Read Fulfulde 1 Laamiiɓe 21 Bible Online

1 Laamiiɓe 21 - Fulfulde bible

1 Laamiiɓe 21

¹Ndaa ko waɗi ɓaawoɗon: Nabot, goɗɗo Yisre'el, o woodi ngesa inabooje haa Yisre'el kommbi laamorde Akab, laamiiɗo Samariya.

²Nyannde feere, Akab wi'i Nabot: “Hokkam ngesa inabooje ma, ka laato ciraka am, ngam ka ɓadi bee saare am. Mi sannjante bee ngesa inabooje am ɓuranka wooɗugo. Malla to ceede ɓuri fottango ma, mi yoɓete ceede saman maaka.”

³Ammaa Nabot wi'i Akab: “Allah Jawmiraawo haɗa yam hokkugo ma maral kaakiraaɓe am ngal mi roni!”

⁴Akab warti saare bee mettamɓeram e tikkere ngam wolde nde Nabot mo Yisre'el wi'i mo: “Mi fotaay hokkugo ma maral kaakiraaɓe am ngal mi roni!” O waali dow be'itte maako, o waylitani yimɓe ɓaawo, o yiɗaa nyaamugo koo ɗume.

⁵Debbo maako Izabel nasti haa maako, ƴami mo: “Ngam ɗume ɓernde ma metti, a nyaamaay koo ɗume?”

⁶O jaabi mo: “Mi wi'i Nabot mo Yisre'el: Hokkam ngesa inabooje ma mi sooda ka. Malla boo to a yiɗi, mi sannjante bee ngesa am ngoɗka. Ammaa o wi'i o hokkataa yam ngesa inabooje maako.”

⁷Debbo maako Izabel wi'i mo: “Naa an woni laamiiɗo Isra'iila na! Umma, nyaam, seynu ɓernde ma. Min mi hokkete ngesa inabooje Nabot mo Yisre'el.”

⁸Nden o winndi bataakeeji bee innde laamiiɗo Akab, o waɗani ɗi haatummeere Akab. O neldi ɗi haa ndotti'en e mawɓe berniwol ngol Nabot woni.

⁹Nder bataakeeji man, o winndi bana ni'i: “Ewne yimɓe, ɓe kawta ngam suumaago, njo'ine Nabot haa nokkuure teddunde caka maɓɓe.

¹⁰Njo'ine worɓe meere'en ɗiɗo boo yeeso maako, haa ɓe ceedo dow maako, ɓe mbi'a: A wolwi kalluka dow Allah e dow laamiiɗo. Nden ngurtine mo, piɗe mo bee kaa'e haa o maaya.”

¹¹Worɓe berniwol maako e ndotti'en e mawɓe, jooɗiiɓe nder berniwol maako fuu, mbaɗi bana ko Izabel umruno ɓe, bana ko winnda nder bataakeeji ɗi o nelduno ɓe.

¹²Ɓe cuumi, ɓe njo'ini Nabot haa nokkuure teddunde caka yimɓe.

¹³Worɓe meere'en ɗiɗo ngari, ɓe njooɗi yeeso maako. Ɓe ceedi dow Nabot yeeso yimɓe. Ɓe mbi'i: “Nabot wolwi kalluka dow Allah e dow laamiiɗo.” Nden ɓe ngurtini mo yaasi berniwol, ɓe piɗi mo bee kaa'e haa o maayi.

¹⁴Ɓaawo maajum ɓe neli haa Izabel, ɓe mbi'i: “Nabot fiɗiraama kaa'e, o maayi.”

¹⁵Nde Izabel nani Nabot fiɗiraama kaa'e haa o maayi, o yehi o wi'i Akab: “Umma, yah hoocu ngesa inabooje Nabot Yisre'eljo ka o salino soorrango ma go, a mara ka. Ngam Nabot maayi.”

¹⁶Nde Akab nani Nabot maayi, o ummi, o yehi haa ngesa inabooje Nabot Yisre'eljo ngam haa o mara ka.

¹⁷Ammaa wolde Jawmiraawo warani Eliya Tisbeejo, o wi'i:

¹⁸“Umma, yah fottu bee Akab, laamiiɗo Isra'iila gonɗo haa Samariya. Ndaa, o ɗon haa ngesa inabooje Nabot. Ton o yehi ngam marugo ka.

¹⁹Wi' mo: Ndaa nii Jawmiraawo wi'i: A mbari goɗɗo, a jaɓti maral maako na? Anndu, haa nokkuure dawaaɗi tahi ƴiiƴam Nabot, ton ɗi tahata ƴiiƴam maaɗa boo.”

²⁰Akab wi'i Eliya: “A heɓti yam na, an konneejo am?” O jaabi: “Mi heɓti ma, ngam a waɗi anniya huuwugo kalluɗum yeeso Jawmiraawo.”

²¹Ndaa ko o wi'i: “Mi ukkan sarru dow maaɗa, mi wuuwan ɓaawo maaɗa. Mi nattinan worɓe nder danygol ma fuu, maccuɓe e rimɓe nder Isra'iila.

²²Mi wartiran saare ma bana saare Yerobo'am ɓii Nebat, bana saare Ba'asa ɓii Ahiya, ngam a tikkini yam masin, a nastini Isra'iila boo nder hakke.”

²³Jawmiraawo wolwi haala Izabel boo, o wi'i: “Dawaaɗi nyaaman Izabel haa mahol taariiŋgol Yisre'el.

²⁴Koo moy nder saare Akab, to maayi nder berniwol, dawaaɗi nyaaman mo. To maayi haa ngesa boo, colli nyaaman mo.”

²⁵Fakat, walaa nannduɗo bee Akab mo waɗi anniya ngam waɗugo kalluɗum yeeso Jawmiraawo. Ɗum debbo maako Izabel esti mo.

²⁶O waɗi nyidduɗum masin bee tokkaago labbi bana ko Amoori'en mbaɗi kal-kal. Kamɓe Jawmiraawo riiwno yeeso Isra'iila'en.

²⁷Nde Akab nani bolle ɗe'e, o seeki limce maako, o ɓorni limce buhuuje, o suumi. O waali nder limce buhuuje, o ɗonno yaha deesa-deesa.

²⁸Jawmiraawo wolwani Eliya Tisbeejo, o wi'i:

²⁹“A yi'i no Akab leesniri hoore muuɗum yeeso am na? Ngam o leesni hoore maako yeeso am, mi ukkataa sarru nder balɗe maako. Ammaa nder balɗe ɓiyiiko ukkanmi sarru dow saare maako.”