Read Fulfulde 1 Laamiiɓe 15 Bible Online

1 Laamiiɓe 15 - Fulfulde bible

1 Laamiiɓe 15

¹Nder nduuɓu laamiiɗo Yerobo'am ɓii Nebat sappo e njoweetataɓu haa Isra'iila, Abiya laami haa Yahuuda.

²O laami haa Urusaliima duuɓi tati. Innde daada maako, Ma'aka ɓii Abisalom.

³Abiya waɗi hakkeeji bana ɗi baaba muuɗum aarti waɗugo. O tokkaaki Jawmiraawo Allah maako bee ɓernde woore. O waɗaay ko kaaka maako Daawuda waɗno.

⁴Jawmiraawo Allah maako hokki mo ɓiɗɗo gorko ngam ronugo laamu maako, ngam taa danygol laamu halka bana pittirla nyifirta e Urusaliima jooɗo foroy laamorde laamu. Ammaa ɗum waɗi non ngam daliila Daawuda.

⁵Ngam Daawuda waɗi ko fottani Jawmiraawo fodde balɗe muuɗum, o meeɗaay selugo umrooje maako sam, to luuti haala Uriya Hetiijo.

⁶Tum, konu ɗonno hakkunde Robo'am e Yerobo'am.

⁷Luttuɗum haala Abiya e kuuɗe mum fuu, winndaama nder Deftere Habaruuji Nyalaaɗe nde Laamiiɓe Yahuuda. Abiya boo waɗi konu bee Yerobo'am.

⁸Nde Abiya maayi, ɓe uwi mo nder Berniwol Daawuda. Ɓiyiiko Asa laami haa pellel maako.

⁹Nder nduuɓu laamu Yerobo'am laamiiɗo Isra'iila, noogaswu, Asa heɓi laamu nder Yahuuda.

¹⁰O laami haa Urusaliima duuɓi cappanɗe nayi e go'o. Innde maama maako debbo, Ma'aka ɓii Abisalom.

¹¹Asa waɗi ko fottani Jawmiraawo, bana kaaka maako Daawuda.

¹²O riiwi waɗooɓe daakaareeku ngam rewugo labbi diga lesdi. O itti boo labbi ɗi kaakiraaɓe maako mbaɗno.

¹³O itti boo maama maako debbo ngam taa o tokko huuwugo fodde baawɗe ɗe o marno, ngam o waɗno suura nyidduka ngam Asera[24]. Asa yibbini lawru maajum, o wuli ndu nder waadiwol Kederon.

¹⁴Ammaa o ittaay nokkuuje towɗe, koo nde o tokki Jawmiraawo Allah bee ɓernde woore balɗe maako fuu.

¹⁵O nastini dokke baaba maako cenaaɗe e dokke maako cenaaɗe nder haykaliiru Jawmiraawo, cardi e kaŋŋeeri e kuuje feere feere.

¹⁶Foroy konu ɗonno hakkunde Asa e Ba'asa, laamiiɗo Isra'iila.

¹⁷Ba'asa wari haɓugo bee Yahuuda. O semmbiɗini berniwol Rama ngam haa o haɗa yimɓe wurtaago koo nastugo haa Asa, laamiiɗo Yahuuda.

¹⁸Nden Asa halfini wakiili'en muuɗum luttuɗum cardi e kaŋŋeeri haa ndesaaje haykaliiru Jawmiraawo e ndesaaje saare laamu. O umri ɓe njahra ɗum fuu haa Damas, haa Benhadat ɓii Tabirimon ɓii Hesiyon laamiiɗo Siriya'en, ɓe mbi'a mo:

¹⁹“En kaɓɓa alkawal hakkunde meeɗen bana ngal baaba am e baaba ma go. Ndaa, mi neldi ma dokkal cardi e kaŋŋeeri. Fiistu alkawal ma bee Ba'asa, laamiiɗo Isra'iila, haa o hoocita honooɓe maako, o acca yam.”

²⁰Benhadat jaɓi nufayeere laamiiɗo Asa, o neli hoore'en jama'aare honooɓe maako haa ɓe ukkano berniiji Isra'iila. Ɓe njehi ɓe ukkani Iyon e Dan e Abel-Bayti-Ma'aka, non boo Kinneret e lesdi Neftali fuu.

²¹Nde Ba'asa nani ɗum, o acci semmbiɗingo berniwol Rama, o jooɗi haa Tirsa.

²²Ammaa laamiiɗo Asa mooɓti yimɓe Yahuuda fuu, walaa mo lutti koo gooto. Ɓe cottini kaa'e e leɗɗe ɗe Ba'asa ɗonno huuwtinira ngam nyiɓugo berniwol Rama fuu. Laamiiɗo Asa nyiɓi Geba nder lesdi Benyamin e Mispa bee maaje.

²³Luttuɗum haala Asa, baawɗe maako e kuuɗe maako fuu, winndaama nder Deftere Habaruuji Nyalaaɗe nde Laamiiɓe Yahuuda. Ammaa nde o ndottidi, kosɗe maako nyawi.

²⁴Nde Asa maayi, ɓe uwi mo nder berniwol kaaka maako Daawuda. Ɓiyiiko Yusafat laami haa pellel maako.

²⁵Nder nduuɓu laamu Asa laamiiɗo Yahuuda ɗiɗaɓu, Nadab ɓii Yerobo'am laami haa Isra'iila. O laamani Isra'iila duuɓi ɗiɗi.

²⁶O waɗi kalluɗum yeeso Jawmiraawo, o tokki laawol kalluŋgol bana baaba maako mo nastini Isra'iila nder hakke.

²⁷Ba'asa ɓii Ahiya mo lenyol Issakar, tuurtani mo. Ba'asa mbari mo haa Gibbeton nder maral Filisti'en, saa'i Nadab e Isra'iila fuu ɗonno kippo Gibbeton.

²⁸Ɗum waɗi nder nduuɓu laamu Asa laamiiɗo Yahuuda tataɓu. Nden o laami haa pellel maako.

²⁹Nde o laami, law o mbari yimɓe saare Yerobo'am fuu. O accaay koo gooto nder saare Yerobo'am bee yoŋki. O nattini ɓe fuu, bana wolde nde Jawmiraawo wi'no bee hunnduko jaggiiɗo muuɗum Ahiya Siloojo.

³⁰Ɗum waɗi non ngam daliila hakkeeji Yerobo'am ɗi o waɗino e ngam o nastini Isra'iila nder hakke boo. Bee maaji o ummini tikkere Jawmiraawo Allah Isra'iila.

³¹Luttuɗum haala Nadab e kuuɗe mum fuu, winndaama nder Deftere Habaruuji Nyalaaɗe nde Laamiiɓe Isra'iila.

³²Foroy konu ɗonno hakkunde Asa e Ba'asa, laamiiɗo Isra'iila.

³³Nder nduuɓu laamu Asa laamiiɗo Yahuuda tataɓu, Ba'asa ɓii Ahiya laami nder Isra'iila haa Tirsa. O laami duuɓi noogas e nayi.

³⁴O waɗi kalluɗum yeeso Jawmiraawo, o tokki laawol kalluŋgol bana Yerobo'am, mo nastini Isra'iila nder hakke.