Read Fulfulde 1 Laamiiɓe 19 Bible Online

1 Laamiiɓe 19 - Fulfulde bible

1 Laamiiɓe 19

¹Akab anndini Izabel ko Eliya waɗi fuu, no o mbardi mooɓgal annabi'en bee kaafahi.

²Izabel neli nelaaɗo haa Eliya, o wi'a mo: “Bana no a hirsiri annabi'en Ba'al ɓe'e, non mi hirsete. Jaŋngo hiddeko naaŋge nii, to ɗum waɗaay, sey ɗowanteeɓe am mbarammi!”

³Eliya hultori haala ka'a, o doggi ngam hisnugo hoore maako. O yotti Beersaba nder lesdi Yahuuda, o acci suka maako ton.

⁴Eliya nyalli yahugo nder ladde hamaadaare, o yehi o jooɗi les wumre. Nden o yeli maayugo. O wi'i: “He'i, yaa Jawmiraawo! Hoo'u yoŋki am, ngam mi ɓurataa baabiraaɓe am wooɗugo.”

⁵O waali, o ɗaani les wumre. Ammaa ndaa, malaa'ikaajo meemi mo, wi'i mo: “Umma, nyaam!”

⁶O laari, ndaa tamseere tamsaande dow kaa'e gulɗe e faandu ndiyam ɗon njooɗi kommbi hoore maako. O nyaami, o yari, nden o waali fahin.

⁷Malaa'ikaajo Jawmiraawo wari ɗiɗawre, meemi mo, wi'i mo: “Umma, nyaam, ngam a waɗan jahaaŋgal daayiiŋgal.”

⁸Eliya ummi, nyaami, yari. Nden o heɓi semmbe o dilli. Nyaamdu man he'i mo ngam nyalawmaaje cappanɗe nayi e jemmaaje cappanɗe nayi, haa o yotti Horeb, hooseere Allah.

⁹Ton o nasti nder lowol, o waali nder maagol. Nden wolde Jawmiraawo warani mo, o wi'i mo: “Ko mbaɗata ɗo, Eliya?”

¹⁰O jaabi: “Yaa Allah Jawmiraawo honooɓe asama, bee tiinaare e ɓernde am fuu kuuwananmaami. Ngam Isra'iila'en piisti alkawal ma, ɓe ngibbini kirsirɗe ma, ɓe mbari annabi'en ma bee kaafahi. Min feere am lutti, ammaa ɓe ngiɗi mbarugo yam.”

¹¹Jawmiraawo wi'i mo: “Wurta, dara dow hooseere yeeso am.” Ndaa Jawmiraawo ɗon saalo. Law henndu saatundu wifi bee semmbe haa ndu seeki kooseeje, ndu fusi tapaaje yeeso Jawmiraawo. Ammaa Jawmiraawo wonaay nder henndu. Ɓaawo henndu, dimmbaaki lesdi waɗi. Ammaa Jawmiraawo wonaay nder dimmbaaki lesdi.

¹²Ɓaawo dimmbaaki lesdi, yiite waɗi. Ammaa Jawmiraawo wonaay nder yiite. Ɓaawo yiite boo, sonyo kenel ɗelemŋgel waɗi.

¹³Nde Eliya nani ɗum, o suddi yeeso maako bee alkibbaare maako, o wurti, o dari haa hunnduko lowol. Nden sawtu wi'i mo: “Ko mbaɗata ɗo, Eliya?”

¹⁴O jaabi: “Mi huuwani ma an Allah Jawmiraawo honooɓe asama bee tiinaare e ɓernde am fuu. Isra'iila'en kam piisti alkawal ma, ɓe ngibbini kirsirɗe ma, ɓe mbari annabi'en ma bee kaafahi. Min feere am lutti, ammaa ɓe ngiɗi mbarugo yam.”

¹⁵Jawmiraawo wi'i mo: “Yah, lora dow laawol ma haa ladde Damas. To a yottake ton, moytu Hazayel bee nebbam ngam haa o laato laamiiɗo Siriya'en.

¹⁶Nden moytu Yeehu ɓii Nimsi ngam haa o laato laamiiɗo Isra'iila. Moytu boo Elisa ɓii Safat iwɗo Abel-Mehola ngam haa o laato annabiijo haa pellel maaɗa.

¹⁷Ndaa ko laatoto: Mo daɗi kaafahi Hazayel, Yeehu mbaran mo, mo daɗi kaafahi Yeehu boo, Elisa mbaran mo.

¹⁸Ammaa mi accan yimɓe ujine njoweeɗiɗo (7.000) nder ummaatoore Isra'iila, ɗum mooɓgal yimɓe ɓe tuggaay koppi maɓɓe yeeso suura Ba'al e ɓe kebbaaki suura ka'a.”

¹⁹Nden Eliya dilli, tawi Elisa ɓii Safat, ɗon rema bee ga'i demooji ɗiɗi ɗiɗi haa sappo e ɗiɗi yeeso muuɗum. O ɗon wondi bee sappo e ɗiɗaɓi. Eliya yehi haa maako, yoofti alkibbaare mum dow maako.

²⁰Elisa acci ga'i, tokki Eliya, wi'i mo: “Munyu mi jaɓɓito baaba am e daada am tawon, nden mi tokko ma.” Eliya wi'i mo: “Yah, lorta, walaa ko ƴammaami!”

²¹O lori, o hoo'i ga'i ɗiɗi go, o hirsi. Bee kaɓɓirgal ga'i o defi kusel maaji, o hokki ngel yimɓe, ɓe nyaami. Nden o ummi, o tokki Eliya, o huuwani mo.