Read Fulfulde 2 Laamiiɓe 11 Bible Online

2 Laamiiɓe 11 - Fulfulde bible

2 Laamiiɓe 11

¹Nde Ataliya daada Ahaziya nani ɓiyum maayi, o ummi, o mbari danygol laamu fuu.

²Ammaa Yoseba, ɓii laamiiɗo Yoram debbo, deerɗiraawo Ahaziya hoo'i Yo'as ɓii Ahaziya. O hisni mo caka ɓiɓɓe laamiiɗo mbareteeɓe. O nyukkini ɓiŋngel e debbo kakkilanoowo ngel nder suudu sigordu be'itte. Ɓe cuuɗi ngel ngam taa Ataliya yi'a ngel, bana nii ngel hisri maayde.

³Duuɓi joweego Yo'as nyukkidi bee Yoseba nder haykaliiru Jawmiraawo. Ammaa saa'i man fuu Ataliya ɗon laamano lesdi.

⁴Nder nduuɓu joweeɗiɗaɓu, Yoyada limanjo ewni ardiiɓe dow honooɓe teemerre teemerre nder Kari'en[10] e aynooɓe woɗɓe, o yahri ɓe nder haykaliiru Jawmiraawo, o haɓɓi alkawal bee maɓɓe, koo moy maɓɓe huni, nden o holli ɓe ɓii laamiiɗo.

⁵O umri ɓe: “Ndaa ko mbaɗoton: Mbaɗe geɓe tati. Yeɓre mooɗon arannde huuwan nyannde siwtorde, nde aynan saare laamu.

⁶Yeɓre ɗiɗawre daroto haa dammugal Sur, yeɓre tataɓre boo haa dammugal ɓaawo doogari'en aynooɓe. Sey on mbaɗa aynol laamorde bee tokkindirki.

⁷Geɓe mooɗon ɗiɗi timminɗe kuugal nyannde siwtorde, mbaɗa aynol haykaliiru Jawmiraawo haa laamiiɗo woni.

⁸Sey on taaro laamiiɗo, koo moy bee balmi muuɗum haa juuɗe. Koo moy nastanɗo caka caffuuji[11], mbare mo. Ɗofte laamiiɗo, nde o wurtoto e nde o nastata fuu.”

⁹Ardiiɓe dow honooɓe teemerre teemerre mbaɗi ko Yoyada limanjo umruno fuu. Koo moy maɓɓe hoo'i worɓe muuɗum, fuɗɗuɓe e timminɓe kuugal nyannde siwtorde fuu ngari haa Yoyada, limanjo.

¹⁰Limanjo hokki ardiiɓe ɓe'e labbe e bawarɗe[12] gonɗe nder haykaliiru Jawmiraawo, ɗe Daawuda marno.

¹¹Nden doogari'en aynooɓe ndari, koo moy maɓɓe bee balmi muuɗum, diga wakeere haykaliiru nyaamru haa wakeere haykaliiru nanndu, gal hirsirde e haykaliiru boo, ɓe taari laamiiɗo.

¹²Nden o wurtini ɓii laamiiɗo, o hippi mo woronnde, o hokki mo seedamku laamu. Ɓe laamini mo, ɓe moyti mo bee nebbam. Nden ɓe kelli juuɗe, ɓe kooli: “Laamiiɗo yeeɗa haa foroy!”

¹³Nde Ataliya nani hoolo doogari'en aynooɓe e hoolo ummaatoore, o wari haa ummaatoore nder haykaliiru Jawmiraawo.

¹⁴O yi'i laamiiɗo ɗon dari haa daŋraŋgal kommbi dammugal, bana ko woni al'aada laamiiɓe e mawɓe e fuufooɓe algaytaaji kommbi laamiiɗo. Yimɓe fuu ɗon ceyi, ɓe ɗon puufa algaytaaji. Ataliya seeki limce muuɗum, hooli: “Tuurtol, tuurtol!”

¹⁵Ammaa Yoyada limanjo umri ardiiɓe dow honooɓe teemerre teemerre, mawɓe jama'aare konu, wi'no ɓe: “Ngurtine mo, caaline mo caffuuji. To goɗɗo tokkake mo, mbare mo bee kaafahi!” Ngam limanjo wi'no: “Taa mbare Ataliya nder haykaliiru Jawmiraawo.”

¹⁶Ɓe naŋngi mo, ɓe njahri mo haa saare laamu, gal laawol nastirde pucci. Ton ɓe mbari mo.

¹⁷Nden Yoyada haɓɓi alkawal hakkunde Jawmiraawo bee laamiiɗo e yimɓe, haa ɓe laato yimɓe Jawmiraawo, non boo hakkunde laamiiɗo e yimɓe.

¹⁸Ɓaawo maajum yimɓe lesdi fuu njehi haa suudu Ba'al, ngibbini ndu. Ɓe pusi kirsirɗe maaru e suuraaji maaru. Ɓe mbari Mattan, limanjo Ba'al, yeeso kirsirɗe. Nden Yoyada hokki yimɓe kaliifaaku kuuɗe haa haykaliiru Jawmiraawo.

¹⁹Nden o hoo'i ardiiɓe dow honooɓe teemerre teemerre e Kari'en e aynooɓe e yimɓe lesdi fuu, ɓe njahri laamiiɗo diga haykaliiru Jawmiraawo haa saare laamu bee laawol dammugal aynooɓe. O jooɗi dow leeso laamu.

²⁰Yimɓe lesdi fuu ceyi, berniwol boo heɓi de'ere ɓaawo mbareeki Ataliya haa saare laamu.