Read Fulfulde 2 Laamiiɓe 1 Bible Online

2 Laamiiɓe 1 - Fulfulde bible

2 Laamiiɓe 1

¹Ɓaawo maayde Akab, Mo'abi'en tuurtani Isra'iila.

²Nyannde feere, laamiiɗo Ahaziya do'i gal wurdere cabbi gaafindiraaɗi haa suudu muuɗum dowru haa Samariya, o naawni. Nden o neli nelaaɓe haa ɓe njaha ɓe ƴama Ba'al-Zebub, lawru haa berniwol Ekuruun, ngam anndugo to o yamɗitan e naawnere do'ere nde'e.

³Ammaa malaa'ikaajo Jawmiraawo wari wolwani Eliya Tisbeejo, wi'i mo: “Umma, yah fottu bee nelaaɓe laamiiɗo Samariya. Yeccu ɓe: Kadi Allah walaa haa Isra'iila na? Koni njahoton ƴamugo Ba'al-Zebub, lawru Ekuruun'en?

⁴Ngam maajum, ndaa nii Jawmiraawo wi'i: A ummataako diga be'itte ɗe mbaaliiɗa, a maayan fakat.” Nden Eliya dilli.

⁵Nelaaɓe ngarti haa laamiiɗo. O ƴami ɓe: Koni ngartuɗon?

⁶Ɓe njaabi mo: “Goɗɗo wari, fotti bee amin, wi'i: Lorte haa laamiiɗo nelɗo on. Mbi'e mo: Ndaa nii Jawmiraawo wi'i: Allah walaa haa Isra'iila na? Koni a neli nelaaɓe haa ɓe ƴamane Ba'al-Zebub, lawru Ekuruun'en? Ngam maajum a ummataako diga be'itte ɗe mbaaliiɗa, a maayan fakat.”

⁷O ƴami ɓe: “Goɗɗo pottuɗo bee mooɗon, bolwanɗo on bolle ɗe'e, o moyeejo?”

⁸Ɓe njaabi mo: “O ɓorniiɗo limce gaasa, o taadiiɗo bee taadorgol laral haa keeci maako.” Laamiiɗo wi'i: “Ɗum Eliya Tisbeejo.”

⁹Nden o neli ardiiɗo dow honooɓe cappanɗe njowo bee yimɓe muuɗum cappanɗe njowo haa Eliya. Ardiiɗo go wa'i haa maako, kaŋko o ɗon jooɗi haa yeereere hooseere. O wi'i mo: “An, goɗɗo Allah, laamiiɗo wi'i sey a jippo.”

¹⁰Eliya jaabi: “Nde mi goɗɗo Allah, sey yiite do'o diga asama, nge nyaame an e honooɓe ma cappanɗe njowo fuu.” Saa'i man nden yiite Allah do'i diga asama, nyaami mo bee honooɓe maako cappanɗe njowo go fuu.

¹¹Laamiiɗo neli ardiiɗo feere haa Eliya bee honooɓe muuɗum cappanɗe njowo. Ardiiɗo man wi'i: “An goɗɗo Allah, laamiiɗo wi'i: Yaawɗa jippaago.”

¹²Eliya jaabi: “Nde mi goɗɗo Allah, sey yiite do'o diga asama, nge nyaame an e honooɓe ma cappanɗe njowo fuu.” Saa'i man nden yiite Allah do'i diga asama, nyaami mo bee honooɓe maako cappanɗe njowo go fuu.

¹³Fahin laamiiɗo neli ardiiɗo tataɓo bee honooɓe muuɗum cappanɗe njowo. Ardiiɗo nelaaɗo tataɓo oo wa'i, tuggi koppi yeeso Eliya, tori mo, wi'i: “Useni, an goɗɗo Allah, samɗin yoŋki am e yoŋkiiji yimɓe am cappanɗe njowo ɓe'e.

¹⁴Mi anndi yiite do'i diga asama, nyaami ardiiɓe ɗiɗo aartuɓe bee yimɓe maɓɓe fuu. Ammaa mi torake ma, useni hisnu yoŋki am.”

¹⁵Malaa'ikaajo Jawmiraawo wi'i Eliya: “Jippa bee maako, taa hul mo!” Nden o ummi, o jippodi bee maako haa laamiiɗo.

¹⁶O wi'i mo: “Ndaa nii Jawmiraawo wi'i: A neli nelaaɓe ngam ƴamugo habaru haa Ba'al-Zebub, lawru Ekuruun'en, bana to Allah walaa haa Isra'iila ngam ƴamugo koŋngol muuɗum. Ngam maajum a ummataako diga be'itte ɗe mbaaliiɗa, a maayan fakat.”

¹⁷Ahaziya maayi fodde wolde Jawmiraawo nde Eliya wi'no. Yehoram deerɗiiko laami haa pellel maako, ngam Ahaziya woodaa ɓiɗɗo. Ɗum waɗi nder nduuɓu laamu Yehoram[1] ɓii Yusafat, laamiiɗo Yahuuda ɗiɗaɓu.

¹⁸Luttuɗum haala Ahaziya e kuuɗe mum, ɗum winndaama nder Deftere Habaruuji Nyalaaɗe nde Laamiiɓe Isra'iila.