Read Fulfulde 1 Laamiiɓe 22 Bible Online

1 Laamiiɓe 22 - Fulfulde bible

1 Laamiiɓe 22

¹Duuɓi tati caali bilaa konu hakkunde lesdi Siriya e lesdi Isra'iila.

²Nder nduuɓu tataɓu, Yusafat, laamiiɗo Yahuuda, wari haa laamiiɗo Isra'iila.

³Laamiiɗo Isra'iila wi'i sukaaɓe muuɗum: “On anndi booɗɗum enen njeyi berniwol Ramot nder Gile'at. Ngam ɗume en ɗon miijo hoo'ugo ngol diga juŋngo laamiiɗo Siriya'en?”

⁴Nden o ƴami Yusafat: “A yahdan bee am ngam konu haa Ramot nder Gile'at na?” Yusafat jaabi laamiiɗo Isra'iila: “Min bee ma en ɗon bana goɗɗo gooto, non boo yimɓe am e yimɓe maaɗa, pucci am e pucci maaɗa.”

⁵Ammaa Yusafat wi'i laamiiɗo Isra'iila: “Ƴam Jawmiraawo tawon.”

⁶Laamiiɗo Isra'iila mooɓti annabi'en, ɓe ndillani teemeɗɗe nayo. O ƴami ɓe: “Mi yaha haɓugo bee Ramot nder Gile'at na malla mi acca?” Ɓe mbi'i: “Yah, barkaama, Jawmiraawo hokkete ngol.”

⁷Ammaa Yusafat ƴami: “Walaa annabiijo Jawmiraawo lutti haa o ƴamana en Jawmiraawo na?”

⁸Laamiiɗo Isra'iila jaabi mo: “Lutti gooto. Ammaa mi wanyi mo, ngam o waɗantaa yam annabaaku hayru sey sarru. Ɗum Mikaya ɓii Yimla.” Yusafat wi'i: “Taa wolwu bana non.”

⁹Laamiiɗo Isra'iila ewni saraakiijo, umri mo: “Law, waddu Mikaya ɓii Yimla.”

¹⁰Akab, laamiiɗo Isra'iila e Yusafat, laamiiɗo Yahuuda ɗon njooɗi haa babal kommbi nastirde dammugal Samariya, koo moy dow leeso laamu muuɗum, ɓe ɗon ɓorni limce laamu boo. Annabi'en fuu ɗon mbaɗa annabaaku yeeso maɓɓe.

¹¹Sedekiya ɓii Kenana waɗani hoore muuɗum luwe njamndi, wi'i: “Ndaa nii Jawmiraawo wi'i: Bee luwe ɗe'e a hawata Siriya'en haa a nattina ɓe fuu.”

¹²Annabi'en fuu mbaɗi annabaaku kal-kal. Ɓe mbi'i: “Yah haa Ramot nder Gile'at. A jaaloto, ngam Jawmiraawo hokkete ngol, barkaama.”

¹³Nelaaɗo jahɗo ngam ewnaago Mikaya wolwani mo: “Ndaa, annabi'en kawti hunnduko wooto, ɗon mbolwana laamiiɗo haala hayru. Taaska an boo ngam haa a wolwa wolde hayru bana maɓɓe.”

¹⁴Ammaa Mikaya wi'i: “Fakat bana Jawmiraawo o geeto, ko Jawmiraawo wi'atammi, kanjum mbolwanmi!”

¹⁵Nde o wari haa laamiiɗo, laamiiɗo wi'i mo: “Mikaya, min njaha haɓoygo bee Ramot nder Gile'at na malla min acca?” O jaabi mo: “Yah, a jaaloto, ngam Jawmiraawo hokkete ngol.”

¹⁶Ammaa Laamiiɗo wi'i mo: “Nde noy mi hunnete a yeccammi gooŋga bee innde Jawmiraawo?”

¹⁷O jaabi: “Mi yi'i yimɓe Isra'iila fuu, ɓe saŋkitiiɓe dow kooseeje bana baali ɗi ngalaa gaynaako. Jawmiraawo wi'i: Ɓe ngalaa jaagorɗo, sey koo moy maɓɓe hoota saare mum bee jam.”

¹⁸Laamiiɗo Isra'iila wi'i Yusafat: “Naa mi wi'i ma? O waɗantaa yam annabaaku hayru sey sarru!”

¹⁹Mikaya tokki wi'ugo: “Ngam maajum nan wolde Jawmiraawo. Mi yi'i Jawmiraawo, o ɗon jooɗi dow leeso laamu maako. Jama'aare honooɓe asama fuu ɗon dari kommbi maako, haa nyaamo maako e nano maako.

²⁰Jawmiraawo ƴami: Moy estata Akab haa o yaha, o do'o haa Ramot nder Gile'at? Oo jaabi feere, oya boo jaabi feere.

²¹Nden ruuhuwol ɓaditi, dari yeeso Jawmiraawo, wi'i: Min mi estan mo. Jawmiraawo ƴami ngol: Bee ɗume?

²²Ngol jaabi: Mi yahan, mi laatoto ruuhu fewre nder kunnduɗe annabi'en maako fuu. Jawmiraawo wi'i: Estu mo, a humtan. Yah, waɗ bana non.”

²³Nden Mikaya wi'i: “Jonta ɗum laatake. Jawmiraawo waɗi ruuhu fewre nder kunnduɗe annabi'en maaɗa ɓe'e fuu. Ammaa kaŋko bee hoore maako annini sarru maaɗa.”

²⁴Ammaa Sedekiya ɓii Kenana ɓaditi, maari Mikaya, wi'i: “Noy Ruuhu Jawmiraawo acciri yam haa wolwane an?”

²⁵Mikaya jaabi: “A heɓtan ɗum nyalaade nde ndoggata diga suudu haa suudu ngam haa a nyukko.”

²⁶Nden laamiiɗo Isra'iila wi'i sukaaɓe muuɗum: “Naŋngu Mikaya, yahru mo haa Amon hooreejo berniwol e haa ɓiyam Yo'as.”

²⁷Yeccu ɓe, ndaa nii laamiiɗo wi'i: “Nastine gorko oo nder suudu fursina[29], ndokke mo nyaamdu e ndiyam tan, sey to mi warti jam.”

²⁸Mikaya wi'i: “To a warti jam, nden kam Jawmiraawo wolwaay bee hunnduko am.” Nden o ɓesdi wi'ugo: “Nane ɗum, onon yimɓe fuu!”

²⁹Akab, laamiiɗo Isra'iila e Yusafat, laamiiɗo Yahuuda njehi haɓugo bee Ramot nder Gile'at.

³⁰Laamiiɗo Isra'iila wi'i Yusafat: “Mi wayla yeeso am, nden mi nasta haɓre. Ammaa an ɓorna limce laamu maaɗa.” Laamiiɗo Isra'iila wayli yeeso muuɗum, nden o nasti haɓre.

³¹Ammaa laamiiɗo Siriya umruno hoore'en dow mootaaji pucci mum cappanɗe tato e ɗiɗo, taa ɓe kaɓa bee koo moye, sey bee laamiiɗo Isra'iila tan.

³²Nde hoore'en dow mootaaji pucci ngi'i Yusafat, ɓe numi kaŋko woni laamiiɗo Isra'iila fakat. Ɓe ngayliti haa maako ngam haɓre. Ammaa Yusafat wooki.

³³Nden hoore'en mootaaji pucci annditi naa ɗum laamiiɗo Isra'iila, ɓe lori, ɓe acci mo.

³⁴Nder haɓre man, goɗɗo tiri lagaawal, fiɗi laamiiɗo Isra'iila bee kurol haa jokkere sulkewol bilaa anniya. Akab wi'i laanyoowo moota pucci mum: “Waylita, wurtinam haɓre, mi piɗaaɗo.”

³⁵Haɓre wuli masin nyannde maajum. Ɓe ndarni laamiiɗo nder moota pucci muuɗum, haa o tiitotira bee Siriya'en. Ƴiiƴam huuduure maako ili nder moota pucci. Kiikiiɗe man o maayi.

³⁶Nde naaŋge muti, wookaandu waɗi nder saŋngeere: “Koo moy hoota haa berniwol mum. Koo moy hoota haa lesdi mum!”

³⁷Bana nii laamiiɗo maayri, ɓe ngaddi mo haa Samariya, ɓe uwi mo ton.

³⁸Nde ɓe looti moota puccu haa weendu Samariya, dawaaɗi tahi ƴiiƴam maako, rewɓe daakaare'en boo ngiiwi nder maajam fodde wolde nde Jawmiraawo wi'no.

³⁹Luttuɗum haala Akab e kuuɗe mum fuu e suudu nyii'e nyiibi ndu o nyiɓi e berniiji ɗi o nyiɓi fuu, ɗum winndaama nder Deftere Habaruuji Nyalaaɗe nde Laamiiɓe Isra'iila.

⁴⁰Akab maayi. Ɓiyiiko Ahaziya laami haa pellel maako.

⁴¹Nder nduuɓu laamu Akab, laamiiɗo Isra'iila nayaɓu, Yusafat ɓii Asa laami haa Yahuuda.

⁴²Yusafat woodi duuɓi cappanɗe tati e jowi saa'i o laamo. O laami haa Urusaliima duuɓi noogas e jowi. Innde daada maako, Ajuba ɓii Silhi debbo.

⁴³O tokki laawol baaba maako Asa o selaay ngol. O waɗi ko fottani Jawmiraawo.

⁴⁴Sey nokkuuje towɗe cottaay tawon, yimɓe tokki hirsugo e wulugo uurle haa nokkuuje man.

⁴⁵Yusafat narri bee laamiiɗo Isra'iila boo.

⁴⁶Luttuɗum haala Yusafat e kuuɗe mum e baawɗe mum, no o haɓri boo, ɗum winndaama nder Deftere Habaruuji Nyalaaɗe nde Laamiiɓe Yahuuda.

⁴⁷O mbari boo waɗooɓe daakaareeku ngam rewugo labbi, luttunooɓe diga zamanu baaba maako Asa.

⁴⁸Saa'i maajum walaa laamiiɗo nder Edoom, wakiiliijo laamiiɗo laami.

⁴⁹Yusafat waɗi koommbooje[30] Tarsis ngam yahugo Ofir, ngam heɓugo kaŋŋeeri ton. Ammaa ɓe njahaay, ngam koommbooje ngewi haa Esiyon-Geber.

⁵⁰Nden Ahaziya ɓii Akab wi'i Yusafat: “Accu yimɓe am njahda bee ɓe maaɗa nder koommbooje.” Ammaa Yusafat jaɓaay.

⁵¹Nde Yusafat maayi, ɓe uwi mo kommbi kaakiraaɓe maako nder berniwol kaaka maako Daawuda. Yehoram, ɓiyiiko laami haa pellel maako.

⁵²Nder nduuɓu laamu Yusafat, laamiiɗo Yahuuda sappo e njoweeɗiɗaɓu, Ahaziya ɓii Akab laami haa Isra'iila. O laamani Isra'iila duuɓi ɗiɗi.

⁵³O waɗi kalluɗum yeeso Jawmiraawo. O tokki laawol baaba maako e ngol daada maako e ngol Yerobo'am ɓii Nebat mo nastini Isra'iila'en hakke.

⁵⁴O rewi Ba'al, o sujidani ɗum. O tikkini Jawmiraawo Allah Isra'iila, bana ko baaba maako waɗno fuu.