Read Fulfulde 1 Laamiiɓe 14 Bible Online

1 Laamiiɓe 14 - Fulfulde bible

1 Laamiiɓe 14

¹Wakkati maajum Abiya ɓii Yerobo'am nyawi.

²Yerobo'am wi'i debbo mum: “Umma, waylu yeeso ma ngam taa goɗɗo anndita a debbo Yerobo'am. Nden yah haa Silo. Ton annabi Ahiya woni. Ɗum kaŋko wi'i yam mi laatoto laamiiɗo ummaatoore Isra'iila.

³Hoo'u tamseeje sappo e paltaaje e fayannde bee njumri. A yaha a tawa mo. O wi'ete ko laatanto derkeejo.”

⁴Debbo Yerobo'am waɗi bana non. O ummi, o yehi Silo, o nasti suudu Ahiya. Ahiya waawaay yi'ugo, gite mum mbumi ngam nayeeku.

⁵Ammaa Jawmiraawo wi'no Ahiya: “Ndaa, debbo Yerobo'am ɗon wara ngam haa o ƴame haala ɓiyiiko nyawɗo. Nii bee nii mbi'ata mo. Ammaa to o nasti, o waylan yeeso maako.”

⁶Nde Ahiya nani sonyo kosɗe maako, saa'i o nasta haa dammugal, Ahiya wi'i: “Nastu, debbo Yerobo'am, koni ngaylata yeeso ma? Min mi nelaaɗo haa maaɗa bee kubaruwol naawŋgol.

⁷Yah, yeccu Yerobo'am: Ndaa nii Jawmiraawo Allah Isra'iila wi'i: Mi mawnini ma caka yimɓe am. Mi darni ma ngam haa a ardo yimɓe am Isra'iila'en.

⁸Mi jaɓti laamu haa saare Daawuda, mi hokki ma ngu. Ammaa an a laataaki bana jaggiiɗo am Daawuda, kaŋko o ɗowtani umrooje am, o tokki yam bee ɓernde woore, o waɗi ko fottani yam tan.

⁹Ammaa an a tulli aartuɓe ma fuu. A yehi, a huuwani hoore ma ɗowanteeɓe woɗɓe e suuraaji ɓolinaaɗi ngam tikkingo yam, a wudini yam ɓaawo ma.

¹⁰Ngam maajum, ndaa, mi yahran sarru dow saare Yerobo'am. Mi nattinan worɓe nder saare Yerobo'am, maccuɓe e rimɓe nder Isra'iila fuu. Mi wuuwan saare Yerobo'am, bana goɗɗo wuuwrata jiddere haa yolnde mum, taa nde lutta sam.

¹¹Goɗɗo saare Yerobo'am, to maayi nder berniwol, dawaaɗi nyaama mo. To o maayi haa ladde boo, colli nyaama mo, nii Jawmiraawo wi'i.

¹²Kadiboo, an, umma, hootu saare ma. Ammaa wakkati kosɗe ma njaaɓi berniwol, ɓiŋngel ma maayan.

¹³Isra'iila fuu woyan ngel. Ɓe uwan ngel. Kaŋgel feere maagel haa saare Yerobo'am heɓata uweego, ngam Jawmiraawo Allah Isra'iila tawi sey kaŋgel woni booɗŋgel nder saare Yerobo'am.

¹⁴E boo, Jawmiraawo umminanan hoore muuɗum laamiiɗo dow Isra'iila, o nattinan saare Yerobo'am hannde. Ooho, koo jonta!

¹⁵Jawmiraawo fiyan Isra'iila'en haa ɓe ndiwna bana kawlewol ndimmborto haa maayo. O ɗoofan ɓe, ɓe ndilla diga lesdi mboondi ndi'i, ndi o hokki baabiraaɓe maɓɓe. O saŋkitan ɓe haa gaɗa maayo Efratis, ngam ɓe mbaɗi suuraaji Asera, ɓe tikkini Jawmiraawo bee maaji.

¹⁶O wudinan Isra'iila'en ngam daliila hakkeeji Yerobo'am ɗi o waɗi bee hoore maako e ɗi o huuwni Isra'iila'en boo.”

¹⁷Debbo Yerobo'am ummi, dilli, hooti Tirsa. Nde o yotti haa dammugal saare, ɓiŋngel go maayi.

¹⁸Ɓe uwi ngel, Isra'iila'en fuu mboyi ngel. Ɗum waɗi fodde wolde nde Jawmiraawo wi'no bee hunnduko annabi Ahiya.

¹⁹Luttuɗum haala Yerobo'am, no o haɓri, no o laamori boo, ɗum winndaama nder Deftere Habaruuji Nyalaaɗe nde laamiiɓe Isra'iila.

²⁰Yerobo'am laami duuɓi noogas e ɗiɗi, nden o maayi. Nadab ɓiyiiko laami haa pellel maako.

²¹Robo'am ɓii Suleymaanu laamani Yahuuda. O woodi duuɓi cappanɗe nayi e go'o saa'i o laamo. O laami nder Urusaliima duuɓi sappo e joweeɗiɗi haa berniwol ngol Jawmiraawo suɓno nder le'i Isra'iila fuu ngam tabitingo innde mum. Innde daada Robo'am, Na'ama Ammooniijo.

²²Yimɓe Yahuuda mbaɗi kalluɗum yeeso Jawmiraawo, ammaa ɓe mbaɗi hakkeeji ko tulli kaakiraaɓe maɓɓe fuu. Bana nii ɓe ummini kaajal Jawmiraawo.

²³Kamɓe boo ɓe nyiɓi nokkuuje towɗe, ɓe ndarni daŋraŋge e Aseraaji dow towndiije towɗe e les leɗɗe bilititɗe fuu.

²⁴Woodi boo waɗooɓe daakaareeku ngam rewugo labbi haa nokkuuje man. Ɓe kuuwi kuuɗe nyidduɗe koo ɗeye dow towndiije man bana ummaatooje ɗe Jawmiraawo riiwino yeeso Isra'iila'en.

²⁵Nder nduuɓu laamiiɗo Robo'am njowaɓu, Sisak, laamiiɗo Misra wari hippugo Urusaliima.

²⁶O hooci ndesaaje haa haykaliiru Jawmiraawo e ndesaaje haa saare laamu, o hooci kuuje fuu. O hooci boo bawarɗe[23] kaŋŋeeri ɗe Suleymaanu waɗno.

²⁷Haa pellel maaje, laamiiɗo Robo'am waɗi bawarɗe njamndi mboɗeeri. O halfini ɗe hoore'en doogari'en aynooɓe yolnde saare laamiiɗo.

²⁸Koo ndeye laamiiɗo nasti haykaliiru Jawmiraawo, doogari'en aynooɓe ɗon njogi bawarɗe man, nden ɓe lorna ɗe haa suudu aynooɓe.

²⁹Luttuɗum haala Robo'am e kuuɗe mum, ɗum winndaama nder Deftere Habaruuji Nyalaaɗe nde laamiiɓe Yahuuda.

³⁰Foroy konu ɗonno hakkunde Robo'am e Yerobo'am.

³¹Nde Robo'am maayi, ɓe uwi mo nder Berniwol Daawuda. Innde daada maako, Na'ama Ammooniijo. Ɓiyiiko Abiya laami haa pellel maako.