ammaa min mi eltan on bee ngabbuwol.”

¹⁵Bana non laamiiɗo sali jaɓugo ko ummaatoore ƴami mo. Allah Jawmiraawo wayliti haala man non ngam gooŋɗingo iinawol muuɗum ngol o iinani Yerobo'am ɓii Nebat bee hunnduko Ahiya Siloojo.

¹⁶Nde Isra'iila'en paami laamiiɗo sali nanango ɓe, ɓe fuu ɓe neldi mo jaawaabu: “En ngalaa geɗal haa saare Daawuda! En ngalaa maral haa ɓii Yessa. Isra'iila'en en koota! E an goɗɗo saare Daawuda, suklu bee laamu ma.” Nden ɓe caŋkiti, ɓe ndilli. Yimɓe fuu kooti.

¹⁷Ammaa Robo'am laamani Isra'iila'en jooɗiiɓe nder berniiji Yahuuda.

¹⁸Nden laamiiɗo Robo'am neli Adoram, kaliifaajo kuuɗe dooleeje. Ammaa Isra'iila'en fuu piɗi mo bee kaa'e, o maayi. Bee daker laamiiɗo Robo'am wa'i moota pucci mum, doggi haa Urusaliima.

¹⁹Bana nii Isra'iila tuurtirani saare Daawuda, haa wargo hannde.

²⁰Nde Isra'iila'en fuu nani Yerobo'am warti, ɓe neli, ɓe ewni mo haa jama'aare, ɓe ndokki mo laamu dow Isra'iila. Walaa tokkiiɗo saare Daawuda, sey lenyol Yahuuda tan.

²¹Robo'am boo wari Urusaliima. O mooɓti lenyol Yahuuda fuu e lenyol Benyamin, honooɓe suɓaaɓe ujine teemerre e cappanɗe njoweetato (180.000), ngam haɓugo bee yimɓe lenyol Isra'iila, ngam wartirgo laamu haa Robo'am ɓii Suleymaanu.

²²Ammaa Allah wolwani Sema'ya goɗɗo Allah, o wi'i:

²³“Wi' Robo'am ɓii Suleymaanu, laamiiɗo Yahuuda e yimɓe lenyol Yahuuda e Benyamin e luttuɓe fuu:

²⁴Ndaa nii Jawmiraawo wi'i: Taa njehe haɓugo bee banndiraaɓe mon yimɓe lenyol Isra'iila. Koo moy loro haa saare mum, ngam huunde nde'e iwi haa am.” Ɓe nani wolde Jawmiraawo, ɓe kooti.

²⁵Yerobo'am nyiɓi berniwol Sikem nder kooseeje Efrayim, o jooɗi ton. Nden o wurti ton, o nyiɓi berniwol Panuwel.

²⁶Nden Yerobo'am numi haa ɓernde muuɗum: “Jonta laamu lortoto haa saare Daawuda.

²⁷To yimɓe ɓe'e ɗon njaha haa suudu Jawmiraawo haa Urusaliima ngam lii'aago kirseteeɗi, ɓerɗe maɓɓe lortoto haa jaagorɗo maɓɓe Robo'am, laamiiɗo Yahuuda. Nden ɓe mbaratam, ɓe lortoto haa Robo'am, laamiiɗo Yahuuda.”

²⁸Ɓaawo heɓugo sawari, laamiiɗo waɗi nga'oy kaŋŋeeri ɗiɗoy. O wi'i yimɓe: “Nde ɗuuɗɗum on njehi Urusaliima, Isra'iila'en, ndaa ɗowanteeɓe mon, wurtinɓe on lesdi Misra.”

²⁹O darni gootel haa Baytila, goɗŋgel boo haa Dan.

³⁰Kanjum woni daliila ka ummaatoore waɗi hakke, ngam nde yehi yeeso gaggel goɗŋgel haa nde yotti Dan.

³¹O nyiɓi boo cuuɗi haa towndiije. O hoo'i woɗɓe nder ummaatoore ɓe ngonaay lenyol Lewi, o waɗi ɓe liman'en.

³²Nder lewru joweetataɓru, nyannde sappo e jowaɓre, Yerobo'am waɗi juulde, bana juulde laatiinde nder Yahuuda. O lii'i kirsaaɗi dow hirsirde. Bana non o waɗi haa Baytila. O lii'i kirsaaɗi ngam nga'oy koy o waɗino. Haa Baytila boo, o darni liman'en ɓe o waɗino haa nokkuuje towɗe.

³³Yerobo'am wa'i haa hirsirde nde o waɗino haa Baytila, nyannde sappo e jowaɓre nder lewru joweetataɓru. Lewru maajum, kaŋko suɓi ndu feere mum[22]. O waɗani yimɓe lenyol Isra'iila juulde, o wa'i haa hirsirde ngam wulugo uurle.