Read Fulfulde 1 Laamiiɓe 2 Bible Online

1 Laamiiɓe 2 - Fulfulde bible

1 Laamiiɓe 2

¹Nde Daawuda ɓadi maayugo, o ewni ɓiyiiko Suleymaanu, o umri mo, o wi'i:

²“Wakkati maayde am ɓaditake, semmbiɗiɗ, laata a goɗɗo cuusɗo.

³Sey a tokko ɗowtanaago Jawmiraawo Allah maaɗa. Tokka laabi maako, hakkilan farillaaji maako e umrooje maako e kiitaaji maako e seedamkuuji maako, bana ko winnda nder tawreeta Muusa, ngam keɓa barka nder kuuɗe ma fuu e koo toy njahata fuu,

⁴ngam haa Jawmiraawo hebbitina wolde muuɗum nde o wi'i yam: To ɓiɓɓe maaɗa kakkilani yahdu maɓɓe, to ɓe ɗowtanake yam bee gooŋga e ɓernde woore, nden kam a sooyataa goɗɗo danygol ma dow leeso laamu Isra'iila sam.” Non Jawmiraawo wi'i.

⁵Daawuda ɓesdi wi'ugo mo: “A anndi ko Yo'ab ɓii Seruyatu waɗi yam e ko o waɗi mawɓe honooɓe Isra'iila ɗiɗo, waato Abineer ɓii Neer e Amasa ɓii Yeter. O mbari ɓe, o rufi ƴiiƴam wakkati salaaman bana nder konu. Nde o waɗi ɗum, o waɗi kuugal konu wakkati salaaman, aybe[4] man fuu dow hoore maako.

⁶A waɗa fodde hikma maaɗa. Taa accu o nasta nder joonde maayɓe bee de'ere e ndottaaku.

⁷Ammaa ɓiɓɓe Barjillay mo Gile'at, sey a waɗana ɓe mbooɗeeŋga, ɓe ngona caka nyaamanɓe haa saare ma. Ngam kamɓe ɓe njahdino bee am saa'i mi doggi yeeso deerɗa Absalom.

⁸Ammaa, Sim'i ɓii Gera, Benyaminiijo mo Bahuriima, o naali yam naaloore naawnde nyalaade nde mi ɗonno dogga haa Mahanayim. Ammaa nde mi ɗon lorto, o jippi, o fotti bee am haa Urdun, nden mi hunorani mo bee Jawmiraawo mi mbarataa mo.

⁹Ammaa an jonta, taa laar mo bana o laaɓɗo, ngam a marɗo hikma, a anndi ko a waɗata mo. Koo nder ndottaaku maako, sey a hiito mo kiita mbareego.”

¹⁰Nden Daawuda maayi, ɓe uwi mo nder Berniwol Daawuda.

¹¹Daawuda laamani Isra'iila duuɓi cappanɗe nayi. Duuɓi joweeɗiɗi o laami haa Heburuun, duuɓi cappanɗe tati e tati boo o laami haa Urusaliima.

¹²Suleymaanu jooɗi dow leeso laamu baaba muuɗum Daawuda, laamu muuɗum semmbiɗi masin.

¹³Nyannde feere, Adoniya ɓii Daawuda mo Haggit danyani mo, wari haa Bat-Seeba, daada Suleymaanu. Bat-Seeba ƴami: “Jam waddi ma na?” O wi'i: “Jam.”

¹⁴Nden o ɓesdi: “Woodi ko mbi'anmaami.” Bat-Seeba wi'i: “Wolwu.”

¹⁵O wi'i: “A anndi min marno laamu. Isra'iila fuu ɗonno reeni haa mi laato laamiiɗo. Ammaa laamu waylitake, deerɗam laamake, ngam diga Jawmiraawo ngu iwi.

¹⁶Jonta mi ɗon toro ma huunde woore, taa salanam nde.” Bat-Seeba wi'i: “Wolwu.”

¹⁷O wi'i mo: “Wolwan laamiiɗo Suleymaanu, ngam o salantaako ma, haa o te'anammi Abisag Sunemiijo.”

¹⁸Bat-Seeba wi'i: “Booɗɗum, mi wolwanan laamiiɗo haala maaɗa.”

¹⁹Bat-Seeba nasti suudu laamiiɗo Suleymaanu, haa o wolwana mo haala Adoniya. Laamiiɗo ummi haa fotta bee maako, turi yeeso Bat-Seeba, nden o jooɗi dow leeso laamu. O wi'i ɓe njo'ina leeso laamu ngam daada laamiiɗo, daada maako boo jooɗi haa nyaamo maako.

²⁰O wi'i mo: “Woodi huunde famarde mi yiɗi toraago ma, taa salanam nde.” Laamiiɗo wi'i mo: “Ƴam, daada am, mi salantaako ma.

²¹O wi'i: A waawataa accugo deerɗa Adoniya te'a Abisag Sunemiijo na?”

²²Laamiiɗo Suleymaanu jaabi daada maako: “Koni a toranto Adoniya Abisag Sunemiijo? Sey a torano mo boo laamu, ngam o mawnam! A ƴamana boo Abiyatar limanjo e Yo'ab ɓii Seruyatu!”

²³Laamiiɗo Suleymaanu hunori bee Jawmiraawo, o wi'i: “Adoniya yoɓan wolde nde'e bee yoŋki muuɗum. Jawmiraawo hiito yam bee caatal to mi mbaraay mo.

²⁴Jonta kam, fakat bana Jawmiraawo o geeto, mo tabitini yam, jo'ini yam dow leeso laamu baaba am Daawuda, mo hokki danygol am boo laamu bana o wi'no, hannde nden sey Adoniya mbare.”

²⁵Nden laamiiɗo Suleymaanu neli Benaya ɓii Yoyada, o yehi o mbari Adoniya.

²⁶Nden laamiiɗo wi'i Abiyatar limanjo: “Yah haa Anatot, haa gese ma. A he'i mbareego, ammaa nyalaade nde'e mi mbarataa ma, ngam a roondi sundukru Allah Jawmiraawo yeeso baaba am Daawuda, a walli baaba am nder ɓillaaje mum fuu.”

²⁷Bana nii Suleymaanu wudini Abiyatar, taa o tokko kuugal limanku Jawmiraawo. Ɗum waɗi ngam hebbitingo koŋngol Jawmiraawo ngol o wi'i dow saare Eeli haa Silo.

²⁸Habaru man yotti Yo'ab ngam kaŋko, o hawtuno bee Adoniya, ammaa o hawtaay bee Absalom. O doggi o yehi haa laymaaru Jawmiraawo, o naŋngi luwe hirsirde.

²⁹Laamiiɗo Suleymaanu anndinaama: “Yo'ab doggi yehi haa laymaaru Jawmiraawo, o ɗon dari haa hirsirde.” Suleymaanu neli Benaya ɓii Yoyada, o wi'i: “Yah, mbar mo.”

³⁰Benaya yehi haa laymaaru Jawmiraawo, o wi'i Yo'ab: “Ndaa nii laamiiɗo wi'i: wurta!” Yo'ab jaabi: “Aa'a, haa ɗo maayanmi.” Benaya yehi lornani laamiiɗo ko Yo'ab jaabi mo.

³¹Laamiiɗo wi'i: “Waɗ bana o wolwiri. Mbar mo e a uwa mo. Bana nii ittanam min e saare baaba am aybe ƴiiƴam ɗam Yo'ab rufi meere.

³²Jawmiraawo wartiran ƴiiƴam maako dow hoore maako, ngam o mbari worɓe ɗiɗo ɓurɓe mo adilaaku e mbooɗeeŋga. O mbardi ɓe bee kaafahi, baaba am Daawuda anndaano ɗum, Abineer ɓii Neer, hooreejo konu Isra'iila e Amasa ɓii Yeter, hooreejo konu Yahuuda.

³³Aybe mbar-hoore maɓɓe waran dow hoore Yo'ab e dow danygol maako haa foroy. Ammaa Daawuda e danygol mum e saare muuɗum e leeso laamu mum, jam laatanto ɓe diga Jawmiraawo haa foroy.”

³⁴Benaya ɓii Yoyada yehi, mbari mo. Yo'ab uwaama haa suudu muuɗum nder ladde hamaadaare.

³⁵Laamiiɗo darni Benaya ɓii Yoyada haa pellel Yo'ab dow jama'aare konu. Laamiiɗo darni boo Cadok limanjo haa pellel Abiyatar.

³⁶Nden laamiiɗo neli ewnaago Sim'i. O wi'i mo: “Nyiɓan hoore ma saare haa Urusaliima, jooɗa ton, taa yah koo toy.

³⁷To nyannde a wurti berniwol ngo'ol, a saali maayel Kederon, anndu fakat a maayan, aybe maayde ma waran dow hoore ma.”

³⁸Sim'i jaabi laamiiɗo: “Koŋngol ngo'ol fotti, barkaama, mi waɗan bana a wi'i yam.” Sim'i jooɗi, duuri haa Urusaliima.

³⁹Ammaa nde duuɓi tati caali, maccuɓe Sim'i ɗiɗo ndoggi, ɓe njehi haa Akis ɓii Ma'aka, laamiiɗo haa Gaat. Sim'i anndinaama: “Ndaa, maccuɓe ma ɗon haa Gaat.”

⁴⁰Sim'i ummi, daɗɗi wamnde muuɗum, dilli Gaat haa Akis ngam ɗaɓɓitoygo maccuɓe muuɗum. O wartiri ɓe diga Gaat.

⁴¹Suleymaanu anndinaama Sim'i yehi diga Urusaliima haa Gaat, warti.

⁴²Nden o neli ngam ewnaago Sim'i, o wi'i mo: “Naa mi hunni ma bee innde Jawmiraawo, taa a wurto berniwol e mi reentini[5] ma bee laaɓɗum, mi wi'i: To nyannde a wurti berniwol, a dilli koo toye, anndu fakat a maayan! An boo a jaabi yam: Koŋngol ngol mi nani, fotti.

⁴³Koni a hakkilanaay hunayeere bee Jawmiraawo, koo umroore nde umrumaami?”

⁴⁴Nden laamiiɗo wi'i Sim'i: “An a anndi, ɓernde ma boo anndi kalluɗum ko kuuwɗa baaba am Daawuda fuu. Bana nii Jawmiraawo lornirta halleende ma dow hoore ma.

⁴⁵Ammaa min mi heɓan barka Jawmiraawo, leeso laamu Daawuda boo tabitan yeeso maako haa foroy.”

⁴⁶Laamiiɗo umri Benaya ɓii Yoyada, o yehi, o mbari Sim'i. Bana nii laamu Suleymaanu semmbiɗiri.