Read Fulfulde 1 Laamiiɓe 4 Bible Online

1 Laamiiɓe 4 - Fulfulde bible

1 Laamiiɓe 4

¹Laamiiɗo Suleymaanu laamani ummaatoore Isra'iila fuu.

²Ndaa ɓe'e ngoni saraaki'en maako: Yejaniya ɓii Cadok woni limanjo,

³Elihooref e Ahiya ɓiɓɓe Siisa ngoni winndooɓe, Yusafat ɓii Ahiluudi woni hunndukoojo laamiiɗo.

⁴Benaya ɓii Yoyada woni mawɗo honooɓe, Cadok e Abiyatar ngoni liman'en,

⁵Azariya ɓii Natan woni hooreejo wakiili'en, Zabuuda ɓii Natan woni limanjo e sawariijo,

⁶Ahisar woni kaliifaajo laamorde, Adoram ɓii Abda woni kaliifaajo kuuɗe dooleeje.

⁷Suleymaanu woodi boo wakiili'en sappo e ɗiɗo, ardinaaɓe dow lesdi Isra'iila fuu. Kamɓe ndokkata nyaamdu haa laamiiɗo e yimɓe saare muuɗum fuu, koo moy maɓɓe ɗon huuwa lewru wooru nder hitaande.

⁸Ndaa inɗe maɓɓe: Ɓii-Huuru, o ardani kooseeje Efrayim,

⁹Ɓii Deker, o ardani Makas e Sa'albiima e Bayti-Semes e Elon-Bayti-Hanan,

¹⁰Ɓii Heset, o ardani Arubot e Soko e lesdi Hefer fuu.

¹¹Ɓii Abinadabu, o ardani lesdi Nafot Door fuu. Taafat ɓii Suleymaanu woni debbo maako.

¹²Ba'ana ɓii Ahiluudi, o ardani Ta'anak e Megiddo e Bayti-Se'an haa wakeere Jaretaan fuu, haa les Yisre'el, diga Bayti-Se'an haa yotti Abel-Mehola, gaɗa Yokme'am.

¹³Ɓii Geber, o ardani Ramot-Gile'at e berniiji Ya'ir, ɓii Manassa nder jiha Gile'at, o ardani boo lesdi Argoba nder Baasan, berniiji mawɗi cappanɗe joweego bee mahi e jamɗe boɗeeje palduɗe haa dammuɗe.

¹⁴Ahinadab ɓii Iddo, o ardani Mahanayim,

¹⁵Ahimaas ardani lesdi lenyol Neftali e kaŋko ɓaŋgi Basmat ɓii Suleymaanu.

¹⁶Ba'ana ɓii Husay ardani lesdi lenyol Aser e Be'alot,

¹⁷Yusafat ɓii Paruuha ardani lesdi Issakar,

¹⁸Sim'i ɓii Ela ardani lesdi lenyol Benyamin,

¹⁹Geber ɓii Uuri ardani lesdi Gile'at, nder lesdi Sihon, laamiiɗo Amoori'en e Ook, laamiiɗo Baasan. Kaŋko feere maako woni wakiiliijo nder lesdi maajum.

²⁰Yimɓe Yahuuda e Isra'iila ɗuuɗi bana njaareendi haa maayo. Ɓe ngoodi nyaamduuji e njaram, ɓe ɗon ceyo.